A HAERE I MUA NA ROTO I TE FAAROO
Te hi‘o nei to te ao ia outou
Ia vai parau-ti‘a noa i te Fatu e i Ta’na ra Ekalesia. A pure tamau i ta outou iho mau pure e a tai‘o i te mau papa‘iraa mo‘a. A tape‘a i ta outou mau fafauraa e a faaroo i te mau parau riirii a te Varua. E tauturu ïa te Fatu ia outou ia faaû i ta outou mau tamataraa e ta outou mau titauraa.
Teie te taime no te haere i mua na roto i te faaroo. Teie te taime ia itehia outou i te haapa‘oraa i te mau faaueraa a te Atua. Teie te taime no te faaohipa i to outou faaroo na roto i te pureraa e te haapa‘oraa. A faaohipa ai outou i to outou faaroo na roto i te pee-maite-raa’tu i tei nei mau ture, e ite ïa outou e e oaoa outou e e rave rahi atu â te mau rave‘a no te faaiteite i te evanelia e i to outou mau ti‘aturiraa ia vetahi ê. Na te oraraa i teie nei mau ture e horo‘a ia outou te ti‘amâraa, eita râ e tape‘a ia outou.
A haere ai outou i mua na roto i te faaroo, e e ooti ïa outou i te mau fafauraa i parauhia e e ninii mai te Fatu i ni‘a iho ia outou To’na ra Varua. Ma To’na Varua no te arata‘i ia outou, e ite ïa outou eaha te rave e nahea i te pahono atu i roto i te mau huru ohipa atoa, e e tape‘a ïa outou i ta outou fafauraa no te bapetizoraa ia haamana‘o noa Ia’na.
Ua anihia te feia faatere apî i te mau tau atoa ia faaohipa i to ratou faaroo e ia haapa‘o maite. Ua rave o Nephi, Iosepha Semita, Ruta e e rave rahi atu â mau taata i te ohipa ma te faaroo e na roto i to ratou haapa‘oraa i te parau a te Fatu e a Ta’na ra mau peropheta.
O outou te u‘i apî tei fanau-hanahana-hia, te u‘i arii, e te hoê u‘i tei tohuhia. Na to outou faaroo e faatupu i te taaê raa i roto i te hoê ao e imi nei i te maitai e te maramarama. Te hi‘o nei to te ao ia outou ei hi‘oraa e ei faatereraa. No reira, « Oia atoa to outou maramarama, ia anaana ïa i mua i te aro o te taata nei, ia hi‘o ratou i ta outou parau maitai, e ia haamaitai i to outou Metua i te ao ra » (Mataio 5:16).