E maitai ïa te mau mea atoa
Parau apî hopea : E va‘u matahiti i muri mai, ua faaite te hi‘opo‘araa hopea roa a te taote i te tuahine Coston e aita roa e tapa‘o no te ma‘i mariri ai taata e vai faahou ra.
Ua î to‘u na mata i te roi mata a tere ai au i te fare ma‘i no te tahi atu â hi‘opo‘araa. Ua ro‘ihia vau i te ma‘i mariri ai taata i muri mai i te fanauraahia ta‘u tamahine e piti matahiti i teie nei. Ua tapûhia e ua rapauhia vau, e te fatata ra te taime e ite ai au e ua manuia ra anei te mau rapauraa. « E to‘u Metua i te Ao ra, ua haapii rahi mai au na roto mai i teie ohipa tei tupu. A iriti ê atu teie tamataraa ia‘u nei. Te hinaaro nei au e aupuru i ta‘u nei tamahine e ia tavini i te hoê misioni i piha’i iho i to‘u hoa faaipoipo i te hoê mahana. A faaora mai ia‘u ».
Ua topa te roi mata. Ua taui ta‘ue noa tau pure i roto i te mau paraparau o te himene « te Pure a te Hoê Tamarii ».1 Ua tura‘i te tahi mea ia‘u ia parau puai.
A pure, tei reira Oia
A parau, te faaroo mai ra Oia
E tamarii oe Na’na
Te haati nei To’na here ia oe
Te faaroo nei Oia i ta oe pure.
Ua tae mai te hoê iteraa rahi no te here i ni‘a ia‘u. Ua ite au e ua ite ona ia‘u e te tau‘a mai nei oia ia‘u e te faaroo mai nei ia‘u. Ua ite au e maitai te mau mea atoa.
Ua farii au i te mau hopearaa o te mau hi‘opo‘araa i te mahana i muri mai. Aita e ma‘i mariri ai taata faahou. Ua ite au i te hoê hopoia teimaha mau i te iriti ê raahia’tu mai ni‘a’tu ia‘u nei. Tera râ, i te mahana i muri mai, ua niuniu mai to‘u taote e ua haamaramarama mai ia‘u e noatu ua faaite mai te mau hopearaa o te mau hi‘opo‘araa e aita e ma‘i faahou, ua faaite mai ra te hopearaa o te hi‘opo‘araa i te toto e te vai noa ra â te ma‘i. Ua ui ihora vau « no te aha ? ». Mai te mea o te reira ihoa te huru, no teaha ïa vau i farii ai i te ite e ua pahono mai te Metua i te Ao ra i ta‘u pure ?
Ua tamata vau i te tuu i to‘u mana‘o tapitapi i te hiti a haere ai au no te tahi atu â hi‘opo‘araa. Aita teie mau hopearaa i faaite noa e te vai noa ra â te ma‘i mariri ai taata, ua parare atoa râ te ma‘i. I roto i te pereoo uira ua uiui noa vau no ni‘a i te ohipa tei tupu. Aita ta‘u e nehenehe ia huna i te mea ta‘u i ite, tera râ te haamata atoa ra vau i te feaa i te auraa o te iteraa o ta‘u i farii.
E mea teimaha mau teie parau api e ua titauhia te hoê feruriraa hohonu. Ua ite au e ua ti‘a roa ia‘u ia haapii mai â i te tahi mea na roto mai i teie ohipa tei tupu. A feruri ai au, ua ite ihora vau e ua haere iho nei au na roto i te mau huru atoa o te hoê melo itoito no te Ekalesia, e te rave nei â vau i te tahi mau mea ei peu noa eiha ra ei parau mau. Aita vau e vai ra i te vahi pae varua o ta‘u e hinaaro ia vai au. Ua ti‘a ia‘u ia ho‘i i te mau tumu papû, no reira ua haamata vau i te faatumu i ni‘a i te mau tufaa o te tapiri atu ia‘u ia Iesu Mesia. Ua hinaaro vau i to’na puai ia manuia vau i roto i to‘u mau tamataraa.
A faaitoito ai au i roto i te pae varua, ua tupu to‘u faaroo ia Iesu Mesia e i Ta’na faanahonahoraa no‘u i te rahi. Ua ite ihora vau e te ohipa tei tupu ia‘u, a tere atu ai au i te fare ma‘i, e pahonoraa mau ïa i ta‘u pure. A ite ai e a farii ai au i taua pahonoraa ra (e maitai te mau mea atoa), ua ite au e eita to‘u Metua i te Ao ra e haapapû mai i te mau taime atoa e afea te mau mea atoa e maitai ai. Eita paha vau e ora maitai roa i te pae tino, tera râ te haapii nei au i te farii i To’na hinaaro. Tei roto mau to‘u ora i To’na na rima.
E hitu matahiti i teie nei i te iteraahia e ma‘i mariri ai taata to‘u. E rave rahi te mau tapuraa e hi‘opo‘araa ta‘u i farii, e te vai noa nei â to‘u ma‘i. Te tere noa ra â te oraraa e te mauuruuru nei au no te reira. Na roto i ta‘u mau tamataraa ua tae mai te mau haamaitairaa, oia hoi hoê faahou â tamahine. Te mea faufaa roa, te tamahanahana noa nei â te pahonoraa a te Fatu ia‘u nei « e maitai te mau mea atoa ».