E faaroo to‘u aita râ e moni
I te hopearaa o te matahiti 1988 te oaoa ra vau i to‘u piiraa ei tauturu piti i roto i te episekoporaa i Ciudad Ojeda, Venezuela, tera râ te haapeapea atoa ra vau no ni‘a i te hoê tumu. Ua riro vau ei melo no te Ekalesia hau atu i te hoê matahiti, aita râ vau i farii atura i to‘u mau haamaitairaa no te hiero.
I te hoê mahana ua haere mai te hoê hoa no te oire tapiri mai e farerei ia‘u. Aita i maoro roa ua haamata ihora maua i te aparau no ni‘a i te mau mea pae varua.
Ua parau ta‘ue maira to‘u hoa, « te taea‘e Troconiz, te ti‘aturi nei au e te hinaaro nei te Tatou Metua i te Ao ra ia oe ia haere i te hiero e ia farii i te mau haamaitairaa o ta’na i fafau i Ta’na mau tamarii ».
Ua parau atu ra vau « aita e nehenehe ia‘u ia haere ». « Aita e hiero i ô nei i Venezuela, e e mea moni rahi roa te tere i rapae au i te oire. Aita ta‘u e moni ».
Ua feruri ihora oia i te tahi taime e ua parau maira, « mai te mea e hinaaro mau oe e haere i te hiero, e horo‘a mai to tatou Metua i te Ao ra i te hoê rave‘a ia oe no te haere atu ».
Ua pahono atu vau, « mai te mea e horo‘a mai to tatou Metua i te Ao ra i taua huru tauturu ra, e haere ïa vau ! »
Mai te reira mai taime ua î noa vau i te faaroo e te ti‘aturi e e nehenehe ta‘u ia haere atu i te hiero. I te mahana i muri mai ua niuniu atu vau i te feia faatere o te tĭtĭ e ua parau mai ratou ia‘u e ua faanahonahohia te hoê tere i te Hiero no Lima Peru, te hiero piri roa a‘e i taua taime ra, i te ava‘e Tenuare. Te moni no te tere e 16,500 tara boliveres ïa e tei roto te titeti manureva, te maa, e te vahi nohoraa.
Ua tere noa te mau mahana, e te piri maira te mahana no te aufauraa i te moni. Ua tamata vau i te imi i te moni, aita ra i noaa ia‘u te tino moni e hinaarohia. Noatu râ aita to‘u faaroo i feaa. Ua ite papû roa vau e horo‘a mai to tatou Metua i te Ao ra i te hoê rave‘a .
Na mua noa‘e i te mahana hopea no te aufauraa, ua farii vau i te hoê niuniu no ô mai i te hoê fatu ohipa tahito. Ua pii mai oia ia‘u ma to‘u ioa e ua parau mai ra, « ua rave oe i te ohipa i roto i teie taiete mori e pae matahiti i mairi a‘e nei. I to oe faarueraa mai, aita ta oe mau moni hau i tano. A haere mai e tii i te hoê parau moni o ta matou i papa‘i i to oe i‘oa i ni iho ».
I te mahana i muri iho ua haere atu vau e tii i te parau moni. I to‘u hioraa i te tino moni, ua maere roa vau. Ua papa‘ihia i ni‘a i te parau moni 16,500 tara bolivares te tino moni tano mau o ta‘u e hinaaro !
I te 17 no Tenuare 1989, ua tomo atu vau i roto i te Hiero no Lima Peru e ua farii au i to‘u oro‘a hiero. Ua tano ihoa to‘u hoa. Ua horo‘a mai to tatou Metua i te Ao ra i te hoê rave‘a ia‘u no te haere atu i te hireo. Mai ta Nephi i parau, « e ti‘a i te Fatu ia rave i te mau mea atoa… no te mau tamarii a te taata, mai te mea e tapi ratou i te faaroo ia’na » (1 Nephi 7:12).