Te ve‘a no mati 2008: Te hoe parau faaiteraa

Piti matahiti faanahoraa e te faahoturaa

Hau i te 2.3 milioni mau buka tei operehia i roto e 51 reo.

Hau i te piti nene‘iraa i titauhia no te rahi o te mau aniraa.

Hau i te 340.000 feia o tei tere i ni‘a i te tahua Itenati taa è.

E riro teie mau numera i te faahoruhoru area râ, aita ratou e faataa maitai ra i te taato‘araa o te mea tei tupu. Te faufaa râ o te ve‘a Ensign e te Liahona o te ava‘e Mati 2008, « Te Fatu o Iesu Mesia », ua haamaramarama mai ïa i te hoê taata ia ite e mea nahea te oraraa ia haaputapuhia.

Te faito o te hoê taata

No te mea ua titauhia ratou ia faaite i to ratou mau mana‘o e i to ratou mau iteraa rau i roto i te ve‘a no Mati 2008, ua papa‘i mai rave rahi mau melo no te faaite e mea nahea te reira i te haaputapuraa i to ratou iho oraraa. Ua papa‘i Maria Felina Ferrer no Philipino mai e: « A tahi ra a 29 matahiti i teie nei au i ora’i ma te paraparau e ma te papa‘i No’na, ua ite papu vau i te Faaora i roto i to‘u iho oraraa. E ere Oia i te hoê tumu parau, e ere ho‘i i te hoê aamu. Te vai mau nei râ Oia… Ua faatupu te reira i te hoê tauiraa rahi i roto ia‘u. I te mau vahi atoa o ta‘u e haere e i te mea o ta‘u e rave mai teie atu ă, ua papu roa vau e te hi‘o mai nei te Fatu Iesu Mesia na roto i te taato‘araa o To’na mana, e te ti‘a nei Oia i pihai iho ia‘u. Na te reira i faahinaaro ia‘u ia riro ei vahine maitai a‘e ».

Ua parau Tom Kunz no Magnolia i Texas i te mau Hau Amui no Marite e: « Ua ite roa vau i te au i te otiraa ia‘u te tai‘o i te ve‘a e ua hinaaro roa vau ia riro ei mea maitai a‘e i roto i te mau huru atoa o to‘u oraraa… Ua ite vau iho nei i te here o te Faaora e i te faufaa rahi o te Taraehara ».

Te faaiteraa ia vetahi ê

I roto i te hoê tere haapiiraa e te hoê hoa, ua horo‘a Linda Buysse-Vergauwen, orometua haapii i te fare haapiiraa tuatahi no Belegika i te hoê ve‘a no Mati e te hoê tanotaraa taa è e te hoê titauraa manihini ia haere mai e faaroo ia’na ia a‘o i te Sabati no Pata i te fare pureraa. Ua haere teie nei hoa e ua anaanatae. « Ua horo‘a mai teie ve‘a Liahona ia‘u i te hoê rave‘a no te tutu i te hoê huero iti i roto i te aau o te hoê hoa », o te parau ïa a te Tuahine Buysse-Vergauwen.

I Kalifonia, i te mau Hau Amui no Marite, ua hopoi o Lori Larson i ta’na ve‘a Ensign no Mati i roto i te vahi faaneheneheraa e ua faieie roa i te reira. Mana‘o ihora oia e e mea maitai ia opere i te mau irava i te tahi atu taata o te tahi atu faaroo e ia nehenehe ratou ia maramarama i te tahi mau mana‘o hape no ni‘a i te Ekalesia. I reira mau, ui mai nei to’na taata faanehenehe no ni‘a i teie ve‘a o ta’na e tai‘o nei. Ia hope to’na faaneheneheraa, ani mai nei te taata faanehenehe ia haere mai te mau misionare e farerei ia’na.

Ua hopoi Telma Chacón no te Oire o Guatemala 12 ve‘a Liahona e ua faaohipa i te reira i te tau no Pata na roto i te opere i te reira e i to’na iteraa papu i to’na ra mau taea‘e e mau tuahine. Ua hapono o Patricia Hegedus no Cardston, Alberta i te fenua Canada i te hoê ve‘a i na taata faaipoipo no Heremani o ta raua ta’na tane i faahoa na taua matahiti i mua‘e nei. Ua farii raua i te reira ma te oaoa e ma te fafau ia tai‘o i te reira. Ua afa‘i e ua opere te utuafare Allan Harvey no Krugesdorp i Afirika Apatoa 12 ve‘a i te mau utuafare o to ratou aroa puromu.

Te mau tautooraa a te paroita e te tĭtĭ

Ua farii te mau paroita o te Ekalesia i te mau ve‘a tamoni-ore no Ensign e aore râ, Liahona no te faaohipa i roto i te ohipa aupururaa, i te ohipa faaitoitoraa e i te ohipa misionare. I Peretane, ua faanahonaho te tĭtĭ no Chorley i te hoê himeneraa Pata taa è i reira te mau hoa, te mau hoa tapiri, te mau melo itoito-rii e te Tahi mau Taata Ti‘araa Teitei i titau-manihihia’i. Ua farii tata‘itahi ratou i te hoê Buka a Moromona e te hoê ve‘a Ensign no te ava‘e Mati 2008.

I Nigeria, ua hahaere te mau tuahine o te Sotaite Tauturu o te mau mataeinaa i te hoê fare tape‘araa, ei tuhaa no te mau faaoaoaraa o te mahana fanauraa o te Sotaiete Tauturu, e ua opere i te mau ve‘a no Mati. Ua mana‘o te tĭtĭ no Newcastle-Under-Lyme no Peretane e e mea ti‘a ia farii te mau utuafare tata‘itahi o te tĭtĭ i te hoê ve‘a e i te hoê titauraa manihini ia haere mai i te pureraa oro‘a taa è o te Sabati Pata. Ua tupu te hoê hopea maitai i te mea e, ua putapu roa te hoê taea‘e o tei riro ei melo itoito-rii i muri rii noa mai i to’na bapetizo-raa-hia i te matahiti 1980 e i teie nei te oaoa faahou nei i te mau haamaitairaa o te evanelia i roto i to’na oraraa.

E, e mau kiritiano matou

Ua papa‘i mai rave rahi no te parau e e mea nahea to teie nei ve‘a no ni‘a i te Faaora iritiraa i te mau taa-ore-raa no ni‘a i Te Ekalesia a Iesu Mesia i te Feia Mo‘a o te Mau Mahana Hopea Nei. Ua faaite Barbara Mayes no Flagstaff i Arizona i te mau Hau Amui no Marite e, ua horo‘a mai te hoê vahine i to’na mana‘o i to’na haereraa mai e tamâ i to’na fare e: « Ua ite au e rave rahi mau mea o tei faaite e te ti‘aturi nei outou ia Iesu. E mea nahea te reira i te tupuraa? E na Momoni orua. E Kiritiano anei orua? » Ua horo‘a’tu te Tuahine Mayes i te hoê ve‘a Ensign no te ava‘e Mati ia’na e haamata ihora raua i te aparau. « A tai‘o ai oia, rave rahi mau uiraa faufaa o ta’na i ui, e ua iritihia te hoê aau », o te parau ïa a te Tuahine Mayes.

Ua faatupu te utuafare Mike e Shaz no Garwood, i New Jersey i te mau Hau Amui no Marite i te hoê oro‘a i te omuaraa o teie matahiti, e ua titauhia rave rahi mau utuafare melo-ore. Ua tae vitiviti mai râ hoê o te mau utuafare, ei reira te tane faaipoipo i ui ai no ni‘a i te Ekalesia. Ua faaite mai to’na hoa orometua e aita tatou e ti‘aturi nei ia Iesu Mesia. Te parau ra te Taea‘e Kramer e, « rave mai nei au i te Ensign o te ava‘e Mati, tei ni‘a iho te hoho‘a o te Mesia i te tapo‘i e ui atura, ‘Teie anei te huru o te hoê ekalesia aita e ti‘aturi nei ia Iesu?’ » Rave mai nei teie taata i taua ve‘a ra e i muri mai, farerei atura i te mau misionare i taua hopea hepetoma ra ma te ui rave rahi atua ă mau uiraa.

E parau poro‘i mure ore

Te toe nei â te mau ve‘a Ensign e Liahona no Mati 2008 i te mau fare hooraa buka a te Ekalesia.

Na ta’na parau poro‘i mure ore no ni‘a i te Faaora i faati‘a i te opereraa eiaha noa no te teie Noela e tae mai nei e no te mau tau no Pata, e nehenehe atoa râ te mau melo i te mau taime atoa e pûpû i te tamahanahana, te haapiiraa i te parau haapiiraa mau, e te faaiteraa ia vetahi ê te hoê iteraa papu no te Fatu ra o Iesu Mesia. Te vai nei ă te iteraa paari no te faauru rave rahi atu â mau oraraa.