Te parau poro‘i a te mau tuahine hahaere7

Ua riro te apeniraa tane e te apeniraa vahine ei tuhaa faufaa rahi roa no te ihotaata e no te tumu o te taata tataitahi i roto hoi i te ao a muri atu

A haapii i te mau papa‘iraa mo‘a e te mau faahitiraa o te pahono i te mau hinaaro o te mau tuahine ta outou e hahaere. A faaite papû i te parau haapiiraa. A ani ia ratou o ta outou e haapii ra ia faaite i te mea o ta ratou i farii e i haapii.

Te Peresideniraa Matamua e te Pŭpŭ no te Tino Ahuru Ma Piti Aposetolo : « Ua hamanihia te mau taata atoa – te tane e te vahine – i te hoho‘a o te Atua ra. Ua riro te taata tataitahi ei tama‘iti varua herehia e ei tamahine varua herehia e na metua i te ra‘i ra, e no reira, tei roto i te taata tataitahi te huru atua e te rave‘a ia riro ei atua. Ua riro te apeniraa tane e te apeniraa vahine ei tuhaa faufaa roa no te ihotaata e no te tumu o te taata tataitahi i roto i te ao na mua a‘e, i roto i te ao tahuti nei, e i roto hoi i te ao a muri atu » (« Te Utuafare : E Poro‘i i to te Ao nei », Liahona, Atopa 2004,49).

No te aha te apeniraa tane e te apeniraa vahine i riro ai ei tuhaa faufaa roa ?

Elder David A. Bednar no te Pŭpŭ no te Tino Ahuru Ma Piti Aposetolo : « E faaite te (apeniraa tane e te apeniraa vahine) e o vai ra tatou, no te aha tatou i vai ai i ni‘a i te fenua nei, e eaha ta tatou e rave e e riro mai. Na roto i te mau opuaraa hanahana, e mea huru ê te mau varua tane i te mau varua vahine, mea taa maitai… Ua titauhia te apitiraa taa ê roa o te mau ite pae varua, pae tino, pae feruriraa, e pae mana‘o o te mau tane e te mau vahine no te faahaere i te opuaraa no te oaoa » (« Marriage Is Essential to His Eternal Plan », Liahona, Tiunu 2006, 51).

Julie B. Beck, Peresideni rahi tahito no te Totaiete Tauturu : « Ei mau tamarii varua tamahine na te Atua, ua farii te mau vahine i ta ratou mau haapiiraa matamua i roto i te ao o te mau varua e ua faaineinehia ratou no te haere mai’ (PH&PF 138:56) i ni‘a i te fenua nei. Tei rotopu ratou i te ‘feia maitai e te feia rahi’ (PH&PF 138:55) o tei ‘pii i te oaoa’ (Ioba 38:7) i te hamani-raa-hia te fenua no te mea e horo‘ahia ia ratou te hoê tino tahuti e te rave‘a ia tamatahia ratou i roto i te hoê ao tahuti (a hi‘o Aberahama 3:25). Ua hinaaro ratou ia rohi amui i pihai iho i te mau tane parau-ti‘a no te faatupu i te mau fâ mure ore o te ore roa ta te tane ana‘e aore râ ta te vahine ana‘e e nehenehe e faatupu. Aita te mau ti‘araa o te vahine i haamata noa i te fenua nei, e eita hoi e hope i ô nei. Te hoê vahine o tei haafaufaa i te ti‘araa metua vahine i ni‘a i te fenua nei e na reira atoa oia i roto i te ao i mua nei » (« Te mafatu o te hoê metua vahine », Liahona, Me 2004, 76).

Eaha ta‘u e nehenehe e rave no te haapa‘o i to‘u ti‘araa i roto i te faanahonahoraa a to tatou Metua i te Ao ra ?

Margaret D. Nadauld, Peresideni rahi tahito no te Feia Api Tamahine : « Eita roa te mau vahine o te Atua e riro mai te mau vahine o te ao nei. Ua nava‘i i roto i te ao nei te mau vahine paari ; te hinaaro nei tatou i te mau vahine marû. Ua nava‘i te mau vahine iria ; te hinaaro nei tatou i te mau vahine hamani maitai… Ua nava‘i ta tatou mau vahine tei tui te roo e tei monihia ; te hinaaro nei tatou e ia rahi atu â te mau vahine faaroo » (« The Joy of Womanhood », Liahona, Tenuare 2001, 18).

Elder M. Russell Ballard no te Pŭpŭ no te Tino Ahuru Ma Piti Aposetolo : « Na te Atua iho i faataa maitai i te mau natura o te mau tane e o te mau vahine i roto i te ao na mua a‘e e i te ao tahuti nei… (I te tahi mau taime e ui te mau vahine) : ‘Tei ni‘a noa anei te faufaa o te hoê vahine i ta’na ohipa ei vahine faaipoipo e ei metua vahine ?’ E mea ohie mau ïa te pahonoraa : Aita… E ohipa faufaa rahi ta te mau tane e te mau vahine parau-ti‘a atoa i roto i te tereraa i mua o te basileia a te Atua…

«… E to‘u mau tuahine here e, te ti‘aturi nei matou ia outou. Te ti‘aturi nei matou i ni‘a i to outou maitai e i to outou puai… E te ti‘aturi nei matou e te opuaraa a te Atua ia riro ïa outou ei mau arii vahine e ia farii i te mau haamaitairaa teitei roa a‘e o ta te vahine e nehenehe e farii i teie oraraa e i te oraraa mure ore » (« Women of Righteousness, Liahona, Ditema 2002, 36-37).