TE MAU MANA‘O NO TE PURERAA PO UTUAFARE

E nehenehe teie nei mau mana‘o tauturu no te haapiiraa e faaohipahia i roto i te piha haapiiraa e i roto atoa i te utuafare. E nehenehe ta outou e faaau i teie nei mau mana‘o i to outou utuafare aore râ piha haapiiraa.

« Te iteraa i to‘u nei faaroo », api 8 : A tuatapapa eaha te hoê iteraa papû. A faati‘a i te aamu o Joshua. A tai‘o Etera 12:6, e a ui eaha te auraa o teie papa‘iraa mo‘a no’na. Nahea to tatou faaroo e tamatahia’i no te faatupu i to tatou mau iteraa papû i te rahi ? Nahea o Joshua i faarahi ai i to’na ra faaroo i muri a‘e i to’na bapetizo-raa-hia ? A ani i te mau melo no te utuafare ia faaite mai i to ratou mau iteraa papû.

« 18 rave‘a no te ti‘a puai noa », api 25 : E nehenehe teie nei aamu e faaohipahia no te mau pureraa pô utuafare e rave rahi. A papa‘i i na 18 ture i ni‘a i te mau api parau. A huti i te hoê api parau, e a tai‘o i taua tuhaa ra o te aamu. A aparau e nahea te mau ture e tano ai i te faaohipahia i to outou utuafare. I muri iho a huti i te tahi atu api parau, ma te tamau noa i te rave mai tei hinaarohia. A haapuai i te faufaa rahi o teie nei mau ture arata‘i no te oraraa. A faariro ei fâ te peeraa i te a‘oraa tei horo‘ahia no te ture tata‘itahi. A faaoti na roto i te tai‘oraa i te tufaa « A haere i mua ma te faaroo ».

« A ara i te mau puaahorofenua raau », api 38 : Ua huna o Satane e rave rahi mau puaahorofenua raau i to tatou nei anotau. A tai‘o i te aamu no te puaahorofenua no Troie i roto i te aamu, e a feruri i te hi‘o i te mau buka, te pehe, e te mau hoho‘a teata e vai ra i roto i to outou utuafare. A faariro ei hautiraa te i‘oa « e nehenehe anei teie e faahereherehia ? » A tape‘a noa i te mau buka, te mau pehe e te mau hoho‘a teata parau-ti‘a, maitai, aore râ e roo maitai aore râ e haapoupouhia (a hi‘o i te mau Hiroa Faaroo 1:13). A faahope ma te tai‘o Mosia 5:15 e te Parau Haapiiraa e te mau Parau Fafau 45:32.

« A tauturu e a oaoa », api H10 : A rave i teie taime no te haamau aore râ no te tamau â i te hoê tabula ohipa no to outou utuafare. A tabula e rave rahi mau ohipa (e au i te faito matahiti o te mau tamarii), e a ani i te taata tata‘itahi ia ma‘iti i te hoê ohipa no te rave. A tai‘o i te aamu, e a aparau no te aha e mea faufaa ia tauturu te taata tata‘itahi. A faaoti i te hoê fâ no te tavini ia vetahi ê i te hebedoma e haere mai nei.

« Te faaineineraa no te hoê misioni », api H14 : A ani i to outou utuafare ia faaroo i te mau rave‘a i faaineine ai o Elder Ulisses Soares no ta’na ra misioni. A tai‘o i te a‘o ta to’na episekopo i horo‘a ia’na. A aparau e nahea te melo tata‘itahi no te utuafare e faaineine ai ia riro ei mau misionare.