Sa Ou Maua le Toafilemu ma le Faamoemoe i le Talalelei
Sa ou fanau o le uii o se fanauga e toaono i se tamai nuu e igoa o Bindura, Zimbabwe, Aferika. Na tetea ou matua i ni nai tausaga talu ona ou fanau, ma o lea sa tausia ai i matou e lo’u tina lelei ma le agaalofa—e toafa teine ae toalua tama—na tausi toatasi lava e ia.
Sa faigata le olaga mo i matou. Sa ou savali i le fa pe lima kilomita (3 maila) i le aoga, ma ou te alu e leai ni ou seevae, po o se meaai foi. O tausaga taitasi e le mafai ai lava ona ou faamaeaina le kuata ona ua le mafai ona totogi a matou pili aoga. Sa leai se isi lava mea o le lalolagi matou te maua ai se tupe e totogi ai o matou pili i le taimi e tatau ai ona totogi. Soo se taimi matou te maua ai se tupe, ou te taumafai lava e fiailoa pe na faapefea ona matou mauaina, ae sa le mafai ona ou iloaina. O se vavega le mafaufau atu i le lelei o le tausiga o i matou. O ia mea uma ona o le alofa ma le finagalo o lo tatou Tama oi le Lagi.
E fiafia lava lo’u tina e alu i le lotu, ma taluai ona o au o le uii, o lea ma te o ai lava. I le 1998, ina ua 13 ou tausaga, na oo mai ai ni faifeautalai se toalua a le Au Paia o Aso e Gata Ai i lo matou pitonuu e asiasi i tagata o le ekalesia ua le toaaga. Sa matou taaalo soka lava ma au uo ae pasi ane loa faifeautalai. Sa matou talanoa ma i laua, ma na fesili mai faifeautalai pe mafai ona la asiasi mai ia i matou i le vaiaso na sosoo ai. Sa la aoaoina i matou, ma sa matou taliaina le valaaulia ina ia papatisoina.
E fa tausaga mulimuli ane, i le 2002, na maliliu ai lo’u tama ma se tasi o ou tuafafine i le na o le tasi le vaiaso na va ai le maliu o le isi mai le isi. Sa ou faaauau pea, ona auauna atu o se faifeautalai i le itu seia oo ina ou maua lou valaauga o se faifeautalai faamisiona ia Iulai 2004 ou te galue i le Misiona a Durban Aferika i Saute. Sa na o ni nai masina na ou i ai i totonu o le misiona ae telefoni mai lo’u uso i lo’u peresitene o le misiona, ma faailoa mai ua maliu lo’u tina ma ua uma ona falelauasi o ia. Pe mafai ona outou vaai faalemafaufau i lagona o le aveesea o se tina faapena? E fa masina mulimuli ane ae maliu le isi ou tuafafine.
I le avea ai o se faifeautalai, sa ou aoaoina ai tagata e uiga i le talalelei toefuataiina. Ona o la’u molimau, sa ou le popole ai lava i ou aiga ua maliliu. Sa ou maua le toafilemu o le mafaufau ma le faamoemoe e faapea, o le a i ai se taimi o le a ou toe vaai ai i ou matua ma ou tuafafine. I lo’u foi atu i lo’u aiga mai la’u misiona ia Iulai 2006, sa ou alu ai i le Malumalu o Johannesburg Aferika i Saute ma ou papatiso ai e fai ma sui o alii o lo’u aiga o e ua maliliu, ma sa faia foi papatisoga mo ou tuafafine o e na maliliu.
O loo tumau pea le faigata o tulaga i Zimbabwe, ae o loo i ai sau molimau malosi i le manuia lea e mafai ona oo mai e ala i le mulimuli i taitai ma polokalama o le Ekalesia. E ui lava i o tatou luitau uma, e mafai ona tatou maua le toafilemu ma le faamoemoe i le talalelei toefuataiina a Iesu Keriso. Ia faafetaia le Atua ona o Lona tausia ma le taialaina o Lana Ekalesia ma Ana fanau. Ou te faafetai ia te Ia mo le malumalu, lea e aumaia ai ia i tatou le filemu ma le faamoemoe o le a faapea ona tatou toe feiloai ma o tatou aiga.
Ua fetalai le Alii, “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
E ui lava i luitau o le olaga, talosia ia tumau lo tatou faamoemoe mo le lelei, ia le masalosalo lava ma ia le fesiligia le finagalo o le Alii.
Sa na o ni nai masina na ou i ai i totonu o le misiona ae telefoni mai lo’u uso ma se tala faanoanoa. Ona o la’u molimau, ou te le popole ai lava.