Panahon sa Pagpakigbahin

Si Jesukristo Mao ang Akong Manluluwas

Ni Cheryl Esplin

“Ako mao ang dalan, ug ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” (Juan 14:6).

Sa wala pa kita gipadala sa Langitnong Amahan sa yuta, Iyang gipili si Jesukristo nga mao ang mahimo natong lider ug Manluluwas. Kamo mipili sa pagsunod ni Jesukristo sa wala pa kamo matawo.

Sa dihang si Jesus mianhi sa yuta, Siya mitudlo sa ebanghelyo ug mitukod sa Iyang Simbahan. Siya mituman sa Iyang saad nga mahimo natong Manluluwas. Siya nag-antus ug namatay ug nabanhaw aron kita mabanhaw ug mopuyo pag-usab uban sa Langitnong Amahan ug sa atong mga pamilya.

Ang mga kasulatan nagtudlo kanato sa daghang mga panalangin nga nahimong posible tungod ni Jesukristo. Nahinumdom ba kamo sa istorya sa damgo ni Lehi? Si Lehi nakakita og usa ka kahoy. Ang kahoy nagrepresentar sa gugma sa Langitnong Amahan ug ni Jesukristo

Sa kahoy dihay prutas nga makapalipay sa mga tawo. Gitilawan ni Lehi ang prutas, ug kini nakapalipay kaniya. Gusto ni Lehi nga motilaw ang iyang tibuok pamilya sa prutas. (Tan-awa sa 1 Nephi 8:10–12).

Ang prutas sa kahoy nagrepresentar sa mga panalangin nga atong nadawat tungod ni Jesukristo ug sa Iyang Pag-ula. Kita nakatilaw sa prutas sa dihang kita nagsalig ni Jesukristo, sa dihang kita gibunyagan ug nakadawat sa Espiritu Santo, ug sa dihang kita nagsunod sa ebanghelyo ug nabati ang gugma sa Manluluwas.

Kalihokan

Kuhaa ang pahina H5, ug ibutang kini sa baga nga papel. Guntinga ang gisi sa kahoy sa puti nga mga linya, ug guntinga ang prutas. Alang sa matag prutas, tan-awa ang kasulatan, ilha ang panalangin nga gihatag sa Langitnong Amahan kanato, ug isulat kini sa linya. Ibutang ang tab sa prutas ngadto sa gisi sa kahoy.

Mga Ideya sa Panahon sa Pagpakigbahin

Sa kinabuhi nga wala pa dinhi sa yuta, ako mipili sa pagsunod ni Jesukristo. Hangyoa ang mga bata sa paghingalan sa pipila ka mga pagpili nga ilang nahimo nianang adlawa (unsay isul-ob, unsay kan-on, ug uban pa). Isulat ang tubag sa pisara. Ipasabut nga ang Langitnong Amahan mihatag kanato og kabubut-on, ang abilidad sa paghimo og mga pagpili. Itudlo ang mahitungod sa Konseho sa Langit, sa dihang ang Langitnong Amahan mipresentar sa Iyang plano. Ipasabut nga ang paggamit sa atong kabubut-on usa ka importante nga bahin niana nga plano. Tabangi ang mga bata nga makasabut nga si Satanas buot mousab sa plano ug mokuha sa atong abilidad sa pagpili. Si Jesukristo buot mosunod sa plano sa Langitnong Amahan ug miboluntaryo nga mahimo natong Manluluwas. Ipasabut ngadto sa mga bata nga sila mipili sa pagsunod ni Jesukristo (tan-awa sa Primary 6, leksyon 2). Isulat ang mga pangutana aron sa pagtabang sa mga bata nga makaribyu unsay ilang nakat-unan. Ibutang ang mga pangutana sa usa ka sudlanan. Pagpili og usa ka bata nga mokuha sa pangutana gikan sa sudlanan ug motubag niini. Dayon papilia kana nga bata og laing bata nga mokuha og pangutana ug motubag niini. Padayon kon duna pay panahon. Pagpamatuod mahitungod sa kamahinungdanon sa pagpadayon sa pagsunod ni Jesukristo.
Ang akong pamilya ug ako mabanhaw. Sa sayo pa ug uban sa pagtugot sa bishop o presidente sa branch, pagdapit og usa ka miyembro kinsa nakasinati sa kamatayon sa usa ka minahal sa pagpamatuod kon unsa ang kahulugan sa Pagkabanhaw ngadto kaniya. Ipatongpatong ang mosunod nga mga litrato sa Paketi sa Mga Hulagway sa Ebanghelyo sa mosunod nga han-ay nga ang 227 sa ibabaw. 227 (Si Jesus Nag-ampo sa Getsemani), 228 (Ang Pagbudhi kang Jesus), 230 (Ang Paglansang sa Krus), 231 (Paglubong ni Jesus), 233 (Si Maria ug ang Nabanhaw nga Ginoo), 234 (Si Jesus Mipakita sa Iyang mga Samad), ug 316 (Si Jesus Nagtudlo didto sa Kasadpang Bahin sa Katunga sa Kalibutan). Samtang ang piyanista mopatugtog, ipapasa sa mga bata ang gamay nga bato. Sultihi sila nga kini simbolo sa bato nga giligid sa atubangan sa pultahan sa lubnganan ni Kristo. Kon mohunong ang musika, pakuhaa ang bata nga naggunit sa bato og litrato gikan sa ibabaw sa gipatongpatong ug pasultiha mahitungod niini o papilia og usa ka bata aron motabang. Padayon alang sa matag litrato, mohunong human sa 234 aron mobasa sa Lucas 24:39 og dungan. Tabangi ang mga bata nga makasabut nga human mabanhaw si Jesus, ang mga Apostoles mihikap sa Iyang mga kamot sama nga ang mga bata mohikap sa ilang kaugalingong mga kamot. Padayon sa nahibilin nga mga litrato. Itudlo nga tungod sa Pag-ula ni Jesukristo, ang tanan nga nakapuyo sa yuta mabanhaw. Pahataga ang dinapit nga bisita og pagpamatuod.

Paghulagway ni Brad Teare