Dali Paminaw sa Tingog sa usa ka Propeta
Pagbalik nga Luwas ngadto sa Langitnong Amahan
Gikan sa usa ka pakigpulong sa Abril 2007 nga kinatibuk-ang komperensya.
Si Presidente Uchtdorf nagtudlo nga tungod sa Pag-ula, kita makahinulsol ug makabaton kanunay og paglaum.
Ang Punto sa Luwas nga Pagbalik
Atol sa akong pagbansay aron mahimong kapitan sa eroplano, kinahanglang makat-on ako unsaon sa pagpalupad sa eroplano sa lagyo nga mga distansya. Ang biyahe ibabaw sa dakong kadagatan, motabok sa lapad nga mga desyerto, ug sa nagsumpay nga mga kontinente nagkinahanglan og mabinantayong pagplano aron sa pagsiguro sa luwas nga pag-abut sa giplano nga destinasyon. Ang pipila niining walay hunong nga mga mga biyahe molungtad og 14 ka oras ug modagan og hapit 9,000 ka mga milya (14,500 km).
Adunay importante nga punto sa desisyon panahon sa dugay nga mga biyahe nailhan nga punto sa luwas nga pagbalik. Hangtud niining puntoha ang eroplano adunay igong gasolina sa pagbalik ug mobalik nga luwas ngadto sa airport nga gigikanan. Nga nakalabay sa punto sa luwas nga pagbalik, ang kapitan nawad-an niining opsyon ug kinahanglang mopadayon. Mao nga kini nga punto sa kasagaran gitawag og punto sa walay pagbalik.
Dili Pa Gayud Ulahi Kaayo
Si Satanas gusto nga kita maghunahuna nga kon kita makasala kita milapas na sa “punto sa walay pagbalik” —nga ulahi na kaayo nga mousab sa atong dalan. Ang Pag-ula ni Jesukristo mao ang gasa sa Dios ngadto sa Iyang mga anak sa pagkorihir ug sa pagbuntog sa mga sangputanan sa sala. Si Kristo miabut aron sa pagluwas kanato. Kon kita miagi sa sayop nga dalan, ang Pag-ula ni Jesukristo makahatag kanato sa kasiguroan nga ang sala dili ang punto sa walay pagbalik. Ang luwas nga pagbalik posible kon kita mosunod sa plano sa Dios alang sa atong kaluwasan.
Kanunay Gayud nga Adunay Paglaum.
Kon inyong makita ang inyong kaugalingon niini nga biyahe agi sa kinabuhi, bisan unsang mga pagsulay ang inyong atubangon, aduna kanunay usa ka punto sa luwas nga pagbalik; adunay paglaum kanunay. Kamo ang kapitan sa inyong kinabuhi, ug ang Dios nag-andam og plano sa pagdala kaninyo nga luwas balik ngadto Kaniya, ngadto sa inyong balaan nga destinasyon.
Ang gasa sa Pag-ula ni Jesukristo naghatag kanato sa tanang mga higayon ug sa tanang mga dapit sa mga panalangin sa paghinulsol ug pagpasaylo. Tungod niini nga gasa, ang oportunidad nga makahimo og luwas nga pagbalik gikan sa makalaglag nga dalan sa sala anaa kanatong tanan. Ang kalipay niiini nga kinabuhi ug mahangturong hingpit nga kalipay sa kinabuhi nga moabut mao ang atong ganti kon kita mopili niini nga gasa sa atong Langitnong Amahan.
Paghulagway ni Scott Greer