Mga Pangutana ug mga Tubag mahitungod sa Organisasyon sa Simbahan

Ngano nga ang Simbahan gihinganlan man sa pangalan ni Jesus?

Si Jesus miingon nga kini gihinganlan sa Iyang pangalan tungod kay kini Iyang Simbahan (tan-awa sa 3 Nephi 27:8). Gi-organisar Niya kini aron sa pagtabang kanato nga makabalik ngadto sa Langitnong Amahan. Si Jesukristo ang pangulo sa Simbahan.

Unsay gipasabut sa “ulahing-adlaw”?

Si Jesus miingon, “Kay sa ingon ang akong simbahan pagatawgon sa katapusan nga mga adlaw, gani Ang Simbahan ni Jesukristo sa mga Santos sa Ulahing mga Adlaw” (D&P 115:4). Ang “ulahing-adlaw” nagpasabut sa katapusang mga adlaw, ang panahon nga atong gipuy-an karon.

Unsay gipasabut sa “mga Santos?

Ang “mga Santos” nagpasabut nga mga miyembro sa Simbahan ni Kristo. Ang mga kasulatan nagsulti kanato mahitungod sa mga Santos sa daghang mga kapanahonan.

Mga panahon sa Daang Tugon: Deuteronomio 33:3; Salmo 30:4

Mga panahon sa Bag-ong Tugon: 1 Mga Taga-Corinto 1:2

Mga panahon sa Basahon ni Mormon: 1 Nephi 14:14; Moroni 8:26

Panahon ni Joseph Smith: Doktrina ug mga Pakigsaad 57:1; 84:2.

Karon, ang mga miyembro sa Simbahan gitawag usab og mga Santos.

Giunsa pag-organisar ni Jesukristo ang Iyang Simbahan?

Si Jesus mi-organisar sa Iyang Simbahan sa dihang nagpuyo Siya dinhi sa yuta, sa dihang Siya mibisita sa kayutaan sa Amerika, ug sa dihang Siya mipahiuli niini pinaagi ni Propeta Joseph Smith. Sa matag panahon nga Siya mopili og Napulog Duha o mga disipulo aron sa pagtabang Kaniya sa pagtukod sa gingharian sa Dios dinhi sa yuta pinaagi sa pagtudlo sa ebanghelyo (tan-awa sa Marcos16:14–15; 3 Nephi 12:1).

Si Jesus motawag og usa ka propeta aron mogiya sa Simbahan. Ang Presidente sa Simbahan mao ang propeta. Si Jesus mitawag ni Joseph Smith isip unang propeta sa ulahing mga adlaw. Si Thomas S. Monson mao ang ika-16 nga Presidente sa Simbahan. Ang propeta mao lamang ang bugtong tawo nga makadawat og pagpadayag alang sa tibuok Simbahan.

Ang Napulog Duha ka mga Apostoles sa mga panahon sa Bag-ong Tugon

Ang Napulog Duha ka mga disipulo sa mga panahon sa Basahon ni Mormon

Si Joseph Smith, ang unang Presidente sa Simbahan

Si Thomas S. Monson, ika-16 nga Presidente sa Simbahan

Mga Propeta sa Ulahing mga Adlaw

Sa unsa nga paagi nga ang atong mga lider sa Simbahan motabang ni Jesus?

Ang tanang mga lider sa Simbahan mitabang ni Jesus pinaagi sa pagserbisyo sa ubang mga miyembro sa Simbahan.

Ang propeta migiya sa Napulog Duha ka mga Apostoles.

Ang mga Apostoles mogiya sa mga Korum sa Seventy

Ang mga Korum sa Seventy motabang sa mga Apostoles sa pagtudlo sa mga presidente sa stake ug district.

Ang mga presidente sa stake ug sa district, motabang sa mga bishop ug mga presidente sa branch.

Sa mga ward ug mga branch, ang mga bishop ug mga presidente sa branch mogiya sa mga presidente sa Relief Society, sa mga presidente sa Young Men ug sa Young Women, sa mga presidente sa Primary, sa mga presidente sa Sunday School, sa mga home ug visiting teacher, ug sa ubang mga lider.

Ang mga lider ug mga magtutudlo sa diha mga ward ug sa mga branch moserbisyo kanatong tanan.

Unsaon ninyo pagtabang si Jesus?

Motabang kamo ni Jesus kon kamo mosunod sa Iyang mga sugo. Motabang kamo Kaniya pinaagi sa pagsunod sa propeta. Motabang kamo Kaniya kon kamo magkat-on mahitungod Kaniya pinaagi sa pagtambong sa simbahan ug pagbasa sa mga kasulatan. Kamo motabang Kaniya kon kamo mopili sa matarung. Pinaagi sa pagbuhat niining mga butanga, kamo nag-andam nga mahimong umaabut nga lider sa Iyang Simbahan, Ang Simbahan ni Jesukristo sa mga Santos sa Ulahing mga Adlaw.

Tan-awa ang Akong mga Kamot ug mga Tiil, ni Harry Anderson; SI KRISTO MIORDEN SA MGA APOSTOLES, ni Harry Anderson; Tulo ka mga Nephite, ni Gary L. Kapp; paghulagway sa litrato ni WELDEN C. ANDERSEN; detalye ni Joseph Smith Jr., sa maayong kabubut-on sa Community of Christ Archives, Independence, Missouri; litrato ni Presidente Monson pinaagi ni David Newman