Mga Pangutana ug mga Tubag
“Ang akong mga ginikanan dili aktibo sa Simbahan. Unsaon nako sa pagpabiling lig-on kon sila walay suporta?”
Kini usa ka lisud nga sitwasyon tungod kay ang mga ginikanan sa kasagaran mao ang molantaw alang sa paggiya ug direksyon. Apan adunay mga butang nga imong mahimo aron magpabilin nga lig-on, ug ang pagbuhat niining mga butanga motabang kanimo nga mamahimong maayong ehemplo ngadto sa imong mga ginikanan.
Aron sa pagdapit og inspirasyon sa imong kinabuhi, padayon sa pag-ampo ug pagtuon sa mga kasulatan. Ang Langitnong Amahan naminaw sa imong mga pag-ampo ug motubag niini.
Duol ngadto sa ubang mga paryente o mga miyembro sa Simbahan alang sa ehemplo ug suporta nga imong gikinahanglan. Pananglitan, pangayo sa imong mga home teacher o bishop o branch president og panalangin sa priesthood kon walay takus nga tighupot sa priesthood sa inyong panimalay.
Ikaw makalig-on sa imong mga igsoon ug mga ginikanan pinaagi sa ehemplo sa imong hugot nga pagtuo. Ikaw makahimo gihapon og family home evening, pag-ampo sa pamilya, o pagtuon sa kasulatan sa pamilya uban sa imong mga igsoon. Ang imong mga ginikanan mahimong moapil uban kaninyo.
Labing importante, padayon sa paghighugma sa imong mga ginikanan. Ayaw sila hukmi. Hinoon, pagmabination ug pagmapailubon. Nagkinahanglan gihapon sila sa imong paghigugma ug pagsuporta, sama nga ikaw nagkinahanglan usab sa ilaha.
Pag-ampo alang sa Imong mga Ginikanan
Dapita ang imong mga ginikanan sa paghimo og pag-ampo sa pamilya. Dapita sila sa mga kalihokan sa Simbahan. Paghimo og mga family home evening. Pag-ampo alang kanila sa kanunay, ug paningkamuti nga mahimong maayo nga ehemplo. Niana nga paagi imong mapalig-on ang imong pamilya ug ang imong kaugalingong pagpamatuod, mas monindot ang imong pagbati, ug ang Dios motabang kanimo nga magpabiling lig-on sa Simbahan. Buhata kini uban sa hugot nga pagtuo, ug Siya motubag sa imong mga pag-ampo.
Sonia B., 20, Yucatán, Mexico
Ayaw Paghunong
Ang akong papa dili miyembro, ug ang akong mama ug mga igsoong babaye dili aktibo. Kini makapasakit kanako nga ilang ibaliwala ang akong pagtuo. Apan ang akong hugot nga pagtuo nagtubo samtang ako motambong og seminary, sa simbahan, ug Mutual ug samtang ako mag-ampo ug magbasa sa mga kasulatan. Ang labing maayo nga tambag nga akong mahatag mao ang ayaw paghunong.
Amanda B., 16, Nevada, USA
Mga Pamaagi nga Magpabiling Aktibo
Ako nakaila og usa ka talagsaong babaye kinsa hilabihan gayud kalig-on sa Simbahan bisan ang iyang mga ginikanan dili kaayo aktibo. Siya usa ka inspirasyon sa ubang mga babaye samtang siya nakaangkon na sa iyang medalyon sa Young Women. Siya miingon nga ang suporta sa ubang mga batan-ong babaye, pagtambong kanunay sa simbahan, ug tinud-anay nga pagpakig-istorya sa iyang Langitnong Amahan mao ang tanan nga mahinungdanong mga paagi nga nagtabang kaniya nga magpabiling aktibo.
Chelsea C., 17, Oklahoma, USA
Usa ka Luwas nga Dangpanan
Ako nagsalig sa pag-ampo ug pagtuon sa kasulatan aron molig-on sa akong pagpamatuod, ug ako nakakaplag og usa ka luwas nga dangpanan pinaagi sa pag-apil sa Scouting ug mga programa sa Young Men ingon man usab sa pagbuhat sa akong mga calling. Ang pagsunod sa mga tambag sa mga propeta ug pagpili og maayong mga higala makatabang usab. Hinumdumi nga kanunay nga maghimo og usa ka maayong ehemplo alang sa imong pamilya pinaagi sa pagpakita kanila og matinud-anong gugma, pagpakabana, ug pagtahud. Kon imong buhaton ang imong bahin, ang Ginoo mobuhat sa Iyaha.
Elder Whigham, 21, California San Francisco Mission
Kaisug gikan sa Ilang mga Ehemplo
Ang akong mama dili kaayo aktibo, ug ang uban nakong mga paryente dili mga miyembro. Unsa ang akong gibuhat mao ang pagsalig sa akong mga lider ug sa akong mga higala; sila kanunay nga nagtabang kanako. Sila nahimong importante kaayo sa akong kinabuhi tungod kay sila nakatampo sa akong pamaagi sa kinabuhi ug sa akong tumong nga moadto og misyon. Sila naghatag kanako og dugang kaisug pinaagi sa ilang mga ehemplo. Ikaw kinahanglang magmapasalamaton sa panaghigalaay niadtong mga tawo kinsa mitabang kanimo nga motubo isip usa ka miyembro ug mogahin og mas daghang panahon uban kanila, kay sigurado nga ikaw sa kanunay adunay mas daghan nga mga butang nga makat-onan.
Ivana S., 20, Buenos Aires, Argentina
Pahayag og Gugma ngadto sa Imong mga Ginikanan
Padayon sa pakigsulti ngadto sa imong mga ginikanan, ug sulayi sa pagkuha ang ilang suporta. Ipahayag ang imong gugma ug pagpasalamat ngadto kanila, ug sultihi sila kon unsa ka importante alang kanimo ang pag-adto sa simbahan. Hangyo sa imong mga lider og panabang nga ikaw makatambong sa pagsimba, ug tan-awa kon ang imong bishop mosulay sa pakig-istorya ngadto sa imong mga ginikanan. Pag-ampo ug pangayo sa Langitnong Amahan alang sa Iyang suporta, ug pag-ampo nga ang imong mga ginikanan mosugod sa pagkakita nga ang pagpabiling aktibo importante kaayo alang kanimo. Ikaw usab mahimong mas malig-on pinaagi sa pagbasa sa Basahon ni Mormon kada adlaw ug maghupot sa iyang mga sugo.
Craig L., 16, Missouri, USA
Duha ka mga Pamaagi sa Pagsuporta
Ako nakakita og daghan niining sitwasyon sa akong misyon, ug ang mga bata nga moatubang niini mga maisugon. Giunsa nila sa paghimo niini? Pinaagi sa pagtukod og pamaagi sa pagsuporta sulod sa Simbahan pinaagi sa mga higala ug mga lider ug pinaagi sa pagtukod og pamaagi sa pagsuporta uban sa Dios pinaagi sa pag-ampo, pagbasa sa kasulatan kanunay, ug pagtambong sa Simbahan. Ikaw makahimo niini pinaagi sa pagbuhat niining mga butanga!
Elder Jones, 21, Tahiti Papeete Mission