Pagbuhat og Mas Labaw Pa kaysa Gikinahanglan

Ni Paul VanDenBerghe

Mga Magasin sa Simbahan

Usahay ang pagbuhat og dugang gamay nga paningkamot moresulta sa dakong mga butang.

Sa dihang si Stein Arthur Andersen mga 15 ang pangedaron, siya dili aktibo sa Simbahan. Ingon man ang iyang pamilya. Sila kadaghan na nga nagbalhinbalhin sa lain-laing mga lugar sa Norway. Sa pagkakaron sila nagpuyo sa Stavanger. Kini mao ang ikaupat nga kinadak-ang siyudad sa nasud ug nahimutang sa habagatang kasadpan sa baybayon. Si Stein nakaadto na sa simbahan sa Stavanger sa pipila ka higayon ug nakahimamat og pipila ka mga Santos sa Ulahing mga Adlaw nga kabatan-on sa maong dapit. Ang usa ka pihong batan-ong lalaki ang mibilin kang Stein og maanindot kaayo nga pagdayeg—iyang ngalan si Tor Lasse Bjerga.

Panahon kadto sa usa ka dili kanunay nga pagbisita sa simbahan ni Stein nga iyang nahimamat si Tor Lasse “Siya magulang nako og pipila ka mga tuig, ug siya nakapadayeg gyud kanako,” miingon si Stein “Ako mibati og usa ka maanindot nga espiritu kon ako duol kaniya, ug ako naghunahuna nga siya usa ka talagsaong lalaki.” Kon si Stein wala pa makadayeg kang Tor Lasse, siya dili andam maminaw kaniya sa dihang si Tor Lasse mibisita sa panimalay ni Stein uban sa espesyal nga pagdapit.

Kana nga pagdapit miabot sa tunga-tunga sa mga 1970, sa dihang ang programa sa seminary gipailaila sa Norway, ug si Tor Lasse ang gitawag nga unang magtutudlo sa seminary. Tungod siya 18 pa lamang ang panuigon niadtong panahona, si Tor Lasse gikuyawan og gamay nga magbuhat sa ingon ka dako nga responsibilidad. “Ako nag-ampo gayud kabahin niadto,” siya mihinumdom. Usa ka butang nga iyang nasayran nga sigurado mao ang pagtabang sa mga kabatan-onan nga anaa sa iyang dapit nga dili kaayo aktibo. Si Tor Lasse miingon, “Ako nakabati diha-diha dayon nga kinahanglan nakong bisitahon si Stein Arthur.”

“Akong ngalan siguro ang usa nga anaa sa listahan,” miingon si Stein. Apan para kang Tor Lasse, si Stein labaw pa kaysa sa ngalan nga anaa sa listahan. Si Tor Lasse nakahinumdon nga nakadayeg sa maayong panabut ni Stein ug sa iyang hilum ug determinadong kinaiya. Busa si Tor Lasse mihukom nga mobuhat og personal nga pagbisita sa pagdapit ni Stein nga mahimong kabahin sa bag-ong programa sa seminary.

Si Tor Lasse nanawag sa telepono daan ug nakig-istorya sa mga ginikanan ni Stein aron makasigurado nga anaa siya sa panimalay alang sa pagbisita. Aron makaabot sa panimalay ni Stein, si Tor Lasse kinahanglang mosakay og bus mga 35 ka mga minutos aron makaabut sa ferry. Dayon siya mosakay og 45-minutos sa ferry. Sa katapusan, siya kinahanglan nga molakaw og laing 30 ka minutos. “Ako naghunahuna gayud kanunay kalabut niini.” miingon si Stein. “Unsa ang gibuhat ni Tor Lasse mao gayud ang pagbuhat og mas labaw pa kaysa gikinahanglan.”

Silang duha klaro nga nakahinumdom gihapon sa espiritu nga ilang nabati niadto nga pagbisita mga 35 na ka mga tuig ang milabay. Samtang sila nanglingkod sa lawak kan-anan, si Stein naghunahuna sa tanang mga butang nga iyang giapilan. “Ako nabisi gayud sa football ug Scouting ug pagpatugtog sa trumpeta, ug ako nagbuhat sa tanang matang sa mga butang. Ako bisi gayud kaayo.”

“Si Tor Lasse mitan-aw kanako samtang siya naghisgot kabahin sa seminary, ug siya miingon, ‘Stein Arthur, imo bang buhaton nga magpalista alang sa programa sa seminary ug magsugod sa pagtuon sa mga kasulatan uban kanamo?’ Ako naglingkod duol sa fireplace, ug ako miingon og oo. Sa tanang saktong panghunahuna, mibalibad unta ako kaniya tungod kay ako wala nay panahon. Apan ako miingon og oo. Ug kadto ang misugod sa tanan nga butang.”

Ang “tanan nga butang” nahilakip sa pagmata og sayo sa buntag aron sa pagtuon sa mga kasulatan ug sa iyang mga leksyon sa seminary sa iyang kaugalingon sa balay. Dayon ang gamay nga grupo sa upat o lima ka mga estudyante magpundok matag semana. “Sa hinay-hinay ako misugod sa pagbati sa Espiritu niadtong mga sayo sa buntag, magbasa nga ako ra, ug mobangon sa matag buntag,” miingon si Stein. “Human sa pipila ka adlaw ako mibati nga adlaw dili mahimo sa ingon kon ako dili magtuon nianang buntaga. Ug ako nagsugod sa pagbaton og pagpamatuod nga bisan ako wala nasayud nga mao na kadto.”

Si Stein mipasabut nga “human sa pipila ka adlaw akong nasabtan kon unsa kadto nga mga pagbati. Ako mibati og maayo kabahin sa unsay akong nakat-onan, ug akong gibati ang Espiritu. Ako mibati nga kini sakto. Ug ako nasayud nga mao ang kini ang usa ka butang nga gusto nakong itukod ang akong kinabuhi.

Apan ngano nga si Stein misulti og oo bisan iyang gibati nga siya bisi kaayo? “Sa akong hunahuna ang Espiritu Santo miimpluwensya kanako,” siya miingon. “Andam na tingali ako sa laing paagi. Mao nga sa dihang si Tor Lass miduol nga may hugot nga pagtuo, siya miduol uban sa mas labaw pa kaysa gikinahanglan, ug ako andam nga modawat sa iyang pagdapit. Mao kana nga paagi nga ang Ginoo motrabaho.”

Mga usa ka tuig o kapin ang milabay, si Tor Lasse mihukom sa paglarga og misyon ug gitawag sa pag-alagad sa Norway. Atol nianang panahona si Stein mipadayon sa pagpalig-on sa iyang kaugalingong pagpamatuod sa ebanghelyo. “Sa dihang si Tor mibalik na gikan sa iyang misyon, kana mao gayud ang nakapasugod kanako sa paghunahuna nga magmisyon usab,” si Stein miingon. “Ako gayud nakahukom nga ako kinahanglang molarga tungod kay gusto ako nga moalagad sa Dios, ug ako naghunahuna nga kon ako dili molarga, ako unya kining mahayan sa tibuok nakong kinabuhi.”

Si Stein nakahinumdom nga human sa pagkig-istorya uban sa iyang mga lider sa priesthood kabahin sa paglarga og misyon, tungod sa iyang kalipay mora siya og naglutaw samtang naglakaw padulong sa balay. Sa wala pa siya mibiya sa iyang misyon (usab sa Norway), nahimamat ni Stein ang iyang umaabut nga asawa, nga si Hilde, sa usa ka komperensya sa mga kabatan-onan sa Oslo. Sila nagsinulatay sa usag-usa panahon sa iyang misyon, ug human sa iyang pagpauli, sila nagpakasal. Karon, sila adunay upat ka mga anak: duha ka anak nga mga lalaki, diin pareho silang gikasal sa templo, ug duha ka mas batan-ong nga mga anak nga babaye, kinsa sa pagkakaron anaa sa panimalay ug aktibo sa seminary.

“Kadtong gabhiona sa dihang si Tor Lasse mibisita sa among panimalay—kadto mao ang nakapausab sa akong tibuok kinabuhi,” miingon si Stein. Kadto nga pagbisita misugod kaniya sa pagtamak sa dalan nga midala kaniya sa pakigkita sa iyang asawa, mialagad og misyon, ug misugod og usa ka pamilya, uban sa hugot nga pagtuo sa ebanghelyo. “Ako nahimong branch president, district president, bishop—kining tanan tungod kay si Tor Lasse mibisita sa among panimalay ug ako misugod sa programa sa seminary.” Kining tanan tungod ni Tor Lasse kinsa andam nga nagbuhat og mas labaw pa kaysa gikinahanglan.

Ako Mipataas sa Akong Kamot

Unsa man ang imong buhaton kon ang imong magtutudlo sa eskwelahan magsugod og tudlo og mga butang kabahin sa Simbahan nga dili tinuod? Ang kinamanghurang anak nga babaye ni Stein Andersen, si Ida, miatubang niini nga sitwasyon. Ang magtudtudlo ni Ida nakasulti sa pipila ka mga higayon nga naghisgut sa mga Mormon, nagtudlo nga sila nagabuhat sa pagpakasal og daghang asawa. Tungod si Ida wala masayud unsa ang isulti niadtong panahona, wala siya mobuhat og bisan unsang butang. Apan sa diha nga ang magtutudlo misugod sa paghatag og sayop nga impormasyon kabahin sa Simbahan pag-usab, si Ida nasayud nga siya kinahanglang adunay buhaton.

“Ako mipataas sa akong kamot ug misulti kaniya nga ang iyang gisulti sayop,” miingon si Ida. “Ako miingon nga ako miyembro sa Ang Simbahan ni Jesukristo sa mga Santos sa Ulahing mga Adlaw. Ang akong magtutudlo mapinugsanon, miingon nga ang mga Mormon sa Utah adunay daghang mga asawa. Ako mipasabut kaniya nga adunay pipila ka mga grupo sa U.S. kinsa nagbuhat nga may daghang asawa apan kini nga mga grupo dili kauban sa Simbahan.

“Sa sunod adlaw kini nga magtutudlo mipahunong kanako sa hall ug miingon nga siya nakadayeg pag-ayo sa unsay akong gisulti. Siya nangayo og pasaylo sa pagsulti og sayop nga mga butang kabahin sa Simbahan. Siya miingon nga siya wala kaayoy nasayran kabahin sa Simbahan apan gusto nga masayud og mas daghan ug siya sigurado nga daghang mga estudyante sa akong klase kinsa ganahan usab nga makahibalo og mas daghan usab. Kana mao ang higayon nga siya mihangyo kanako sa pagbuhat og usa ka presentasyon kabahin sa Simbahan sa akong klase.

“Upat ka adlaw ang milabay ako mihatag og usa ka presentasyon sa akong klase. Ako nakulbaan kaayo. Ako wala pa makahisgot og daghan kabahin sa Simbahan sa eskwelahan, gawas lamang sa akong suod nga mga higala. Kadaghanan sa mga tawo sa akong klase nasayud nga ako miyembro sa Simbahan, apan mao lamang kadtong tanan ang ilang nahibaloan. Ako mihunahuna ug miampo og kadaghan kabahin sa unsa ang akong kinahanglang isulti. Gani ako nangayo og panalangin gikan sa akong amahan aron sa pagtabang kanako.

“Ang akong magtutudlo nagpahibalo sa klase nga ako maghisgut kabahin sa Simbahan. Sa dihang ako mibarug, ang tanan nahilum. Ako misugod, ug ang tanan nakong mga kauban sa eskwela misulat sa akong gisulti. Ako naghisgut mga 30 ka minutos. Ako naghisgut kabahin sa Simbahan karon, kabahin sa Pagpahiuli, sa plano sa kaluwasan, mga misyonaryo, ug mga sumbanan sa Simbahan. Dayon ang akong mga klasymet nangutana og daghan kaayo nga mga pangutana. Sa wala pa kini ako sa kanunay kulbaan kon ang mga tawo mangutana kanako kabahin sa Simbahan tungod kay ako wala masayud kon ako nasayud ba sa saktong mga tubag. Apan niining panahona ako wala kulbai, ug ako walay problema sa pagtubag sa mga pangutana.

“Ang akong mga klasmeyt nangatingala kaayo. Ang tanan miingon nga sila mapasirgabuhon kanako sa pagbarug unsa ang akong gituhoan.”

Paghulagway ni Gregg Thorkelson

Gilitratohan ni Paul VanDenBerghe

“Kadtong gabhiona sa dihang si Tor Lasse mibisita sa among panimalay—kadto mao ang nakapausab sa akong tibuok kinabuhi,” miingon si Stein.

Si Ida Andersen (sa tuo) uban sa iyang igsoong babaye, si Ane, ug ang iyang mga ginikanan, sila si Hilde ug Stein.