Pagtulun-an human sa usa ka Pagtulun-an

Santiago 1:5–6

Si Apostol Santiago mitudlo kanato sa mga yawe sa pagdawat og kaalam gikan sa Dios.

5 Kon hain kaninyo ang nagkulang sa kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud ug sa walay pagpamoyboy, ug kini ihatag ngadto kaniya.

6 Hinoon kinahanglan nga mangayo siya uban sa pagtoo, sa walay pagduha-duha. Kay siya nga nagaduhaduha, sama sa balud sa dagat nga ginahandus ug ginakosokoso sa hangin.

Pangutana sa Dios

Ang pagbasa niini nga bersikulo midala kang Joseph Smith sa pag-ampo ngadto sa Sagradong Kakahoyan, diin siya nakasinati sa Unang Panan-awon (tan-awa sa Joseph Smith—Kasaysayan 1:11–17). Aduna ka bay mahunahunaan nga mga ehemplo gikan sa imong pamilya o sa imong kaugalingong kasinatian diin ang usa ka tawo nga nangita og kahibalo nakadawat og tubag sa pag-ampo? Pagsulat mahitungod niini diha sa inyong journal.

Ihatag ngadto sa Tanang Katawahan

“Kini usa ka pribilehiyo sa mga anak sa Dios nga moduol sa Dios ug makadawat og pagpadayag. … Ang Dios walay pinalabi sa mga tawo; kitang tanan adunay susama nga mga kahigayonan.”

Si Propeta Joseph Smith, Mga Pagtulun-an sa mga Presidente sa Simbahan: Joseph Smith (Melchizedek Priesthood ug Relief Society nga kurso sa pagtuon, 2007), 132.

Sa madagayaon

Sa madagayaon—gawasnon, manggihatagon, makadaghanon.

Pagpamoyboy

Pagpamoyboy—mga pagpanaway, mga pagpangasaba, mga pagpanuyo. Sa laing nga pagkasulti, ang Dios motubag kanimo ug dili gayud masuko kanimo sa imong kinasingkasing nga pag-ampo ngadto Kaniya alang sa tubag sa usa ka pangutana.

Kini Ihatag Gayud

Ang Langitnong Amahan naminaw ug motubag sa inyong mga pag-ampo Ang Iyang tubag moabut sa Iyang kaugalingong panahon ug sa nagkalain-laing mga pamaagi—sama pananglit, sa mga kahimtang sa inyong kinabuhi, pinaagi sa mabinationg buhat ngadto sa uban, o pinaagi sa ligdong, hinay nga tingog sa Balaang Espiritu. Aniay pipila ka mga pamaagi nga ikaw makaandam sa pagdawat og giya pinaagi sa Espiritu (gikan sa “Pinadayag,” Matinud-anon sa Tinuhoan [2004], 154–59):

Pag-ampo alang sa giya.
Hatag og balaan nga pagtahud.
Pagmapainubsanon.
Paghupot sa mga sugo
Pag-ambit sa sakrament sa takus nga paagi
Pagtuon sa mga kasulatan kada adlaw.
Paggahin og panahon sa pagpamalandong
Kon magtinguha og piho nga giya, tun-i ang butang sa imong hunahuna.
Sa mapailubon nga paagi pagtinguha sa kabubut-on sa Dios.

Pangayo uban sa Hugot nga Pagtuo

“Si Propeta [Joseph Smith] miingon nga human sa pagbasa niining bersikulo siya nasayud sa kasiguroan nga siya kinahanglang mosulay sa katinuod sa pulong sa Dios ug mangutana Kaniya o tingali mopili nga magpabilin sa kangitngit hangtud sa kahangturan. … Siya nakabasa sa kasulatan, siya nakasabut sa kasulatan, siya misalig sa Dios ang iyang Mahangturong Amahan; ug karon siya miluhod ug miampo, nasayud nga ang Dios mohatag kaniya og panabut nga kinasingkasing gayud niyang gitinguha. Si Propeta Joseph Smith mitudlo kanato sa baruganan sa hugot nga pagtuo—pinaagi sa ehemplo.”

Presidente Thomas S. Monson, “Si Propeta Joseph Smith: Magtutudlo pinaagi sa Ehemplo,” Tambuli, Hunyo 1994, 5; Ensign, June 1994, 4.

Detalye gikan sa Igsoong Joseph, ni David Lindsley; gilitratohan ni David Newman