Dili Dugay nga Matulog aron Magtrabaho
Sa dihang miabut ang panahon nga mitapos na sa kolehiyo, akong nakita nga ang mga baruganan sa ebanghelyo mipanalangin sa akong kalibutanon—ingon man sa akong espirituhanon nga—kinabuhi.
Bisan sa dihang ako batan-ong babaye pa, kasagaran sa akong mga calling sa Simbahan may kalambigitan sa pagtudlo sa mga bata sa Primary, ug kini miimpluwensya sa akong desisyon nga mokuha og kurso sa elementary education. Apan ang pagpili sa major dili lamang mao ang paagi nga ang mga panudlo sa Simbahan nakaapekto sa akong edukasyon. Kana nahimong mas klaro kanako samtang ako nag-andam nga mogradwar.
Ang katapusang proyekto nga akong kinahanglang tapuson mao ang panghinapos nga pagsiksik gisulat sa papel [final paper] nga akong kinahanglang barugan sa oral exam atubangan sa tulo ka mga maghuhukom. Ang mga maghuhukom mao ang pipila sa mga magtutudlo kinsa nagtudlo sa akong mga klase.
Ang akong pagsisik gisulat sa papel mapanagan-ong nahuman, ako migahin og bahin sa akong panahon sa gabii una pa ang oral exam ngadto sa pamilya sa akong hinigugma. Sa dihang ako mipauli na, ang iyang mama miingon nga siya milaum nga ang tanan mamaayo ra ug mikutlo. “Kon kamo andam dili kamo mahadlok” (D&P 38:30).
Ang sunod adlaw miabut. Daghang mga panumdoman ang misulod sa akong hunahuna. Ako nakahinumdom giunsa nako paghukom nga mobiya sa siyudad asa ako midako aron sa pagpadayon sa akong edukasyon; ako nakahinumdom sa tanang mga sakripisyo nga gibuhat sa akong pamilya aron sa pagbayad sa eskwelahan. Ako dili makahimo sa pagpakyas kanila. Ang akong katapusang eksamin kinahanglan nga magmalampuson.
Ang akong mga klasmeyt nagpaabut usab aron sa pagkuha sa ilang mga eksamin. Kaming tanan nabalaka kabahin sa mga pangutana nga ipangutana sa mga maghuhukom, apan ako mibati nga may kasiguradohan tungod kay ako nag-ampo alang sa panabang ug ako nasayud nga ang Dios nasayud sa paningkamot nga akong gihimo aron sa paghan-ay, pagsiksik, ug pagsulat sa akong papel.
Ang akong turno miabut. Human og pasabot sa akong pagsiksik nga gisulat sa papel ngadto sa mga maghuhukom, ako misugod sa pagtubag sa mga pangutana. Human sa pipila ka mga pangutana kabahin sa hilisgutan nga akong gilangkub, usa sa mga maghuhukom nangutana, “Unsa kadako ang paningkamot nga imong gibuhat para niining papel?”
“Dako kaayo,” ako miingon. “Akong gihatag ang tanan nga anaa kanako tungod kay gusto nako nga kini mahimong may kabag-ohan.”
“Dugay nga matulog aron magtrabaho?”
“Dili, sa kasagran ako dili matulog og dugay aron magbuhat sa mga buluhaton sa eskwelahan,” siya miingon. “Akong han-ayon ang akong adlaw aron mahuman nako ang akong trabaho.”
Ang mga dagway sa mga maghuhukom klarong mipakita og pagkatingala. Ang sama nga maghuhukom mikomento, “Ako naglisud sa pagtuo nga imo gayud nga angkonon nga ikaw dili gayud dugay nga matulog. Kami nakahibalo nga ang imong mga klasmeyt dugay nga matulog, sulod sa daghang mga gabii.”
Usa sa mga maghuhukom miingon, “Tuguti ko sa pagsulti kaninyo kabahin niini nga estudyante. Siya adunay panahon para sa tanang butang. Ako makasulti niini tungod kay ako nakaila kaniya. Siya adunay panahon alang sa iyang mga pagtuon, mga higala, iyang pamilya, ug gani siya makatambong sa pagsimba.”
“Tinuod?” ang laing maghuhukom natingala pag-usab. “Unsa nga simbahan ka magtambongan?”
“Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw.”
“Ah, oo, ako nasayud unsa nga simbahan kana,” ang usa miingon.
“Ug kami gitudloan nga sayo nga matulog aron kami mapuno sa kalagsik sa sunod adlaw.”
Ako mibati og kakalma og luwas nga naghisgut kabahin sa ebanghelyo, bisan tuod og ako natingala nga pangutan-on kabahin sa relihiyon panahon sa propesyonal nga eksamin.
“Ang imong papel gisulat nga may dakong pagbati. Kini hilabihan ka maayo. Sa akong hunahuna nga kini usab tungod sa mga batasan nga gisilsil diha kanimo sa inyong simbahan.”
“Oo,” ako miingon. “Ako gitudloan sa simbahan unsaon sa pagtudlo sa mga bata, ug kini nakatabang gayud kanako sa akong kurso.”
“Ikaw nakahimo og labing maayo sama ka maayo sa isda nga milangoy sa dagat,” usa sa mga maghuhukom nga nagbinuang. “Kami naglaum nga ikaw dili mohunong sa pagtambong sa simbahan, tungod kay may dako ka nga utang kabubut-on sa mga mithi nga imong naangkon didto.”
Sa kaulahian ako gipagawas sa lawak aron ang mga maghuhukom makahimo sa ilang desisyon. Duha ka minuto ang milabay sila mipatawag kanako sa pagbalik.
“Dili lisud alang kanamo nga magkasinabut dayon. Tungod sa imong angayan nga sundon nga batasan, imong hilabihan ka tag-as nga mga grado, ug sa papel nga imong gibarugan karon, ang among hukom inuyunan sa tanan pabor sa imong paggradwar, nga honorable mention. Congratulations!”
Sa dihang akong gisulti-an ang akong pamilya, sila nakahilak sa kalipay.
Ako nagpamatuod nga sa dihang ang Langitnong Amahan misugo kanato sa “pagpahulay sa higdaanan og sayo, nga kamo dili kapuyon; bangon og sayo, nga ang inyong mga kalawasan ug ang inyong hunahuna mahimo nga malagsik” (D&P 88:124), Iya kining gisugo uban sa mga mata nga mopanalangin kanato. Ako mapasalamaton ngadto Kaniya sa pagtugot sa ebanghelyo nga modala og kalipay sa tanang bahin sa atong mga kinabuhi.
Paghulagway sa litrato ni Christina Smith