Sili Atu Nai lo le A
O ai le ituaiga toa na te le amanaiaina se tamaitiiti aulelei e fitu tausaga?
Sa nunumi upu i lo’u mafaufau ao ou taumafai malosi e mafaufau loloto i le Inferno a Dante. Sa ou pulato’a atu i le uati o loo i le potu malolo. Ua ta le 10:00 i le po. E i ai la’u suega i le taeao e faatatau i mataupu e valu o le Inferno lea ou te lei faitauina, e manaomia ona tusia sa’u otootoga mo la’u vasega Igilisi, ma sa i ai foi sa’u fonotaga i le ofisa o le seminare i le ta o le 6:00 i le taeao. Sa lata mai le taimi e tatau ai ona ou moe. Sa ou faitau pea:
O le alofa mama i le nuu moni
Ina ua tupu a’e i lo’u loto, o laulaau salalau
sa ou aoina, ma toe tuuina atu ia te ia, o le ua
fai atu nei lona leo i lona tautala.1
Sa iu lava ina mafai ona ou pueina mai le mafaufau loloto na ou manaomia ina ia ou sao mai i lenei po faaumiumi.
… I le gataaga la lea
Ua tatou o mai, lea e mai le taamilosaga lona tolu ma le lona lua
Ua vaeluaina, ma o le mea e tatau ona i ai le faamasinoga tonu ua faaalia ai
Fuafuaga e matautia le faaletonu.
“Malo, Shan,” o le tala lea a lo’u uso e fitu ona tausaga, o Shallen.
Sa memu atu la’u ia laitiiti ma le faamoemoe o le a alu ese o ia. O fea na gata ai la’u [faitau]? Hmmm … leaga … leaga … A!
… O mea la na muamua vaaia
Ua manino tele ona aliali mai, …
Na le mafai ona faasagatonu lo’u mafaufau. Sa ou lagonaina le mataituina e mata pepe o Shallen a’u gaoioiga uma. Na pei a’u o se pagota i lalo o le vaavaaiga totoa a lo’u uso laitiiti faaoso ita. Sa atili le fiafia o ona mata susulu lanumeamata ina ua vaai mai ua ou tilotilo atu ia te ia.
“Na ta’u mai e lo’u faiaoga ananei, o matou uma lava i le vasega lua o le a faia se aso mo o matou tagata totoa, ma o le a matou ofuina ni ofu e pei lava o o matou tagata totoa, ma fai atu se lipoti, ma o le a fiafia lea aso, ma a ta le malologa e taga lava ona ofu pea ofu o o matou tagata totoa i le aso atoa, ma matou …”
Na ou iloa afai e le taofia le tautala soo o lo’u uso laitiiti, o le a le uma lava ona faitau la’u mataupu, la’u otootoga taua, pe ou te vaai atu foi i se lipoti e ‘A’ uma mataupu.
Na tatau ona ou faia se mea [e taofi ai lona tautala soo]. Sa matua manaomia lona alu ese atu. Talosia o le le amanaiaina o ia o le a le fiafia ai, ma toe faamatala atu ai i se isi tagata o le aiga lana tala o le “aso o tagata totoa”.
Sa faasolo atu lo’u lima tusi i le mea sa gata ai la’u faitau i le Inferno:
… Ou te iloa o le mea e sosoo
O lo tatou taunuu i se laugatasi, ona e mai …
“Ma e tusi foi a matou ata o o matou tagata totoa ma …”
Aisea e le malamalama ai o ia o lea o le a ou ala i le po atoa i le faiga o la’u meaaoga? Na amata ona oso a’e lo’u ita, ua toeitiiti lava pa le puta lea ua amata ona tele a’e, ae taofi loa ma lana talanoa mai. Sa faateia a’u. Sa ou tilotilo pea i la’u tusi, ma lo’u faamoemoe o lea ua iu ina ia iloa lo’u le fia talanoa.
“Shan,” o lana musumusu mai lea i lona leo mama ma le malie.
Sa ou faataupupula pea i upu a Dante. Sa malolo o ia mo sina taimi. Sa ou ea ae ma ou iloa atu ai ua punou lona ulu i le faanoanoa ona o lo’u le faalogo atu. Sa amata ona ou lagona lo’u sese, ae sa atili ai ona ou pulato’a i itulau ua tauau ina le iloa atu.
“Shan, ou te manao e fai oe ma a’u tagata toa. E mafai ona ou ofu i lau toniga leoleo faaola mo le aso o tagata totoa?”
Sa ou tepa vave atu mai le tusi i le lauulu auro sa ufitia atoa ai foliga faanoanoa a lo’u uso laitiiti. Ou te lei moemiti lava o a’u o le tagata toa a Shallen—o se tagata toa e lei faaavanoaina sona taimi mo se tamaitiiti lalelei e fitu ona tausaga. Sa nutimomoia lo’u loto tausalaina i le maasiasi ina ua ou iloaina lo’u manatu faapito.
Sa tuu i lalo la’u peni ma faataatia ese le tusi. Sa ou tago atu uu le lima o si o’u soo itiiti ma taitai atu o ia i lo’u potu. Sa ou faaofuina o ia i lo’u ofutino matafi, faamaulu ma le pulou momi i lona ulu, ma faatautau i lona ua le faaili o loo tauolaola ai le igoa “Shanda”. Sa tilotilo mai o ia i luga ia te a’u ma faaali mai ni foliga ataata sili ona matagofie na faatoa ou vaai lea i ai. O lona alofa na faatalitonuina ai a’u e matua sili atu lava le taua o lo’u uso laitiiti nai lo soo se togi ou te mauaina.
Ata na tusia e Doug Fakkel
Na ou iloa afai e le taofia le tautala soo o lo’u uso laitiiti, o le a le uma lava ona faitau la’u mataupu, la’u otootoga taua, pe ou te vaai atu foi i se lipoti e ‘A’ uma mataupu. Na tatau ona ou faia se mea [e taofi ai lona tautala soo]. Sa matua manaomia lona alu ese atu.