O Le Sola Ese o Iasoni
“Ina mataala ia ma tatalo, nei oo mai le faaosoosoga ia te outou” (Mareko 14:38).
“ZZZZZ …” Sa taagulu pepelo ai Iasoni e valu ona tausaga, ona pa ai lea o lana ata. Ao taoto i lona moega, sa ia tosoina ae le palanikeke i luga o ona mata ma faafoliga o loo moe. I le isi itu o le potu pogisa, sa faapupuu ai lona uso e ono ona tausaga i lona aluga, ona mapuea umi lea ao lei amata foi ona ata o ia. “Shh!” Sa musumusu atu Iasoni ma toso ese le palanikeke mai lona ulu. “Ua tatau ona ta momoe!”
“O lea ua ou moe. O lea ua ou moe!” o le musumusu ane lea a lona uso ia te ia. Sa toe tōē le aualii, ma toso ae o la ieafu i lalo o o la auvae, moeiini mau o la mata, ma taooto faamalo ao la faatalitali.
I le potu e sosoo ai, o loo faatalitali ai foi lo la tuafafine, ma faafoliga o loo moe. I le isi itu o le faasologa potu, o loo faatalitali ai foi lo laua uso, ma faafoliga foi o loo moe. E oo lava i lo latou tina, na latou iloa, o loo taoto foi i lona potumoe pogisa, ma faapupuu i lalo o ieafu, ma faafoliga o loo moe o ia.
Sa o’ī laupapa o le fola i le auala pogisa i totonu o le fale. Sa i se mea latalata mai Tama. I soo se taimi lava o le a latou faalogoina ai se faailo. Sa faalologo ma le totoa Iasoni, toetoe lava a le manava ao taumafai po o fea le mea o loo tu ai Tama i lena lava taimi. E mautinoa lava o loo ua latalata mai o ia. Ua toe nei o se sekone …
“BEEEEEP!” Sa matua pa leotele mai le e ē na laulogo ai le fale atoa. Sa faapalasi i lalo Iasoni i le fola ma totolo agai atu i le faitotoa i ona lima ma ona tulivae.
“Alu, alu, alu!” o le ‘e’ē atu lea a lona uso, ma fetoai o la itu ma Iasoni. “Ua tatau ona tatou o i fafo!”
“Afi!” O le ‘e’ē lea a Iasoni, ao totolo atu i le auala i totonu o le fale. “Fafo uma tagata!”
“Fafo uma tagata!” O le valaau lea a Tina. “Ia faanounou!”
Sa faatasi mai Tama ia i latou i luga o le fola ao latou fetolofi atu i le auala i totonu o le fale, agai atu i le umukuka, ma o atu ai i fafo i le faitotoa o le pito i tua. Na i fafo loa, ona latou tutu loa lea i luga ma tamomoe agai atu i le laau tele.
“Ua tatou saogalemu?” O le fesili lea a Tama. “Ua iinei uma tagata?”
“Ua sao uma i tatou,” o le tala lea a Tina, ao faitau le aofai o tagata.
Sa vaai Tama i lana uati taofi. “O le tatou taimi sili lea ona lelei,” o lana tala lea. “Ia toe foi uma loa tagata uma e momoe—momoe mo’i loa.”
I le taeao na sosoo ai, ao faatasi le aiga mo le ti o le taeao, sa mafaufau Iasoni e uiga i le faataitaiga o le sosola ese mai se afi. “Ou te faafetai o loo i ai sa tatou fuafuaga mo le sosola ese mai se afi,” o lana tala lea. “Ou te lagona lo’u saogalemu i le i ai o se logo faailo i totonu o le tatou fale.”
“Faapena foi a’u,” o le tala lea a Tina. “O le i ai o se logo faailo e fesoasoani ia tatou saogalemu ai—pe afai lava tatou te gaoioi vave i le taimi lava e ‘e’ē ai.”
Sa faauma le ti a Iasoni. “E mafai ona ou alu i le fale o Brett?” na ia fesili mai ai. O Brett o le tuaoi o Iasoni ma o se tasi o ana uo lelei lava.
“Ioe,” o le tali lea a Tina. “Ia saogalemu ma maua se taimi fiafia.”
I le fale e sosoo ai, sa taaalo ai alii ia ma le maile a Brett, sa tamomoe i le va o paipa faapasī, ma fausia ni olo i fasilaau i le palapala. Ona fai ane lea o Brett la te o i totonu. “Ua ou vevela lava,” o lana tala lea. “Ta o ta te taaalo i taloga vitio.”
“Ua lelei,” o le malie atu lea a Iasoni. “E le iloa pe ou te malo nei ia oe.”
“E mafai ona ta taumafai e fai se isi taaloga fou,” o le tala lea a Brett ao la o i totonu o le fale. “Na e taalo muamua i le taaloga lea?” Sa ia uuina i luga le pusa o se taaloga e lei iloa e Iasoni.
“Pei lava e leai. E faape’ī?”
“O le a e vaai lava i ai,” o le tala lea a Brett, ma tuu lava le taaloga i totonu o le masini.
Sa tuu atu e Brett ia Iasoni le mea e faafoe ai le taaloga ma nofo loa i lalo i luma o le TV. Sa nofo ifo Iasoni i ona talaane. Ina ua amata le taaloga, sa ‘e’ē faafuasei se logo faailo i totonu o le mafaufau o Iasoni. O tagata i totonu o lenei taaloga e foliga mai o ni tagata moni lava, ma o lavalava sa latou ofuina—aemaise lava ofu o tamaitai—e lei ufiufia ai le tele o o latou tino. Sa le lelei lagona o Iasoni. Sa iloa e ia e tatau ona ia sola ese.
“E tatau ona ta taaalo i se isi taaloga vitio, pe ua tatau loa ona ou alu i le fale,” o le tala lea a Iasoni. “Ou te le o lagolelei i le auala o loo fai ai ofu o tagata ia.” Sa iloa e Iasoni e ono mafaufau lana uo e ese lava ia i lona fai atu i lena tala, ae sa ia iloa foi e tatau ona faalogo lelei i ona lagona.
“E le o se mea tele,” o le tala lea a Brett. “E mafai ona ta taalo i se isi taaloga.” Sa avane i fafo e Brett se taaloga e taututuu ai taavale. Sa leo lemu ifo le logo faailo i le mafaufau o Iasoni i le taimi na tatagi ai afi o taavale o le taaloga. Ia Iasoni, e leai se isi mea sa sili atu lona fia faalogo i ai.
Ata na tusia e Brandon Dorman
Afi!