O Se Oa Ua Leva Ona Leiloa

David R. Hanks, Arisona, ISA

I se taimi e lei leva atu, ao ou faatalitali mo le sauniga amata o le lotu perisitua, sa ta’u mai ai e la’u soa o faiaoga o aiga o loo i ai a’u tusitusiga paia i mea a le uarota e leiloloa ma toe maua.

Ina ua ou tilotilo atu i o’u autafa, sa ou vaai ai o loo ia te a’u lava la’u seti fou o tusitusiga paia, lea na tuuina mai e lo’u toalua. Ae o la’u seti tuai, sa i totonu o se ato i talaane o se nofoa i le potu i luma o le matou fale. Sa le mautonu lo’u mafaufau.

“O le a le mataitusi amata o lou igoa ogatotonu?” na fesili mai ai la’u soa.

“O le R,” o la’u tala lea.

“O le mea lena o loo i le igoa,” o lana tali mai lea. “O le a ou alu e aumai ia te oe.”

Sa foi mai o ia i se minute mulimuli ane ma tuuina mai ia te a’u se Tusi Paia o loo i ai lo’u igoa i ni mataitusi auro ua matafi. Sa vave lava ona ou matauina. Sa faigata ona ou tatalaina le sipi o le faavaa tuai uliuli. Sa matala le tusi i le itulau muamua, o loo i ai se faamatalaga na tusia i le tusitusi a lo’u tama. Sa ou uuina le Tusi Paia sa tuuina mai e o’u matua ia te a’u mo lo’u aso fanau i le sefululua o o’u tausaga.

Ua ou nofo nei i Arisona, ae o le taimi mulimuli na ou vaai ai i le Tusi Paia lenei, o le taimi o ou nofo i Iuta, o loo ou sauni mo se misiona. Sa ou alu ma ave la’u seti o tusitusiga paia sa faaaoga i le seminare i le misiona ae tuu le Tusi Paia lenei i le fale. Sa matua ou maofa i le mafai ona oo mai o la’u Tusi Paia tuai lenei mai le fale o o’u matua i Iuta i le falesa o le matou uarota i Arisona i se vaitaimi e tusa ma le 30 tausaga.

O lo’u tama, o se tagata suesue i tusitusiga paia, sa totoina ia te a’u ao ou laitiiti lava se naunautaiga e faitau ma suesue i afioga a le Atua. O se vaega o le faamatalaga sa ia tusia i la’u Tusi Paia sa fautuaina ai a’u e pei o se upu tomua i lo’u mauaina o le Perisitua Arona:

“Tavita, i lou aso fanau lenei e atoa i ai lou sefululua, o le a e maua ai le Perisitua Arona o se tiakono ma avea ai oe o se auauna a le Alii, e pei lava o le ua faaigoa ai oe, o le tupu o Tavita. Ao ia faia amioga faautauta, sa faamanuiaina o ia e le Alii.

“Ia faapena foi ia te oe. Afai o le a e tautaia ma le faautauta oe lava i au amio ma mulimuli i le Alii, o le a Ia faamanuiaina oe ma valaauina oe e auauna ia te Ia.

“Ia e malosi ma faamaoni, Atalii. Suesue ma le filiga i lenei tusi, ma o le a e maua ai le malosi.”

O loo matua taua upu a lo’u tama ia te a’u i le taimi nei e pei ona sa i ai i le 30 tausaga ua mavae, ma atonu ua sili atu lava i le taimi lenei. Oka lo’u faafetai ina ua ou toe mauaina le meaalofa o la’u uluai Tusi Paia o loo i ai pea le fautuaga e le masuia a lo’u tama.