Te mau haamaitairaa o te Evanelia e roaa no te taatoaraa

Elder Joseph W. Sitati

No te Hitu Ahuru

Ua roaa i te mau tamarii a te Atua i ni‘a i te fenua nei i teie mahana te rave‘a e ite ai ratou i Ta’na faanahonahoraa no te oaoa no ratou, hau atu i te maramarama i te tahi atu anotau.

Tau hepetoma i ma‘iri a‘e nei, ua ti‘a maua o Elder Melvin Perkins, tei riro ei hitu ahuru area e tavini ra i Alaska, e i te terono i mua i te amuiraa no te Tĭtĭ no Vancouver British Colombia i Canada. Ma te reo otooto, ua ani oia i te feia mo‘a ia hi‘o mai i te hoho‘a i mua ia ratou. Hoê huaai no te mau pionie o te pereoo huti rima momoni e hoê taata faafariu-matamua-hia no te Ekalesia no te fenua atea no Afirita, teie e tavini apipiti nei i te Fatu.

Mai te hoê omuaraa ha‘iha‘i roa i Faiete Niu Iota, 180 matahiti i mutaa iho ra, ua riro te Ekalesia a Iesu Mesia i te Feia Mo‘a i te mau Mahana Hopea nei ei faaroo na te ao atoa nei. Te ti‘a nei au i ônei ei ite no teie ohipa umerehia. Te pure nei au ia parahi mai te Varua o te Fatu i roto ia outou e ia‘u atoa a vauvau atu ai au i te tahi mau mana‘o i teie avatea.

Te mauruuru nei au no te mau taviri o te heheuraa i roto i teie tau tuuraa evanelia hopea. Na roto i to te mau peropheta ora faaohiparaa i taua mau taviri ra mai te taime a faaho‘ihia mai ai, ua roaa i te mau tamarii a te Atua i ni‘a i te fenua nei i teie mahana te rave‘a e ite ai ratou i Ta’na faanahonahoraa no te oaoa no ratou, hau atu i te maramarama i te tahi atu huru anotau.

Ua ite-papû-hia te here o to tatou Metua i te Ao ra i te mea e, ua ti‘a i te mau taata ora e tei pohe atoa no te mau fenua atoa, i teie nei e amuri a‘e, ia farii i te faateiteiraa i mua i To’na aro ia au i to ratou ti‘amâraa ta ratou i faaohipa. Hoê faito to te ture e te haamaitairaa no te mau taata atoa. Ua haapapû faahou mai te Atua e, aita Oia e hi‘o i te huru o te taata.

Ua parare te evanelia na te ao nei ia au i te hoê hoho‘a e haapapû ra i te mau opuaraa a te Atua ia faatupu i te tahuti ore e te ora mure ore o te taata nei.

I muri a‘e i te hi‘araa, ua rave to tatou na metua matamua, o Adamu e o Eva, i te hoê fafauraa mure ore e te Atua no to raua faaoraraa.¹ Ia fanau a‘e ra te mau tamarii a Adamu, tupu maira e piti pŭpŭ.

Hoê pŭpŭ arata‘ihia e Enoha, no to ratou haapa‘o maitai i te reira fafauraa aita a‘e ra e ti‘a ia tape‘a noa ia ratou i ni‘a i te fenua nei. No reira, ua haaputuputu a‘e ra te Fatu ia ratou i roto Ia’na iho.²

Te piti o te pŭpŭ ua fati ratou i roto i te ino rahi no reira, ua mauiui ratou i roto i te haavaraa a te Atua. Ua horomiihia ratou e te diluvi, toe noa mai nei te utuafare o Noa,³ e huaai parau ti‘a no Enoha.⁴

Ua tuu a‘e ra te Atua i te fafauraa ia Noa, ma te fafau mai e, eita e diluvi-faahou-hia te ora i ni‘a i te fenua nei.⁵

A tupu faahou ai te utuafare o Noa i te rahi, e rave rahi tei topa i roto i te ino. No to ratou aau te‘ote‘o, ua patu ratou i te patu o Babela. Ua vaiiho te Atua i te haavaraa o te ra‘i ia topa i ni‘a ia ratou. Ua ano‘ihia to ratou reo e ua haapurarahia ratou na te mau fenua atoa. Te tahi noa pae tei faahereherehia no to ratou haapa‘o.⁶

I rotopu i te feia tei faahereherehia te vai ra te taea‘e o Iareda, e taata faaroo rahi, ua taparu oia i te Fatu no te Ati Iareda parau ti‘a. Ua arata‘i te Fatu ia ratou i te fenua Amerika ma te fafau atu ia ratou e, mai te mea e, e tavini ratou Ia’na, « e ti‘amâ ïa ratou i te tape‘araa e i te tîtîraa, e i te mau hau atoa i raro a‘e i te ra‘i ».⁷ Ua arata‘i-atoa-hia te ati Nephi i taua fenua ra i muri a‘e. I te hopea ra, ua haamouhia te ati Iareda e te ati Nephi, i te mea e, aita ratou i faaite i te haapa‘o.

Te tahi atoa taata faaroo rahi tei faahereherehia, o Aberahama ïa, e huaai no Noa, tei arata‘ihia i Kanaana. Ua tuu te Atua i te fafauraa ia Aberahama, ma te fafau e, e rahi to’na huaai mai te mau feti‘a o te ra‘i ra⁸ e na roto i to’na ra huaai, « e maitai te mau fenua atoa o te ao nei ».⁹ Te mau fenua e parauhia nei i roto i teie fafauraa o te mau huaai ïa o Noa tei haapurarahia i te tau o te patu o Babela, e tei parau-atoa-hia te mau etene.

Ua faahiti faahou mai te Atua i te reira fafauraa i te tamaiti a Aberahama ra, o Isaaka, e i te mootua ra, o Iakoba, tei riro mai o Iseraela.

E no te mea aita te huaai o Iseraela i tape‘a maite i te mau titauraa o te fafauraa, ua tauihia a‘e ra te reira i te tau tuuraa o Mose ra. Ua tuuhia maira te hoê fafauraa na‘ina‘i iho e ua vai noa te reira i rotopu i te mau tamarii a Iseraela e tae roa’tu i te taime a faaho‘i faahou mai ai te Mesia i te îraa o te evanelia i to’na ra tau i te tahuti nei.¹⁰

I muri a‘e i To’na ti‘a-faahou-raa, ua faaite maira te Faaora e, ua tae i te taime e hopoihia ai te evanelia i te mau etene ra.¹¹ Na mua a‘e, i roto i te parabole o te mau rave ohipa o te ovine, ua heheu mai Oia e, e farereihia e e anihia te mau etene te tahi i muri iho i te tahi. Tera râ, hoê â huru te faito o te haamaitairaa taa ê noa’tu te ana‘iraa o te aniraa.¹²

I muri a‘e i te pa‘umaraa o te Faaora, ua mau te aposetolo peresideni Petero, hoê huaai no Iseraela, i te mau taviri o te autahu‘araa na roto ho‘i i reira i horo‘a ai oia i te arata‘iraa i te Ekalesia. E mea maramarama maitai e, noa’tu e ua horo‘a te Faaora i te parau faati‘a, ua bapetizo o Petero i te etene matamua, o Korenelio, i muri a‘e i to’na fariiraa i te heheuraa taa ê no te rave i te reira.¹³

Ua hope te misioni i rotopu i te etene na roto i te pohe maratiri o Petero¹⁴ e na roto i te pohe o te tahi atu mau aposetolo i muri a‘e i reira, iriti-ê-hia’tu ai te mau taviri o te autahu‘araa i te fenua nei. Tae mai nei te tau roa o te taivaraa.

Na Petero, Iakobo e o Ioane te mau aposetolo i mutaa iho ra, i faaho‘i mai i te mau taviri i te matahiti 1829 i ni‘a ia Iosepha Semita, hou a faati‘ahia ai te Ekalesia. Ua tae faahou mai te îraa o te evanelia i ni‘a i te fenua nei, e ua haamata i te parare i roto i te mau nunaa etene atoa ei fafauraa apî e te mure ore ho‘i.

Na roto i te peropheta Iosepha Semita, ua heheu mai te Fatu e, i roto i te mau mea e titauhia no te faataa e ahea tera e tera nunaa etene e titauhia ai, te vai ra ïa te ti‘araa no te faaamu i te basileia o te Atua i te pae varua e i te pae tino mai tei faati‘ahia i ni‘a i te fenua nei no te taime hopea roa.¹⁵

Te ite nei tatou e, i te haamataraa i te faati‘a-raa-hia te Ekalesia tei faaho‘ihia mai i ni‘a i te fenua nei, ua imi e ua haapa‘o te mau peropheta i te hinaaro o te Atua no ni‘a i te huru e porohia ai te evanelia i roto i te mau fenua.

Ua ora mai au no te ite i te anotau i tohuhia e te peropheta Zenoka i roto i te parabole o te tumu olive, i reira ho‘i te feia parau ti‘a no roto mai i te mau nunaa atoa o te fenua nei e riro ai ei feia no te fafauraa a te Atua e o Iseraela.¹⁶

Ua ite au i te hotu maitai o te evanelia i te oteoraa i roto i to‘u fenua ai‘a o Afirita. E 30 noa matahiti i muri mai, ua tae‘ahia e 300,000 feia mo‘a. E rave rahi te taata tei itehia ia ratou te niu papû no to ratou faaroo i roto i te mau parau haapiiraa e te mau parau tumu o te evanelia i faaho‘ihia mai. Ua faaru‘e te mau utuafare i to ratou mau fenua faaapu no te haere e imi i te hoê oraraa maitai a‘e i roto i te mau oire, e ua itehia ia ratou te hoê rave‘a apî ia mau papû i te mau peu paari o te utuafare tei riro maru noa ei tao‘a aroraa i teie tau apî. Te rave puai nei te Varua o te Atua i rotopu i te nunaa.

Te hotu nei te hoê peu tiretiera apî i roto i te mau utuafare, faaamuhia i te haapa‘o i te a‘o a te peropheta ora ia pure e ia tai‘o i te mau papa‘iraa mo‘a i te mau mahana atoa e ia putuputu te utuafare hoê taime i te hepetoma i roto i te pô utuafare. Na roto i te reira, ua ti‘amâ te mau taata e rave rahi i te mau ruuruuraa o te mau peu tupuna tei faaiti i te faaohiparaa i to ratou ti‘amâraa.

Na roto i to‘u iho iteraa, e toru o ta maua mau tamarii no faaipoipo-noa-hia a‘e nei i roto i te hiero ma te hopoi‘a teimaha ore o te pûpûraa tao‘a, te hoê teie peu tupuna o te tura‘i nei e rave rahi feia apî tamaroa e te tamahine ia ora apitipiti noa ma te haamau ore i te fafauraa te tahi e te tahi. Ua riro te faaipoiporaa hiero i roto i na hiero e toru tei faati‘ahia i Accra Ghana, Aba Nigeria, e Johannesburg i Afirita apatoa, ei tautururaa ia faatupu i te ti‘aturiraa i roto i te huru mo‘a o te faaipoiporaa.

Te faaite papû nei au i te Faaora o Iesu Mesia na roto ho‘i ia’na i roaa ai ia tatou te evanelia e te fafauraa o te faateiteiraa. Te faaite papû nei au i te peropheta ora, Thomas S. Monson, na roto ho‘i ia’na e farii papû ai tatou i te arata‘iraa a te Faaora no te tamau maite i te faaite i te faaoraraa i te mau taata atoa. Na roto i te i‘oa o Iesu Mesia ra, amene.