Mau parau opaniraa
Mai te mea e haapa‘o tatou i ta’na mau parau e e haapa‘o tatou i te mau faaueraa, e ora ïa tatou i roto i teie tau o te peu farii noa e te ohipa ino.
Te oaoa nei to‘u aau i teie taime no te faaotiraa i ta tatou amuiraa. Ua haapii-hohonu-hia tatou e ua faateiteihia na roto i to tatou faarooraa i te mau parau poro‘i tei vauvauhia mai i mua ia tatou e te mau iteraa papû tei faaitehia. Te faatae atu nei matou i te mauruuru i te mau taata tata‘itahi tei amui mai, e tae roa’tu i te mau taea‘e tei pûpû i te mau pure.
Ua mea nehenehe mau te mau himene. Te faatae atu nei au i to‘u tapa‘o haamauruururaa i te feia tei faaite i to ratou taleni, o tei haaputapû e o tei faaitoito ia tatou. Na te pehe nehenehe ta ratou e himene mai e haamaitai te mau putuputuraa tata‘i tahi o te amuiraa.
Te faahaamana‘o atu nei matou ia outou e, te mau parau poro‘i ta tatou i faaroo a‘e nei i roto i teie amuiraa, e nene‘ihia ïa i roto i te ve‘a Ensign e te Liahona no novema. Mai te mea e, e tai‘o tatou e e imi maite i te reira, e haapii e e faauru-faahou-hia ïa tatou. E mata na tatou i te tuu i roto i to tatou oraraa i te mau mahana atoa i te mau parau mau e vaira i roto i teie mau ve‘a.
No te mau taea‘e tei haamauruuruhia i roto i teie amuiraa, te faatae atu nei matou i to matou tapa‘o mauruuru rahi. Ua tavini maitai ratou e ua tauturu papû ratou i te ohipa a te Fatu. Ua horo‘a hope roa ratou i to ratou taime. Te haamauruuru atu nei matou ia ratou ma to matou aau atoa.
Te ora nei tatou i te hoê tau e rave rahi i te ao nei o te faaru‘e nei i te vahi papû tei iteahia na roto i te haapa‘oraa i te mau faaueraa. E tau teie no te farii noa, e tau no te tau‘a-ore-raa e te ofatiraa i te mau ture a te Atua. E mea pinepine tatou i te au i ni‘a i te opape, e i te tahi taime, mai te mea ra e, o tatou te hee ra i roto i te opape.
Ua haamana‘o vau i te mau parau a te Fatu te itehia i roto i te Buka a Etera i roto i te Buka a Moromona. Na ô a‘era te Fatu: « Aita e au ia haere outou i tera pae mai o taua moana rahi nei, maori râ e paruru vau ia outou i te mau are o te miti ra, e te mau mata‘i i reva’tu na, e te mau pape pue te haere maira ».1 E au mau taea‘e e au mau tuahine, ua faaineine Oia ia tatou. Mai te mea e haapa‘o tatou i ta’na mau parau e e haapa‘o tatou i te mau faaueraa, e ora ïa tatou i roto i teie tau o te peu farii noa e te ohipa ino – e tau o te nehenehe e faaauhia i te mau are miti e i te mau mata‘i e i te pape pue o te haamou. Ua ite mau Oia e te vai nei tatou. Ua here Oia ia tatou e e haamaitai oia ia tatou mai te mea e, e rave tatou i te ohipa ti‘a.
Te oaoa nei tatou i te mea e, ua matara te mau ra‘i, i te mea e, ua faaho‘ihia mai te evanelia, e ua niuhia te Ekalesia i ni‘a i te papa o te heheuraa. E nunaa haamaitaihia tatou, e aposetolo e peropheta to tatou i ni‘a i te fenua nei i teie mahana.
I teie nei, a faaru‘e ai tatou i teie amuiraa, te ti‘aoro nei au i te mau haamaitairaa o te ra‘i i ni‘a ia outou tata‘itahi. A ho‘i ana‘e ma te hau i to outou mau ti‘ahapa. A feruri maite ai outou i te mau mea ta outou i faaroo i roto i teie amuiraa, e mata na outou i te parau, mai te nunaa o te Arii Beniamina tei piihua ma te reo hoê, « ua faaroo matou i te parau atoa ta oe i parau mai ia matou; e ua ite ho‘i matou e, e parau mau te reira, na roto i te Varua o te Fatu puai hope tei faahuru ê ia matou, oia ho‘i to matou aau, i ore ai matou i hinaaro ai i te rave i te ino, ia rave râ i te maitai ma te faaea ore ».2 E ti‘a anei i te mau tane e te mau vahine atoa, te tamaiti e te tamahine, ia faaru‘e mai i teie amuiraa ei taata maitai a‘e i te taata e piti mahana i ma‘iri a‘e nei.
Ua here au ia outou e au mau taea‘e e au mau tuahine. Te pure nei au no outou. Te ani faahou nei au ia haamana‘o outou ia‘u e i te mau Hui Mana Faatere Rahi taatoa i roto i ta outou mau pure. Ua hoê matou ia outou no te faahaere i teie ohipa umerehia i mua, te faaite papû atu nei au ia outou e, tei roto tatou paatoa, e e tuhaa ta te tane, te vahine e te tamarii i roto i te reira. Ia horo‘a mai te Atua ia tatou nei i te puai e te aravihi e te hinaaro tuutuu ore ia rave maitai tatou i ta tatou tuhaa.
Te faaite atu nei au i to‘u iteraa papû ia outou e, e parau mau teie ohipa, te ora nei to tatou Faaora, e te arata‘i nei e te faatere nei Oia i Ta’na Ekalesia i ni‘a i te fenua nei. Te vaiiho atu nei au i to‘u faaiteraa e to‘u iteraa papû e, te ora nei te Atua te Metua Mure ore e ua here Oia ia tatou. Oia to tatou Metua, e e taata oia e te vai mau nei.
Ia haamaitai mai te Atua ia outou. Ia vai mai To’na hau i fafauhia mai ia outou na i teie nei e a muri noa’tu.
Te aroha’tu nei au ia outou e tae roa’tu i te taime e farerei faahou ai tatou i roto e ono ava‘e i muri nei. Na roto i te i‘oa o Iesu Mesia, to tatou Faaora here e te Taraehara, e to tatou arai i mua i te Metua, amene.