Tautururaa i te Ati

Ua tairi te Miti Faaî i te mau motu no Patifita

Te tauturu nei te mau melo o te Ekalesia i te mau taata e i te tahi e te tahi no te tama, i muri a’e i te aueueraa fenua i te faito puai e 8.0 tei faatupu i te miti faaî i Patifita Apatoa i te 29 no setepa 2009.

E 180 taata tei pohe i roto i teie aueueraa fenua e te miti faaî, e e rave rahi hanere taata tei mo’e e aore ra, tei pépé, e rave rahi fare tei mou. Ua papû e, 140 tei pohe i Hamoa, hau i te 30 i Hamoa Marite e e 9 i Tonga. I roto i te feia i pohe, e 26 e melo ïa no te Ekalesia – e 22 i Hamoa e e 4 i Hamoa Marite.

Ua tauturu te feia faatere o te autahu’araa i te mau mea i hinaarohia, mai te opereraa i te maa, te pape e te mau mea no te rapaau. Ua rave atoa te feia faatere o te Ekalesia i te ohipa i piha’i iho i te feia faatere no te hau e i te mau pupu tauturu no te faanaho i te mau rave’a tauturu. Ua tauturu te Ekalesia i te faanahoraa i te mau rave’a tauturu i faataehia mai na Roto Miti mai i te 6 no atopa.

Ua tupu te mata’i rorofa’i i Philipino e i Vietnam

Ua tiatia te mau melo o te Ekalesia i ni’a no te tauturu i muri a’e i te mata’i rorofa’i Ketsana tei tupu i ni’a i te fenua Philipino e o Asia Apatoa hitia o te râ, e ua hau i te 300 taata tei pohe i te ava’e setepa e atopa 2009

Na roto i taua vero ra, ua tupu te heeraa fenua i Philipino, e ua tae’ahia e afa milioni taata tei faaatea ê. Ua hau i te 560000 taata tei arata’ihia i roto e 600 puhaparaa. Ua pohe e 275 taata, i roto i te reira, 12 o ratou e melo no te Ekalesia. 14 tei mo’e. E 44 fare o te mau melo tei parari i te vai pu’e, e e 223 tei ino rii. E 25 fare pureraa tei ati i roto i te pape pu’e, e e 25 tei faaohipahia no te puhaparaa no te hoê taime.

I Vietnam, ua taparahi pohe te mata’i rorofa’i hau atu i te 40 taata na roto i te pape pu’e e te heeraa fenua. Ua tae’ahia e 200000 taata tei faaateahia i rapae i te mau fenua ropu hou a tupu mai ai te vero. Aita te mau melo o te Ekalesia e te mau misionare i roohia i te ati.

I te hepetoma i muri iho, ua tairi te mata’i rorofa’i Parma i te mau tuhaa apatoerau no Philipino, e ua taparahi fatata 160 taata.

E rave rahi aueueraa fenua i tairi ia Inidonesia

Ua tairi te hoê aueueraa fenua i te puai e 7.6 i te atearaa e 30 maire (50km) i rapae i te motu no Inidonesia i Sumatra i te 30 no setepa 2009. Ua tairi faahou mai te piti o te aueueraa, i te puai e 608, i taua mau vahi ra, i te mahana i muri iho.

Ua tae’ahia e 1100 taata tei pohe, e e rave rahi hanere tei pépé, e rave rahi tei perehihia i te mau fare e te repo. Ua haamou teie aueueraa i te mau fare ma’i, te mau fare haapiiraa, te mau fare toa rarahi, te mau araturu e te mau purumu. Ua mutu te mau niuniu uira e te heeraa fenua.

Aita te mau melo o te Ekalesia i roohia i te ati, aita atoa te mau fare o te Ekalesia i fifi; tei te atearaa e 500 maire (800km) te orio o te aueueraa i te mau melo.