Taviniraa i roto i te Ekalesia
« Ua Haamaitai Teie nei mau Mea atoa Ia’u »
Mai te mea e Mahana Maa, e ite ïa outou ia Elvira Guagliarello e ohipa ra i roto i te fare tutu no to’na fare i Puerto Madryn, i te pae tatatahi no te Ooa Nuevo no te fenua Ra-Parata i te mataeinaa apatoa no Chubut.
E faito oia i te faraoa ota e te pape e i muri iho e tii oia i te tahi atu mau maa. Aita oia e faarahi i te parau ia rave oia i te ohipa, e mea puai a‘e ta’na mau ohipa i ta’na mau parau. Te rave nei hoi oia i te ohipa a te Fatu.
« E mea maitai au no te mea te ite nei au e te rave nei au i te tahi mea maitai », te parau ïa a te Tuahine Guagliarello a faarapu ai oia i te mau maa. Te mana‘o nei oia i te Faaora a rave ai oia i te ohipa, te oaoa nei oia ma te mana‘o e e tauturu ïa te hotu no ta’na taviniraa i te tahi atu mau melo no te Ekalesia ia haamana‘o Ia’na.
Te oaoa nei te Tuahine Guagliarello, e 82 matahiti, i te taviniraa ei tuahine hahaere, te arata‘i nei oia i te himene i roto i ta’na paroita e te hamani nei oia i te faraoa no te oro‘a, te hoê piiraa ta’na i faananea e fatata 10 matahiti i teie nei. E faaineine oia i te hoê tapu faraoa na’na iho i te omuaraa o te hebedoma area râ i te Mahana Maa e faataa ïa oia i te taime no te hamani i te faraoa « na te Ekalesia noa iho », i ta’na parauraa. « E parau vau ia’u iho, « e ti‘a ia’u ia hamani i te faraoa, e e ti‘a ia’u ia haere i te pureraa.‘Aita vau e hinaaro i te manuïa ore ».
Mai te mea aita oia e ma‘ihia, e haere atoa oia i te hiero – ma te rave i te hoê tere matahiti na ni‘a i te pereoo uta taata e 20 hora te maoro i te Hiero no Buenos Aires Ra-Parata.
Te parau nei to’na episekopo, Jesús Santos Gumiel « E oaoa noa te Tuahine Guagliarello i te tavini i roto i te mau rave‘a atoa e nehenehe ia’na ». « Ua ite te mau melo e e nehenehe ta ratou e ti‘aturi ia’na. Noa’tu to’na faito matahiti, e mea itoito oia i te faaineineraa i te faraoa i te mau Mahana Maa atoa e i te haereraa mai i te pureraa i te mau Sabati atoa. « E hi‘oraa maitai oia ».
Ua farerei te Tuahine Guagliarello i te mau misionare rave tamau i te matahiti 1962 i Mar Del Plate, i te pae apatoa no Buenos Aires, a rave ai oia i te ohipa i te hoê fare fariiraa taata i reira ratou i te faaearaa. I to’na iteraa ia ratou i te patotoraa i ni‘a i te mau opani fare 15 matahiti i muri mai, i muri a‘e i to’na haereraa’tu e faaea i Puerto Madryn, ua farii oia i te mau haapiiraa, ua bapetizohia e ua haamata i te hoê oraraa taviniraa i roto i te Ekalesia.
I teie nei mahana o ona ana‘e to’na oraraa, aita râ oia e mana‘o nei e te faaea otare noa ra oia. Te vai nei ta’na mau papa‘iraa mo‘a e to’na utuafare paroita, e te paraparau pinepine nei oia i to’na Metua i te Ao ra na roto i te pure. Taa ê noa’tu i te reira, te oaoa nei oia i te hoaraa o te Varua, ta te Fatu i fafau i te feia o te tavini Ia’na na roto i te taviniraa ia vetahi ê.1
Ua parau te Tuahine Guagliarello ma te ataata « Ua haamaitai teie nei mau mea atoa Ia’u » « Te faaohipa nei te Ekalesia ia tatou, e na te reira e faaoaoa ia’u. Ua ite noa na vau i te oaoa i roto i te taviniraa i to tatou Metua i te Ao ra ».
Elvira Guagliarello
I ni‘a : hoho‘a na Michael R. Morris