Ta’u mau Puaa-horo-fenua Na‘ina‘i tei Nirahia i ni‘a i te Ahu
Sandra Jennings, New Mexico, Fenua Marite
Te vai nei ta’u hoê hoho‘a o na puaa-horo-fenua na‘ina‘i e piti ta’u i nira fatata hoê matahiti i teie nei. Ua fatata te reira i te oti a ite ai au e ua hape au i roto i te hoê peni o te hoê o te mau puaa-horo-fenua na‘ina‘i. No te mea hoi e peni e nehenehe e huna i ni‘a i te hoê puaa-horo-fenua aita vau i ite i ta’u hape e tae noa’tu i te taime a ite ai au e aita te peni no te puaa-horo-fenua e tu‘ati ra i te tahi atu mau peni i ni‘a i te ahu.
Ua rahi roa to’u oto. Ua haa mai au i te taatoaraa o to’u taime i ni‘a i te hoho‘a, e ua rahi roa te oto i te mana‘oraa i te tataratara i te mau taura no te peni tei hape. Ma te roimata i to’u nei mata, ua tatara vau i te afata pehu e ua ta’ue au i te hoho‘a i roto.
Ua parahi au i te amuraa maa i reira hoi au e vaiiho ai i ta’u mau tauhaa niraraa no te heva i te mau‘araa o ta’u hoho‘a no te mau puaa-horo-fenua na‘ina‘i nehenehe e ua rave atu vau i te tahi atu mau ohipa. Aita râ i nehenehe ia’u ia na reira, aita i nehenehe ia’u ia vaiiho noa i taua ohipa ta’u i ha’a puai. Ua tatara vau i te vairaa pehu e ua tatara mai i te ahu. Ua ite au i te hoê pona i muri mai i te huru peni hape e ua tatara mărû noa mai au i te reira. Ua huri au i te hoho‘a, e ua haamata vau i te tataratara.
I te tahi mau taime e tere vitiviti te tataratararaa. I te tahi atu mau taime ua ite au e e ere roa i te mea ohie. Aita vau i papû nahea i te tataratara i te mea ta’u i nira. I te tahi mau taime ua ti‘a ia’u ia tapû i te hoê taura hoê pu‘oiraa i te taime hoê. Ua parau mai ta’u tamaiti e ua faahiahia oia i te mea e rave faahou vau i taua ohipa rahi ra no te faaafaro i te reira. E hoho‘a nira-noa-hia hoi te reira.
A tatara ai au i te taura, ua haamata vau i te feruri i te parau no te tatarahaparaa e te huru fifi no te faatiti‘aifaroraa i te tahi o te mau hape ta’u i rave. Te titau nei te tatarahaparaa mau i te hinaaro puai, te ohipa e te mauiui, tera râ e hoonahia te tutavaraa.
A nira faahou ai au i te puaa-horo-fenua ua haamana‘o vau e ua faati‘a te tatarahapa i te Taraehara a Iesu i te iriti ê i te tafetafeta o te hara i roto i to’u oraraa e i te tauturu ia’u ia haamata apî. Te tarere nei ta’u « mau puaa-horo-fenua no te tatarahapa » i roto i tou’ nei fare, te hoê faahaamana‘oraa mărû e te ora ia rave i te mea ti‘a, eiaha roa e faaru‘e ia hape ana‘e au, e ia haamana‘o e na roto i te tatarahapa e mono ïa te Taraehara i te mea e toe ra.