Ta Niya Ma‘itiraa
Te ha’uti ra o Niya i mua i to’na ra fare a pii ai to’na metua vahine fetii ia’na ia haere mai i roto i te fare. « E Niya, e haere anei oe i te fare toa a te taata hoo pota e hoo mai i te tahi carottes no te tamaaraa no teie pô ? » ani a‘e ra to’na metua vahine fetii.
« E ! ». Parau mai ra Niya ma te oaoa. Mea au na’na ia haere i te fare toa e mea au roa na’na ia tauturu i to’na metua vahine fetii.
Ua rave Niya i te moni ta to’na metua vahine fetii i horo‘a ia’na e haere atura na ni‘a i te poromu i te fare toa fatata’tu.
« Te hinaaro nei au i te hoo i te tahi carottes no te tamaaraa no teie pô », parau atura Niya i te taata hoo.
Ua tuu atu te taata hoo i te mau carottes i roto i te pute a Niya e faaite atura ia’na i te moni hoo o te mau carottes. Horo‘a’tura Niya i te moni ia’na.
« Teie ta oe moni toe », parau mai ra te taata hoo a faaho‘i atu ai oia ia’na i te tahi moni.
Ua haamauruuru atu Niya ia’na e ua haamata i te ho‘i i te fare. A haere ai oia, ua hi‘o a‘era oia i te moni ta te taata hoo i faaho‘i ia’na. « Ua rahi roa te moni ta’na i faaho‘i mai », mana‘o a‘era oia. « Teie nei e nehenehe ïa ia’u ia tape‘a i teie moni na’u iho ! »
Tera râ ua faaea a‘e ra o Niya i te haere. « Eita roa te Metua i te Ao ra e oaoa ia’u mai te mea e tape‘a vau i te moni », mana‘o a‘era oia. « E ti‘a ia’u ia vai parau-ti‘a i roto i ta’u mau parau e ta’u mau ohipa ».
Ua fariu a‘era Niya e ho‘i atura i muri i te fare toa. « Ua rahi roa te moni ta oe i faaho‘i mai », ta’na ïa parau i te taata hoo a horo‘a’tu ai oia i te moni ia’na ra.
Ua rave te taata hoo i te moni. Parau mai ra oia « E tamahine maitai oe ». Ua tuu ihora oia i te tahi mau apara i roto i te hoê pute e horo‘a’tu ra ia Niya. « Mauruuru no to oe vai parau-ti‘araa. A rave i teie nei mau apara e a oaoa i te reira e to oe utuafare ».
Ua ite Niya i te mahanahana e te oaoa i roto ia’na a haere atu ai oia i te fare. Ua ite oia e ua mauruuru te Metua i te Ao ra i te mea e ua ma‘iti oia ia vai parau-ti‘a noa.
Mau Faahoho‘araa na Louise Parker