Te mau Uiraa & te mau Pahonoraa
« No te aha to’u utuafare e fifi noa ai, inaha, te haere nei ho‘i matou i te pureraa, te faatupu nei i te pô utuafare, e te tamata nei i te ora i te evanelia. Eaha’tu â ta matou e nehenehe e rave ?»
E afa‘i mai te oraraa i te evanelia i te mau haamaitairaa aita râ te reira e parau ra e eita outou e faaruru i te mau tamataraa. E nehenehe ta te mau tamataraa e haapuai i to outou faaroo na roto i te faaurûraa ia outou ia ma‘imi i te tautururaa a te Metua i te Ao ra. Te tatararaa i te mau fifi na roto i Ta’na tautururaa e haapii mai ïa te reira ia outou e nahea ia rave i te mau faaotiraa ti‘a.
Ua aparau anei outou i teie ohipa e to outou utuafare ? Na roto i te a‘oraa te tahi i te tahi, e nehenehe ïa ia outou ia ite i te mau mana‘o tauturu. Ua haapae anei outou i te maa e ua pure anei outou no te mau rave‘a e to outou utuafare ? Ua imi anei outou i te mau papa‘iraa mo‘a e te mau a‘oraa no te amuiraa rahi ? Penei a‘e e ti‘a i to outou utuafare ia rave i te tahi mau tauiraa no te haamaitai i to outou huru, aore râ e ti‘a noa paha ia outou ia faaoroma‘i, ia tia’i ma te faaoroma‘i e te ti‘aturiraa e e haapuai mai ïa te Fatu ia outou i roto i teie tamataraa (a hi‘o Mosia 24:15).
Mai te mea ua faatupu vetahi ê i te mauiui i to outou utuafare, a tamata i te faaore i ta ratou hapa e eiaha e faahapa ia ratou. Noa’tu e eita te faaoreraa hara e tatara vitiviti i te fifi, e afa‘i mai râ te reira i te hau i roto i to outou aau e e haamâmâ te reira i te fifi.
Te aro nei te enemi i te mau utuafare no te mea e mea faufaa rahi roa to ratou puai no te Ekalesia e no to outou vahi nohoraa. No reira a tamau noa i te faaoroma‘i. A tamau noa i te haere i te pureraa, i te faatere i te pureraa pô utuafare, e i te ora i te evanelia. E tauturu te haapa‘oraa ia outou ia ite i te Varua Maitai, e e mea faufaa rahi Ta’na arata’iraa no te imi i te mau pahonoraa ta outou e imi ra. Te oraraa i roto i te hoê utuafare puai, e tae noa’tu i roto i te hoê utuafare tei titauhia ia haavî i te mau fifi, o te hoê ïa o te mau fâ faufaa rahi roa e nehenehe ta outou e farii.
A faaohipa i te mau Arata’iraa tei Horo‘ahia ia Tatou
Penei a‘e eita te hoê utuafare e haapuaihia e tae noa’tu i te taime e tamatahia’i. Aua‘e râ, aita tatou i titauhia ia faaruru i to tatou mau fifi tatou ana‘e ra ; te hinaaro nei to tatou Metua i te Ao ra ia manuïa tatou ei mau taata tata’itahi e ei mau utuafare. No te tauturu ia tatou, ua horo‘a mai Oia i te mau arata’iraa faufaa rahi, mai te mau papa‘iraa mo‘a, te hoê peropheta ora, te tahi ê atu feia faatere no te Ekalesia, e te Varua Mo‘a. E nehenehe ta ratou e tauturu ia tatou ia taa e ia faaohipa i te mau ture no te evanelia o te afa‘i mai i te oaoa ia tatou e to tatou mau utuafare. Taa ê atu i te reira, eiaha roa e haamo‘e i te parau i to outou mau metua e te mauruuru nei e te here nei outou ia ratou. Ua ite au e e horo‘a mai te Fatu i te hoê rave‘a ia hoêhia, ia haapuaihia, e ia faaitoitohia to outou utuafare. Ua ite au e ua haapa‘ohia te utuafare e te Atua.
Jared L., 18 matahiti, Mindanao, Philippines
A Haapii mai roto mai i ta Outou mau Tamataraa
Noa’tu eaha te rahiraa o to outou tamataraa, e vai noa mai â te mau tamataraa. Teie mau tamataraa no te tauturu ïa ia tatou ia paari. Tei te huru ïa o ta outou pahonoraa i taua mau tamataraa ra. Te taviri o te haapiiraa ïa na roto mai i te reira. A rave i te hoê taahiraa i muri e a hi‘o eaha mau na te mea e tupu ra na piha‘iho ia outou. A pure no ni‘a i te mau tamataraa ta outou e faaruru ra e ia tupu to outou faaroo e e tauturu ïa te Fatu ia outou ia haere atu na roto i teie mau tamataraa. E nehenehe te reira e riro ei puai no outou, e na roto atu ia outou e nehenehe ïa e riro ei puai no vetahi ê.
Makenzie C., 18 matahiti, Chihuahua, Mexico
A tai‘o i te Poro‘i no te Utuafare
E tae mai te mau fifi noa’tu e pure tatou aore râ aita. Aita te reira i vai mai no te faautua ia tatou, no te haapuai râ ia tatou. Te horo‘a mai nei te mau pe‘ape‘a ta tatou e faaruru nei i roto i te oraraa i te hoê rave‘a no te mau utuafare ia rave amui i te ohipa. A tere ai to’u utuafare na roto i te haapea’pe‘araa, te mau fifi moni, e te tamata-noa-raa i te imi i te taime ia vai amui, ua piri roa matou te tahi i te tahi e to matou Metua i te Ao ra. Te hoê mea ta matou e rave i te mau taime fifi o te tai‘oraa ïa i « Te Utuafare : E Poro‘i i to te Ao nei ». E faahaamana‘o mai te reira ia matou i te taatiraa mo‘a e vai ra i rotopu ia matou e te faufaa rahi i te haapa‘oraa i ta matou mau fafauraa.
Anna G., 15 matahiti, Georgia, Fenua Marite
A Farii i te Hinaaro o te Metua i te Ao ra
Te mana‘o nei au e te hoê rave‘a e tamata ai te Metua i te Ao ra ia tatou e mea na roto ïa i te mau fifi. Eiha tatou e haamo‘e e o Oia to tatou Metua e no te reira Oia i here rahi ai ia tatou e te hinaaro nei Oia i te mea maitai a‘e no tatou. Ua ite au e te hoê ana‘e rave‘a e nehenehe ai ia tatou ia upooti‘a i ni‘a i te mau fifi e mea na roto ïa i te tape‘a-noa-raa e te fariiraa i te hinaaro o te Metua.
José C., 18 matahiti, Ancash, Peru
A Ti‘aturi i te Fatu
Te mea o te tauturu mai ia’u ia ui ana‘e au no te aha râ to’u utuafare e farii ai i te mau fifi, noa’tu e te rave nei matou i te mau mea atoa e nehenehe ia matou, o te aamu ïa o Ioba e te ati rahi ta’na i faaruru. Te parau nei Ioba 19:25-26 : « Ua ite hoi au e, te ora ra te faaora, e ia tae i te hopea ra e ti‘a mai ai oia i ni‘a i te fenua nei : e ia pohe tau iri nei i teie nei ma‘i, e hi‘o â vau i te Atua i roto i tau tino nei » Ua faaruru Ioba i te tahi o te mau tamataraa fifi roa‘e, e ua ite râ oia e te ora nei to’na Faaora. Ia nehenehe ana‘e ia tatou ia feruri e ia ora mai ia Ioba, ua ite au e nenenehe ta tatou e hi‘o i to tatou mau fifi e ia hi‘o e e Faaora to tatou, o te faateitei ia tatou na roto i teie mau tamataraa.
Megan B., 17 matahiti, Utah, Fenua Marite
A Faaruru atu i te mau Fifi ma te Ti‘aturi
E haapuai te mau fifi ia tatou mai te mea e faaruru-ti‘a-hia’tu te reira. Te mea e ti‘a ia tatou ia rave ia faaruru atu ïa i te mau fifi ma te ti‘aturiraa e ma te itoito. Te rave nei paha outou i te mea maitai atoa ma te haereraa i te pureraa e te tamataraa i te ora i te evanelia, no reira e ti‘a ïa ia outou ia ite e haamaitai to outou fifi i to outou huru e e faariro ia outou ei taata maitai atu â i te pae hopea. A tamata atoa i te hi‘o i te tahi mea ta outou e ore e rave ti‘a nei e a faaitoito i te faaafaro i te reira. A tamata pinepine i te tauturu ia vetahi ê, e a na reira ai outou, e au ïa e e mâmâ mai to outou mau fifi. E hau atu i te mau mea atoa, a aparau atu i te Fatu i te mau taime atoa. A pure no ni‘a i to outou mau fifi e a ani i te Metua i te Ao ra ia arata’i ia outou.
Raymond A.,18 matahiti, Accra, Ghana
A Tape‘a maite e tae atu i te Hopea
Ua riro te utuafare ei tufaa tumu no te opuaraa a te Atua, no reira e rave ihoa ïa te enemi i te mau mea atoa e nehenehe ia’na no te tape‘a ia tatou ia ora amui ei utuafare oaoa e tei faatumuhia i ni‘a i te evanelia. Ua ite tatou e eita e nehenehe ia tatou ia mana‘o e mea ohie te oraraa, aore râ ia haere ana‘e tatou i te pureraa e ia faatere i te pureraa pô utufare, eita ïa to tatou oraraa e farii i te mau faahemaraa. Ia fifi ana‘e te mau mea, a tai‘o i ta outou mau papa‘iraa mo‘a, a pure e a aparau e to te utuafare.
Elder Dudley, 21 matahiti, Misioni no Indonesia Jakarta