Te mau Hopea Maitai no te Patu-faahou-raa
I to’u iteraa i te mau fare paparari na roto i te aueueraa fenua, ua oto ihora vau. I reira râ to’u iteraa e te here nei te Atua i te feia tei pohe e te feia atoa tei ora mai.
No te mea hoi e te ora nei au i Shanghai, te fenua Taina, ua nehenehe ia’u ia haere na muri i te hoê pŭpŭ piahi i te Mataeinaa no Sichuan i te tufaa apatoa too a o te râ no te fenua Taina no te tauturu i te patu i te mau fare no te feia tei roohia i te ati aueueraa fenua tei tu‘ino roa i te area tau matahiti i ma‘iri. Ua rave puai matou i te ohipa no te tuuraa i te mau ofa‘i, te operaa i te tima, te tura’iraa i te mau pereoo faauta tei î i te ofa‘i, e te horo‘araa’tu i te mau ofa‘i i te mau taata i roto i te mau « reni apaparaa » I te piti o te mahana ua mauiui to’u nei tua e ua î roa to’u mau rimarima i te apoopoo. Ua riro râ te tere ei ohipa e ore roa e mo‘ehia ia’u e tei haapuai i to’u iteraa papû no ni‘a i to’u iho faufaa e te faufaa o te taata tata’itahi, te hoê o te mau faufaa a te Feia Apî Tamahine.
A rohi puai ai au i te mau mahana atoa, ua ite au e ua tupu to’u ti‘aturiraa i to’u iho faufaa i te rahi. Ua ite au i te maitai no ni‘a ia’u iho no te mea te rave ra vau i te mau mea no te haamaitai i te huru oraraa o te mau taata tei ore i fana‘o mai ia’u nei.
Ua nehenehe atoa ia matou ia haere e mata’ita’i i te hoê fare haapiiraa i taua tufaa fenua ra. I to matou taeraa’tu, ua horo mai te hoê nahoa tamarii rii haviti ia matou ra. I to’u iteraa’tu i teie mau tamarii rii nehenehe, ua ite a‘era vau i to ratou atoa faufaa rahi. E mau tamarii nehenehe paatoa ratou na te Atua, e ua ite puai au e te here nei e ua ite Oia ia ratou tata’itahi.
I te pae hopea o to’u nei tere ua fana‘o matou i te haere atu i te hoê hotera, i reira matou e tamaa ai. I to matou râ taeraa’tu i reira, ua ite atura matou e ua vavahihia te reira vahi e te aueueraa fenua. O tera te vavahiraa ino roa‘e o ta’u i ore â i ite a‘enei. Ua faatupu te reira i to’u hinaaro ia ta’i. Ua marua mai te mau aroaro fare e te mau patu o te mau fare, e ua marua te mau tumu raau na piha‘iho mai, e te vai ra te mau fare paparari i te mau vahi atoa. Ua tere mai te hoê ofa‘i rahi mai ni‘a mai i te mou‘a e ua perehi atu i te pae o te hoê fare, ma te haamarua i te aroaro e te patu. Te vai ra te hoê noa tiaa i mua i te hoê o te mau opani fare.
A feruri ai au i ni‘a i teie mea tei tupu e te mea e ua pohe te mau taata i roto i teie nei ati, ua fifi rii au i te maramaramaraa e nahea to te Metua i te Ao ra faati‘araa ia tupu teie ati. Ua here anei Oia ia ratou ? I reira ua haamana‘o vau i te mea ta matou i tuatapapa i roto i te piha a te Feia Apî Tamahine e ua ite a‘e ra vau e oia, ua here mau Oia ia ratou. Ua matau e ua here Oia ia ratou tata’itahi. O ratou tei pohe i taua mahana ra e mau tamarii paatoa ratou na te Atua. I te haamataraa, ua rahi to’u oto i te feruriraa i te reira. Ua ite râ vau i muri iho e tei roto teie nei feia i te ao varua e e nehenehe ia ratou ia ho‘i faahou atu i te Metua i te Ao ra. Ua tamahanahana teie nei mana‘o ia’u e ua horo‘a mai i te hau ia’u.
Ua ite au e e tamarii au na te Atua ma te faufaa rahi. E mau tamarii paatoa tatou no to tatou Metua i te Ao ra, tei matau ia tatou tata’itahi. Te here nei Oia ia tatou i te hoê here hohonu e te puai mau o ta tatou e ore roa e noaa i te feruri. Ua tanu-hohonu-hia teie iteraa i roto i to’u aau a rave ai au e a tavini ai au i rotopu i te mau taata tei mauiui rahi i roto i te aueueraa fenua no Sichuan.
Ua tauturu o Ashley Dyer (te pae atau) i te patu-faahou-raa i te mau fare no te huiraatira i muri a‘e i te aueueraa fenua i te matahiti 2008 i Sichuan, te fenua Taina.
Hoho‘a na roto i te maitai o Ashley Dyer