Hei Raau Taratara, Hei no te Re

Na Larry Hiller

Te mau ve‘a a te Ekalesia

Ua riro te hei raau taratara no’u nei e hoê tapa‘o no te ite o te Faaora i to tatou mau mauiui atoa tei hunahia – e To’na aravihi i te faaora i te reira.

Te Ava‘e Atete i te Fenua Mo‘a. Na piha‘iho ia matou ua anaana te mau vahi paparari no Kaperenauma i roto i te ahu no te avatea. E vahi faahiahia teie vahi, ua maniania râ to matou taata arata’i e te hoê pereta’i i piha‘iho mai no te tahi taime e ua haamata to’u mana‘o i te hahaere.

Ua ara ta’ue noa vau a faatoro atu ai te taata arata’i i to’na rima i ni‘a i te tumu raau o tei tapo‘ipo‘i ia matou i te mahana e ua parau mai oia, « Ua pii te taata i te reira te tumu raau no te ‘hei raau taratara ». Ua hi‘o atu vau i te mau amaa raau tei î i te rauere. Tei hea hoi te mau taratara ? Ua toro atu vau i to’u rima, e ua huti mai au i te hoê amaa na‘ina‘i.

I reira, i rotopu i te mau rauere, ua ite atu vau i te mau taratara. Mea rairai e mea matie, mea ‘oi e mea roa mai to’u manimani rima rahi, eita te reira e nehenehe i te itehia hau atu i tau na avae i te atea. E ite mau râ te taata e tape‘a i te hoê o taua mau amaa raau ra i te mauiui.

Ua mana‘o ihora vau i te mau hoho‘a peni e rave rahi ta’u i ite no te Faaora i te ti‘araa’tu i mua i te hoê tiribuna haavare, ahuhia i te ahu vareau e te oomo ra i te hoê hei amaa raau marô tei firihia. Ite a‘era vau e ua hinaaro paha, te hoê taata faatîtîhia aore râ te hoê faehau tei faauehia no te hamani i taua hei ra, e rave i te mau amaa raau matie e te marû mai taua mau amaa ra i ni‘a i te tumu raau eiaha râ i te mau amaa marô paari. Te auraa mau, te tumu no te hei e ere ïa no te ta’iri noa no te haavahavaha râ e te faôô.

I te ao tahito e mea pinepine te hoê hei rauere matie aore râ te hoê ruru rauere tarona no‘ano‘a i te horo‘ahia i te mau taata tei rê i te mau tata’uraa e te mau aroraa. Ua faanehenehe te mau hei tarona i te mau hoho‘a o te mau arii e te mau emepera. Peneia‘e ua riro te hei raau taratara tei taumihia i ni‘a i te rae o te Faaora e mea rauere e te matie ei faahaamana‘oraa faôô no taua faahanahanaraa tahito ra. E mana‘o noa teie, e ere i te haapiiraa. No’u râ, no to’u iteraa mai te reira te huru, na te reira i haamaramarama maitai mai i te hoê hi‘oraa no te Taraehara : Ua ite te Faaora i to tatou mau oto, e e nehenehe Ia’na ia faaora ia tatou.

Te ahu tei tuuhia’tu i ni‘a Ia’na e hoê ïa tapa‘o faôô i te hui arii. Ua tapo‘i te reira ahu i te mau tapa‘o e te mau mutu no te ta’iriraa Ta’na i mauiui iho nei. Oia atoa ua riro te hei raau taratara mai te hoê hei no te hoê taata tei rê o tei huna mau râ i te mauiui ta te hei raau i faatupu.

Mea rahi roa o tatou o te amo nei i te mau mamae ite-ore-hia. Te haapii nei te himene e « i roto i te aau hau i hunahia’i te oto e ore roa te mata e nehenehe e ite » (« Pee au ia Oe », Te mau Himene, no. 131). Ua ite râ te Faaora Ua matau maitai Oia i te mana‘o pe‘ape‘a o te taata iho. Ua orahia te taatoaraa o To’na oraraa ei omuaraa no te Taraehara e te Ti‘a-faahou-raa. E aita te feia Ta’na i haapii e i haamaitai e i faaora i ite. Aita atoa Ta’na iho mau pĭpĭ i ite.

Ua ite te Faaora i tera’tu pae o te mau « ahu » e te mau « hei » o te huna nei i to tatou mau oto ia vetahi ê. No to’na faaoroma’i i « te mauiui, e te ati, e te mau huru faahemaraa atoa ra », ua ï Oia i te aroha e ua ite oia nahea ia faaora ia tatou ia tuu ana‘e tatou i ta tatou mau hopoi‘a i To’na ra avae (a hi‘o Alama 7:11-12). O Oia te mono‘i e nehenehe e faaora i te mau mamae hohonu e tei hunahia. E te hei Ta’na e toro mai ia tatou o te hei mau ïa o te taata tei rê.

Te Mesia e te Hei Raau Taratara, na Carl Heinrich Bloch, faaohipahia na roto i te parau faati‘a a te National Historic Museum e vai ra i Frederiksborg i Hillerød, Denmark, eiaha e tapiti i te hoho‘a