Ua Haamâmâ To’na Mauiui i To Tatou
Barbara Winter, Arizona, Fenua Marite
Ei tuati ma‘i vahine i roto i te piha atuaturaa no te mau tama fanau-apî-hia, te atuatu nei au i te mau aiû ma‘i e te tahi mau taime te mau aiû na‘ina‘i roa. I te hoê pô ua faataahia vau no te haapa‘o i te hoê tamaiti iti tei fanauhia e 17 hebedoma na mua a‘e i te ava‘e fanauraa e ua hau noa i te afa kilo te teiaha. E mea na‘ina‘i roa to’na nau rima, te rahi o te pae ni‘a o to’na na avae mai to’u rimarima ïa, e te pae raro o to’na na avae mai to’u ïa manimani rima rahi. No te u‘ana o to’na mau fifi no te pae o te hutiraa aho, aita te mau taote i mana‘o e e ora oia i taua pô ra.
E vai noa te maniania ore i roto i te taatoaraa o te piha ia aro ana‘e te hoê aiû fanau-apî-hia no te ora. Mea rahi roa te haape‘ape‘araa i ni‘a i te mau taata atoa, i ni‘a ihoa râ i te tuati ma‘i vahine o te aiû, e teie pô o vau ïa. Ua faaea noa to’na na metua i piha‘iho ia’na i te roaraa o te mahana, ua rohirohi roa râ raua. Ua ho‘i atu to’na metua vahine i to’na piha no te tahi faafaaearaa titau-rahi-hia.
Te vai ra i roto i te piha o te aiû te hoê afata hi‘o paruru (incubateur), te mau matini hi‘opo‘a, te tahirihiri mata’i, e te mau pamu toto, no te tape‘a ora noa ia’na. No te mea hoi e mea ma‘i roa oia e ua titauhia e ia atuatu-noa-hia oia, aita ïa vau i faataahia no te haapa‘o i te tahi ê atu feia ma‘i i taua pô ra. E faaea noa ïa vau i piha‘iho ia’na i te taatoaraa o te aru‘i, ma te haapa‘o i te mau raau, te hi‘opo‘araa, te rapaauraa, e te mau tamatamataraa.
A roa noa’i te aru‘i, ua tamata vau i te feruri eaha ra ïa to’u mana‘o ahani e o vau to’na metua vahine. Eita ïa te mauiui e noaa i te faaoroma‘ihia.
Ua horoi mărû noa vau i to’na hoho‘a mata, ua tape‘a i to’na na rima e na avae iti, ua taui e ua tuu atu ia’na, ma te haapa‘o maitai, i roto i te hoê ahu taoto apî mărû. Ua mana‘ona‘o a‘era vau eaha ra ïa ta’u e nehenehe e rave no ta’u nei aiû ma‘i. Eaha ra ïa ta to’na metua vahine e rave ? Eaha ra ïa ta to’u Metua i te Ao ra e hinaaro ia’u ia rave ?
Ua fatata hoi teie nei varua iti faufaa rahi hara ore i te ho‘i atu i to’na ra Metua i te Ao ra. Ua mana‘ona‘o vau e mai te mea ua măta’u anei oia. Ua haama‘o a‘era vau i ta’u iho mau tamarii. I to ratou apîraa e ua ri‘ari‘a ratou, ua himene ïa vau na ratou. « E Tamarii Au na te Atua » o ta ratou ïa himene auhia. Ma te tape‘a i to’u mau roimata ia tahe, ua himene atu vau i te aiû.
Ei tuati ma‘i vahine, ua ite au i te mau uaua e te toto, ua tai‘o vau i te maraaraa e te toparaa o te ouma o te aiû, ua faaroo vau i te tupa‘ipa‘iraa o to’na mafatu, e ua hi‘o vau i te mau numera i ni‘a i te mau matini hi‘opo‘a. Ei Feia Mo‘a i te mau Mahana Hopea nei ua ite au i te hoê varua tiretiera e ua faahiahia vau i te faanahoraa no te faaoraraa.
A haere noa’i te pô i mua, ua ino to’na ea. Ua tupu mai te hoê huru fifi ia’na tei faatahe i te toto i roto i to’na mau mahaha.
I te po‘ipo‘i a‘e, ua hee maru noa’tu ta’u aiû ma‘i na roto i te paruru. Ua faaru‘e mai oia i te rima o to’na metua vahine e « ua afa‘ihia oia i taua Atua ra o tei horo‘a mai i te ora [ia’na]ra » (Alama 40:11).
I taua pô ra, ua piri atu vau i te Faaora e te Metua i te Ao ra. Ua noaa ia’u te hoê maramaramaraa rahi a‘e â no ni‘a i te here o te Fatu i te taata nei – e To’na here ia’u nei. Ua faahaamana‘ohia vau, e ua hitimahuta atoa hoi, no te hohonuraa o te here ta’u i ite No’na. E ua ite au i te hoê hinaaro ia maitai atu â vau, ia mărû atu â vau, ia faaore atu â vau i ta vetahi ê hapa, e ia rahi atu â to’u aroha, ia riro atu â vau mai Ia’na ra te huru hoê mahana e hoê otuituiraa mafatu i te taime hoê.