O Iesu Mesia To’u Faaora e Taraehara

Na Ana Maria Coburn e Cristina Franco

E nehenehe ta outou e faaohipa i teie haapiiraa ei faaoaoaraa no te haapii atu â no ni‘a i te parau tumu a te Paraimere no teie ava‘e.

« Te ti‘aturi nei matou e, na roto i te Taraehara a te Mesia e ti‘a ai i te taata atoa ia faaorahia, na roto i te haapa‘oraa i te mau ture e te mau oro‘a o te Evanelia » (Te mau Hiro‘a Faaroo 1:3).

Eaha ïa ta outou i ineine i te horo‘a no te tahi taata ta outou e here mau nei ? No To’na here rahi ia tatou i horo‘a ai to tatou Faaora, o Iesu Mesia i To’na iho ora no tatou.

Ua ite te Metua i te Ao ra e mai te mea e hara e e rave tatou i te mau hape, eita ïa e nehenehe ia tatou ia ora faahou i piha‘iho Ia’na. No reira Ta’na Tamaiti, o Iesu Mesia, i pûpû ai Ia’na ei Faaora no tatou. Ua ma‘iti te Metua i te Ao ra Ia’na no te faaora ia tatou no te mea o Oia ana‘e te taata e nehenehe e ora ma te hara ore.

Ua mauiui Iesu e ua pohe no te faaora ia tatou i te pohe e i ta tatou mau hara. Ua parauhia teie ohipa here te Taraehara. No te Taraehara e nehenehe ai ia tatou ia tatarahapa i ta tatou mau hara, ia faaorehia ta tatou mau hara, e ia riro ei mea mâ e te porao ore mai ia Iesu.

Ua faasataurohia Iesu e ua pohe, e i muri a‘e e toru mahana ua ti‘a faahou Oia. Ua ora faahou Oia ! No te mea ho‘i ua ti‘a-faahou Oia, e ti‘a faahou atoa ïa tatou. Oia hoi e faatahoê-faahou-hia to tatou mau tino e to tatou mau varua e a muri noa’tu.

Oia mau, ua riro o Iesu Mesia to tatou Faaora e Taraehara. O Oia te hoho‘a maitai no tatou paatoa. Ua haapii Oia ia tatou nahea i te hamani maitai i te tahi e te tahi. Ua haapii Oia ia tatou nahea i te tavini i te tahi e te tahi. Ua haapii Oia ia tatou nahea ia riro ei maitai a‘e. Eita e nehenehe ia tatou ia ora i te hoê oraraa maitai roa mai Ia’na ra, e nehenehe râ ta tatou e ho‘i e ora ia Iesu e te Metua i te Ao ra na roto i te haapa‘oraa i te mau faaueraa e te raveraa i te maitai e noaa ia tatou i te rave. E ti‘a ia tatou ia pee ia Iesu Mesia i te mau mahana atoa.