“Sa Sega Eke Ko Koya, Sa Tucake Tale.”

Mai vei Peresitedi Thomas S. Monson

Edaidai sa tu ga na ivovo kei Kapenaumi, na siti e toka ena batinidrano, na itikotiko liu ni cakacaka ni iVakabula mai Kalili. Eke a vunau kina ena veivalenilotu, e baravi, ka veivakabulai ena itikotiko eso.

Ena itekivu ni Nona cakacaka vakalotu, a vunau kina o Jisu mai na ivola i Aisea: “Sa tu vei au na Yalo ni Turaga; ni sa lumuti au ko Jiova meu vunautaka na irogorogo vinaka vei ira era sa yalomalumalumu; sa talai au mai meu vakabulai ira sa ramusu na yalodra, meu vunautaka na veisereki vei ira na bobula, kei na veisereki vei ira era tiko ena vale ni veivesu” (Aisea 61:1; raica talega na Luke 4:18)—na ivakaro matata ni ituvatuva vakalou o ya mera vakabulai o ira na luvena tagane kei na luvena yalewa na Kalou.

Ia na vunau nei Jisu mai Kalili sa kena itekitekivu ga. Sa dau nanamaki tiko kina na Luve ni Tamata ki na veitavaki rerevaki ena sotava mai na delana e vakatokai o Kolikoca.

E a vesu ena Were o Kecisemani ni oti na iOtioti ni Kana Vata, era drotaki Koya na Nona tisaipeli, a kasiviti, lewai, ka vakamaduataki, e tatabalebale o Jisu ni colata na Nona kauveilatai cecere ki Kalivari. E dewa mai na cecere me laki soli yani, vakararawataki, ka mate ena kauveilatai.

Mai na qaqani sere “The Holy City”:

Sa veisau na ituvaki. …
E batabata ka cevata na mataka lailai,
Ni sa lamata mai na iyaloyalo ni dua na kauveilatai
Ena dua na delana galili.1

Ena vukuda sa mai solia kina na Tamada Vakalomalagi na Luvena. Ena vukuda sa mai solia kina na Nona bula na Tuakada Ulumatua.

Ena iotioti ni gauna sa rawa sara ga vua na iVakavuvuli me vakanadaku ka lesu. Ia a sega ni cakava. E curuma yani vakalolovira na veika kecega me rawa kina ni vakabula o Koya na veika kecega: na kawa tamata, o vuravura, kei na veika bula kecega era na tiko kina.

E sega ni dua na vosa Vakarisito e vakaibalebale cake vakalevu vei au me vakataka na ka e a cavuta na agilosi vei Meri Makitala ni tagi tiko kei Meri kadua ni rau sa yaco yani ki na ibulubulu me rau laki vakarautaka na yago ni nodrau Turaga: “E na cava dou sa mai vakasaqarai koya sa bula e na kedra maliwa na mate? “Sa sega e ke ko koya sa tucake tale” (Luke 24:2–6).

Mai na ivakaro oqo, o ira era a bula tiko ka ra sa mate, kei ira era bula tiko ena gauna oqo ka ra na laki mate ena dua na siga, kei ira era na vakarau sucu mai mera na qai laki mate yani era sa vakabulai oti.

Ena vuku ga ni sa mai qaqa na Karisito vei mate, eda na tucake kece tale. Oqo na kena vakabulai na yalo. E vola vakaoqo o Paula:

“Sa vakalomalagi … na yago eso, ka sa vakavuravura na yago eso: ka sa duatani na iukuuku ni yago vakalomalagi, ka sa duatani na iukuuku ni yago sa vakavuravura.

“Sa duatani na iukuuku ni matanisiga, ka sa duatani na iukuuku ni vula, ka sa duatani na iukuku ni veikalokalo: ni sa uasivi cake na iserau ni kalokalo e dua ena kena serau na kalokalo e dua tani.

“Sa vaka talega kina na tucake tale mai na mate” (1 Korinica 15:40–42).

Na matanitu lagilagi ga vakasilesitieli eda na vakasaqara. Na itikotiko ga ni Kalou eda sa gadreva meda na tiko kina. Eda na gadreva ga meda lewena na matavuvale sa tawamudu.

Sai Koya ga sa vueti keda yadudua mai na mate tawamudu, kau sa vakadinadinataka ni sai Koya na qasenivuli ni ka dina—ia sa sega walega ni dua na qasenivuli. Sai Koya na ivakaraitaki vinaka duadua ni bula sa uasivi sara—ia e sega walega ni dua na ivakaraitaki vinaka duadua. Sai Koya na vuniwai cecere sara—ia e sega walega ni dua na vuniwai cecere sara. Sai Koya dina na iVakabula kei vuravura, na Luve ni Kalou, na Tui ni Sautu, na Yalosavasava kei Isireli, ni sai Koya na Turaga sa tucake tale, ni a kaya, “Koi au na kena ivakatekivu kei na kena ivakataotioti; sai au sa bula, sai au talega a vakamatei; raica koi au na nomudou dautataro vei Tamada” (V&V 110:4).

“Rogo talei tu vei au: ‘Au sa kila ni bula tu!’”²

Au sa vakadinadinataka ni dina oqo.

Droini mai vei Steve Kropp