Eaha ta tatou e ti‘aturi nei

Ua aufau Iesu Mesia no ta tatou mau hara

Te hoê o te mau tumu tei ô nei tatou i te fenua nei no te haapiiraa ïa ia haapa‘o i te mau faaueraa a te Atua. Eiaha no Iesu Mesia, tei ora i te hoê oraraa maitai roa, ua hara te mau taata atoa tei ora i ni‘a i te fenua nei (a hi‘o Roma 3:23 ; 1 Ioane 1:8). E hara, ia ofati ana‘e tatou ma te ite papû i te mau faaueraa a te Atua, e e utu‘a tei taatihia i te mau hara atoa. Ia hara ana‘e tatou, e titau te parau-ti‘a e ia amo tatou i te utu‘a (a hi‘o Alama 42:16-22).

I te hopearaa, te utu‘a no te mau hara atoa o te faataa-ê-raa ïa te taata i te Atua (a hi‘o 1 Nephi 10:21). No te ino o teie faataa-ê-raa eita’tu ïa e nehenehe ia tatou ia tata’i tatou iho.

No te faaore i teie faataa-ê-raa, ua horo‘a mai to tatou Metua i te Ao ra i te hoê e‘a ia rave Ta’na Tamaiti Fanau Tahi, o Iesu Mesia, i ni‘a iho Ia’na te zugo no ta tatou mau hara, na te reira e faati‘a ia tatou ia mâ i te pae varua e ia hoê faahou Ia’na. Teie te opuaraa no te aroha.

Ua haapii te Faaora, « No te mea inaha, ua faaoroma‘i au, o te Atua, i teie nei mau mea no te taata’toa, ia ore ratou ia roohia i te mamae mai te mea e e tatarahapa ratou ; tera râ mai te mea e aita ratou e tatarahapa ia roohia ratou i te mamae rahi e tia’i ia au i ta’u i faaoroma‘i ra » (PH&PF 19:16-17).

Ei tufaa no Ta’na Taraehara, ua mauiui Iesu no ta tatou mau hara i roto i te Ô no Getesemane e i ni‘a i te satauro no Kalavaria. Na roto i te tatarahaparaa i ta tatou mau hara, e nehenehe ia tatou ia afa‘i mai te mana no Ta’na Taraehara i roto i to tatou mau oraraa.

Ua parau o Iesu Mesia, tei aufau no to tatou mau hara na roto i to’na iho hinaaro :

« E haere mai outou ia’u nei, e te feia atoa i ha’a rahi, e tei teiaha i te hopoia, e na’u outou e faaora.

« A rave mai i tau zugo i nia ia outou, e ia haapiihia outou e au, te mărû nei hoi au e te haehaa o te aau : e e noaa hoi te ora i to outou varua.

« Te mărû nei hoi ta’u zugo e te mâmâ nei ta’u hopoia » (Mataio 11:28-30).

Te horo‘a atoa mai nei te Taraehara i te mau haamaitairaa i muri nei:

1. Te Ti‘a-faahou-raa i te taata atoa e fanauhia i ni‘a i te fenua nei (a hi‘o Alama 11:42-45).

2. Te Ora mure ore i mua i te aro o te Atua no te mau tamarii atoa o te pohe hou e nae‘ahia’i ia ratou te va’uraa o te matahiti (a hi‘o Mosia 3:16 ; 15:24-25 ; Moroni 8:8-12).

3. Te aravihi i te ite i te hau i te mau tau tamataraa no te mea ua rave Iesu i ni‘a iho Ia’na to tatou mau mauiui e to tatou mau ma‘i (a hi‘o Ioane 14:27 ; Alama 7:11-12).

4. Te utu‘a maitai no te feia parau-ti‘a no te mau mea aifaito ore o teie nei oraraa (a hi‘o Ia Poro Haere i Ta’u nei Evanelia [2004], 52).

No te tahi atu â haamaramaramaraa, a hi‘o Te mau Ture no te Evanelia (2009), 59-66 ; e Tape‘a i te Faaroo (2004), 14-20.

« Inaha, i haere mai nei au i roto i teie nei ao e faaora i to te ao, e faaora i to te ao i ta ratou mau hara.

« No reira, o te tatarahapa e te haere mai ia’u mai te tamarii aruaru ra, o ta’u ïa e ite, mai ia ratou hoi to te Basileia o te Atua. Inaha, no ratou i pûpû ai au i to’u tino, e rave faahou ai au i te reira; no reira a tatarahapa, e haere mai ia’u e to te hopea mai o te fenua nei, e e faaorahia outou » (3 Nephi 9:21-22).

« Iesu Mesia, te Tamaiti Fanau Tahi a te Atua e te taata hara ore ana‘e tei ora i ni‘a i te fenua nei, o oia ana‘e te taata e nehenehe e rave i te taraehara no te taata nei » (Ditionare a te Bibilia, « Taraehara »).

E To’u Metua, na Simon Dewey; To Iesu Mesia Tereraa i te fenua Amerika, na John Scott © IRI; faahoho‘araa no te aiû © Getty Images; te tahi atu mau hoho‘a na Christina Smith