Te paraparau nei tatou no te Mesia
A tatarahapa, a Fariu atu i te Fatu, e a Ora
« O oia o tei tatarahapa i ta’na ra mau hara, ua faaorehia ïa te reira, e e ore ho‘i au, o te Fatu e haamana‘o faahou â i te reira » (PH&PF 58:42).
Ua pepe iho nei te hoê vahine maitai e te haapa‘o ta’u i matau i roto i te hoê ati purumu. I roto i to’na mau pepe e mau ivi aoao fati ïa e te mau ivi tua fati. Ei tufaa no to’na rapaauraa ua titauhia ia’na ia oomo i te hoê tape‘a i ni‘a i to’na tua e to’na a’i ia ore oia e hautiuti. E mea au ore roa te tape‘a. E mea titauhia râ te reira. Tera ïa te titauraa e nehenehe ai to’na tua e to’na a’i e ora mai.
Ua riro atoa te tatarahapa mai taua tape‘a ra. Ia hara ana‘e tatou, te haamamae ra ïa tatou i to tatou varua, e ua hinaarohia te rapaauraa a te ra’i ia ora maitai faahou tatou. Te horo‘a nei te tatarahapa i te titauraa o te faati‘a i te Faaora, na roto i te mana no te Taraehara, ia faaora ia tatou (a hi‘o 3 Nephi 9:13). Mai te mea e ere te tahi tufaa o te tatarahapa i te mea au roa – mai te hoê tape‘a i ni‘a i te hoê tua fati – e titauhia ihoa ia tatou ia tatarahapa.
Ua haapii mai te Peresideni Dieter F. Uchtdorf, Taututu Piti i roto i te Peresideniraa Matamua e «E faaho‘i te tatarahapa mau ia tatou ia rave i te mea ti‘a. No te tatarahapa mau e tia ïa ia tatou ia ite i ta tatou mau hara, ia oto, aore râ te oto e au i te Atua, e ia fa‘i i taua mau hara ra i te Atua. Mai te mea e mea teiaha ta tatou mau hara, e ti‘a atoa ïa ia tatou ia fa‘i i te reira i to tatou faatere autahu‘araa tei haamanahia. E ti‘a ia tatou ia ani i te Atua ia faaore i ta tatou hara e ia rave i te mau mea atoa e nehenehe ia tatou no te faaafaro i te ino ta tatou mau ohipa i faatupu. Te tatarahapa, o te hoê ïa tauiraa o te feruriraa e o te aau – e faaea tatou i te rave i te mau mea hape, e e haamata tatou i te rave i te mau mea ti‘a. Na te reira e afa‘i mai ia tatou te hoê hi‘oraa apî no ni‘a i te Atua, no ni‘a ia tatou iho e te oraraa ».1
Ia rave maitai ana‘e tatou i te raveraa no te tatarahaparaa, te hotu o te ora ïa, te tamaruraa, e te oaoa. Ua papa‘i o Dorothy J. R. White :
A hi‘o na i te mau roimata tei topa i rapae au,
O te tamâ atoa râ i roto.2
Te ti‘aoro nei te Fatu ma te onoono, te here e te taparuraa e ia tatarahapa tatou no te mea te hinaaro nei Oia i te faaora ia tatou. Ua mauiui oia i roto i To’na tino e varua no te aufau i te utu‘a no ta tatou mau hara mai te mea e tatarahapa tatou. Ua haamaramarama mai Oia :
« No te mea inaha, ua faaoroma‘i au, o te Atua, i teie nei mau mea no te taato‘a, ia ore ratou ia roohia i te mamae mai te mea e e tatarahapa ratou ;
« Tera râ mai te mea e aita ratou e tatarahapa ia roohia ratou i te mamae rahi e tia’i ia au i ta’u i faaoroma‘i ;
« Na te reira mamae rahi i faatupu i roto ia’u, oia o te Atua, o tei hau a‘e i te mau mea atoa ra, i te rurutaina no te mauiui, e ua tahe mai ra te toto na te mau poa’toa, e ua mauiui i te tino e te varua atoa hoi – e ua hinaaro hoi ia ore au ia inu i te au‘a maramara e oriorio atu –
« Area râ, ei hanahana to te Metua, e ua inu vau e ua faaoti hoi i ta’u mau faaineineraa i te tamarii a te taata nei.
« No reira, te faaue faahou atu nei au ia oe ia tatarahapa » (PH&PF 19:16-20).
Ia tatarahapa na tatou i teie nei, e fariu atu i te Fatu e ia faaorahia.
Ua ho‘i te tamaiti tei haere i te fenua roa i to’na metua ma te haehaa e ua parau atu, « E tau metua, ua hara vau i te Atua o te ra’i, e ia oe atoa hoi, eita’tura vau e au ia parauhia e, e tamaiti na oe » (Luka 15:21). Ua farii poupou mai to’na metua ia’na i te fare. E farii poupou atoa mai to tatou Metua i te Ao ra ia tatou ia tatarahapa ana‘e tatou.
Te Ho‘iraa mai o te Tamaiti tei Haere i te Fenua Roa, na James Tissot