J. Reuben Clark Tamaiti : Te Hoê Taata ma te mau Taleni Taaê

Joshua Reuben Clark Tamaiti. fanauhia i Grantsville, Utah, i te 1 no Setepa 1871. Noa’tu e mea iti roa to’na haereraa i te haapiiraa e aita i noaa ia’na i te haere i te fare haapiiraa tuatahi, ua haapii râ to’na metua vahine ia’na i te fare e ua here oia i te haapiiraa. O oia te piahi numera hoê i roto i ta’na piha haapiiraa e ua noaa ia’na te parau tuite no te pae aivanaa (bachelor of sciences) i te Fare Haapiiraa Teitei no Utaha e ua haere oia e titau i te parau tuite no te pae o te ture i te Fare Haapiiraa Ture no Columbia i te oire no New York.

Ua faaipoipo te Taea’e Clark ia Luacine Annetta Savage i roto i te Hiero no Roto Miti i te matahiti 1898, e ua riro raua ei mau metua no na tamarii e maha.

Ma ta’na parau tuite no te ture e te hoê feruriraa maramarama, ua tomo atu o J. Reuben Clark Tamaiti i roto i te hoê toro‘a auvaha ture e e taata rave ohipa na te hau tei hope i roto i te ti‘araa ei Ti‘a no te Hau Marite i te fenua Mexico i te matahiti 1930. Ua hope râ taua taviniraa a paturuhia’i te Taea’e Clark ei Tauturu Piti no te Peresideni Heber J. Grant i roto i te Peresideniraa Matamua i te 6 no Eperera 1933. Noa’tu e e tahu‘a rahi oia i taua taime ra, e ere râ oia i te hoê Hui Mana Faatere. Ua faatoro‘ahia oia ei Aposetolo i muri iho a paturuhia’i oia ei Tauturu Matamua no te Presideni Grant i te ava‘e Atopa 1934. Ua tavini te peresideni Clark i muri iho ei tauturu no te mau peresideni George Albert Smith e David O. McKay.

I roto i te mau mau ohipa e rave rahi ta’na i rave no te Ekalesia, te hoê o te hiti rahi mai o te hoho‘a ïa no te haehaa ta’na i faaite a riro mai ai o David O. McKay ei peresideni no te Ekalesia. Ua pii oia i te Peresideni Clark ei Tauturu Piti no’na. No te mea ua tavini na te Peresideni Clark ei Tauturu Matamua i roto i te mau Peresideniraa Matamua na mua’tu, ua mana‘o te tahi e ua faaitihia mai oia, ua haamaramarama râ te Peresideni Clark : « I roto i te taviniraa i te Fatu, e ere i hea outou e tavini ai nahea râ. I roto i te Ekalesia a Iesu Mesia i te Feia Mo‘a i te mau Mahana Hopea nei, e rave te hoê taata i te ti‘araa i piihia’i oia, te hoê ti‘araa e ore roa te hoê taata e imi aore râ e pato‘i ».¹

Ua pohe te peresideni Clark i te 6 no atopa 1961.

Te Peresideniraa Matamua i te matahiti 1945 (mai te aui: J. Reuben Clark Jr., Heber J. Grant, e David O. McKay.

Peresideni Clark (aui) e Lamont Toronto, peresideni misioni.