E mea Mure Ore te Hoê Fafaura
Ia tae ana‘e mai i te mau faaotiraa ta’u i rave ei tufaa no te hoê fafauraa i te hoê Metua Here i te Ao ra, eita ïa i te mea faufaa eaha ta to te ao e parau mai nei.
I to’u taure‘are‘araa, ua horo‘a mai to matou Peresideni no te Feia Apî Tamahine i te feia apî tamahine tata’itahi te hoê tao‘a aroha : te hoê hoho‘a no te hiero. Ua paraparau oia ia matou no ni‘a i te mau fafauraa e te oraraa i te mau oraraa mâ. I muri iho ua faaitoito oia ia matou ia haamau i te hoê fâ ia haere i te hiero i te hoê mahana.
Ua haapa‘o vau i te a‘o a teie tuahine e ua faaoti au ia faariro i te faaineineraa ei ohipa matamua roa i roto i to’u oraraa. Aita e hiero i Costa Rica i taua taime ra, ua ite râ vau na roto i to’u bapetizoraa i te auraa o te hoê fafauraa, e ua tia’i au i te taime no te rave i te tahi atu â mau fafauraa i te Fatu.
I taua taime ra, aore roa e melo ê atu no te Ekalesia i roto i to’u utuafare, no reira aita te evanelia i haapiihia i roto i to matou utuafare. Ua faaoti râ vau e e nehenehe ta’u e haapii o vau ana‘e iho i te mau ture no te evanelia e ia pee i te reira. Te mau tufaa o ta’u faaineineraa o te haereraa ïa i te haapiiraa evanelia, noa’tu e ua faaterehia te reira i te po‘ipo‘i roa. Te oreraa e faahoa e tae noa’tu i te 16raa o to’u matahiti. Oia hoi te oraraa i te ture no te viivii ore e ere roa hoi te reira i te tahi mea auhia e te taata aore râ matauhia i rotopu i to’u mau hoa, o te tahi râ mea ta’u i ite e nehenehe ta’u e rave no te mea ua fafau vau i te Fatu e e na reira vau.
Ua haapuai te tai‘oraa i te mau papa‘iraa mo‘a i te haapiiraa evanelia e o vau iho i ta’u faaotiraa ia ora i te hoê oraraa mâ e te viivii ore. Te haamana‘o nei au i to’u iho faauru-raa-hia e na faehau itoito e 2000. Mai tei parauhia i roto i te Alama 53:20-21, « ua itoito roa teie feia apî tamaroa, e aita ana‘e i te puai, te itoito, e te măta’u ore ; inaha râ, te vai ra te parau ; e taata haavare ore ratou i te mau mea atoa e poro‘ihia ratou ra. … E taata parau mau ratou e te haapa‘o maitai, i haapiihia hoi ratou ia haapa‘o i te mau faaue a te Atua, e ia haere i mua ia’na ma te ti‘a ». Ua hinaaro atoa vau ia haapa‘o i te mau mea atoa tei horo‘ahia mai ia’u, e tae noa’tu i ta’u mau fafauraa no te bapetizoraa.
Ua tae mai te tahi atu â iteraa no ni‘a i te mau fafauraa i to’u pii-raa-hia ia tavini i roto i te Misioni no El Salvador San Salvador Hitiaa o te Râ. I to’u fariiraa i to’u oro‘a i roto i te hiero ua tae mai i roto i to’u feruriraa te Parau Haapiira e te Parau Fafau 82:10 : « Ua ruuruuhia vau, o te Fatu, ia rave outou i te mea ta’u i parau ra ; ia ore râ outou ia rave i ta’u i parau ra, e ore ïa ta outou e fafauraa i reira ». I roto i te taatoaraa o ta’u misioni, na te tufaa i roto i te mau fafauraa o te na ô ra e, e rave tatou i ta tatou tufaa e e rave te Fatu i ta’na iho, i tura’i ia’u ia faaitoito maitai. A na reira ai au, ua haamaitaihia to’u mau hoa misionare e o vau nei i roto i ta matou ohipa.
Ua oti ta’u misioni e rave rahi mau matahiti i teie nei, te tamau noa nei râ vau i te imi i te puai na roto i te haapa‘oraa i ta’u mau fafauraa. Ua haamaitaihia vau mai taua taime ra i te taviniraa e hitu matahiti i roto i te Hiero no San José Costa Rica. Ua horo‘a mai te taviniraa ei rave ohipa no te hiero ia’u i te mau rave‘a tamau no te haamana‘o i te mau fafauraa ta’u i rave. Ua ite atoa vau i taua huru faahaamana‘oraa ra a tavini ai au i roto i te Pŭpŭ a te Feia Apî Tamahine, i reira hoi au i te tamataraa i te haapii i te faufaa rahi o te mau fafauraa mai ta to’u feia faatere i haapii mai ia’u.
E ere te haapa‘oraa i ta tatou mau fafauraa i te mea ohie i te mau taime atoa. Ei hi‘oraa, te hi‘o nei te mau taata e rave rahi i te ture no te viivii ore (aore râ, i te tahi mau taime, te peu faaroo) ei ohipa tahito. Aua‘e râ, aita vau e farii nei i te tahi atu faaheporaa na roto mai i te feia o te ore e farii nei i ta’u mau ti‘aturiraa aore râ na roto i te maoraraa o te tau. Te hi‘o nei au i muri i te mea ta’u i ite ei feia apî tamahine a faaitoito ai to matou feia faatere ia matou ia faaineine e ia ora no te mau fafauraa no te hiero. Te faotiraa ta’u i rave i taua taime ra o te fafauraa ïa ta’u e pee nei e tae noa mai i teie mahana.
Te ti‘a papû nei au i roto i ta’u mau faaotiraa no te mea e ere te reira i te mau faaotiraa ta’u i rave o vau ana‘e iho, no’u iho. E mau faaotiraa râ ta’u i rave ei tufaa no te hoê fafauraa e te hoê Metua Here i te Ao ra. Eita i te mea faufaa te mea ta to te ao e parau nei. Ua fafau vau i te Fatu e e haapa‘o vau i Ta’na mau faaueraa. E ohipa ïa no te tura. Te mau fafauraa ta’u i rave i to’u bapetizoraa e te mau fafauraa ta’u i rave i roto i te hiero te vai mana noa ra ïa i teie mahana mai te mahana i rave ai au i te reira. E mea mure ore te hoê fafauraa e te Atua.
Te oraraa mai ta te Atua i ani ia tatou ia ora e ere ïa i te mea ohie i te mau taime atoa, te faaite papû atu nei râ vau e e nehenehe ia na reira. E nehenehe ta tatou e farii i te ti‘aturiraa e te mana na roto i te haapa‘oraa i ta tatou mau fafauraa, e e nehenehe ia papû ia tatou e e ore roa to tatou Metua i te Ao ra e vaiiho ia tatou o tatou ana‘e ra. Mai Ia’na i to tatou pae, e nehenehe ta tatou e rave i te mau mea atoa (a hi‘o Moroni 7:33).
Te mau fafauraa ta’u i rave i to’u bapetizoraa e te mau fafauraa ta’u i rave i roto i te hiero te vai mana noa ra ïa te reira i teie mahana mai te mahana i rave ai au i te reira.
Mau faahoho‘araa na Scott Greer