Te Mana no te Papa‘iraa Mo‘a
I te tamataraa na taure‘are‘a Tahiti e piti i te mau papa‘iraa mo‘a, ua taui to raua oraraa.
Aita o Rooma i hinaaro roa i te tai‘o i te mau papa‘iraa mo‘a. Aita o Vaitiare i hinaaro roa i te haere i te haapiiraa evanelia. E aita raua i titauhia ia na reira. I to raua râ ma‘itiraa ia na reira, ua taui to raua oraraa.
Eaha ïa e ore ai ?
No teaha ïa te hoê taure‘are‘a e ma‘iti ai i te rave e piti hora i te mau pô Mahana Maha atoa no te tai‘o i te mau papa‘iraa mo‘a e to’na mama ? Hoê matahiti a‘enei ua uiui atoa paha o Rooma Terooatea, no Tahiti, i teie huru uiraa.
I teie nei e nehenehe ta’na e ui no teaha te hoê taure‘are‘a e ma‘iti ai eiaha e tai‘o i te mau papa‘iraa mo‘a ?
I roto i na matahi e toru no te haapiiraa evanelia aita roa’tu Rooma i tau‘a mau ia faataa ana‘e to’na mau orometua haapii i te mau papa‘iraa mo‘a no te tai‘o no te haapiiraa i mua’tu. « Aita vau i hinaaro i te tai‘o i te reira », ua parau mai oia. « Aita mau te mau papa‘iraa mo‘a i faanaanatae ia’u ».
Ua uiui râ oia no teaha râ te feia faatere no te Ekalesia i roto i ta’na paroita e ta’na tĭtĭ e faaohipa ai i te mau taime atoa i te mau papa‘iraa mo‘a i roto i ta ratou mau a‘oraa e haapiiraa. Ua hi‘opo‘a oia i to’na feia faatere. Ua ite oia e mea ohie roa na to’na peresideni tĭtĭ ia faahiti mai roto mai i te mau papa‘iraa mo‘a.
No reira a vahi ai te Tĭtĭ no Faaa Tahiti i te mau piahi no te haapiiraa evanelia i roto i te mau pŭpŭ no te tata‘u i te mau papa‘iraa mo‘a i roto i ta’na matahiti hopea no te haapiiraa evanelia, ua faaoti o Rooma i te tamata i te mau papa‘iraa mo‘a.
Mea na reira ïa te mau tai‘oraa i te mau hebedoma atoa e to’na metua vahine i te haamataraa. I te mau pô Mahana Maha atoa e tai‘o amui raua no te tatauraa i roto i te piha haapiiraa no te po‘ipo‘i a‘e, ma te haapii tei hea te mau irava faufaa rahi e ma te tamau aau e rave rahi mau papa‘iraa mo‘a.
E tera ïa te taime i haamata ai te mau mea atoa e taui no Rooma. Ua haapuai ta’na tai‘oraa i te mau papa‘iraa mo‘a i to’na auraa e to’na mama. Ua haamata oia i te ite i te auraa e vai nei i roto i te mau mea ta te mau papa‘iraa mo‘a e haapii nei e te mau mea e tupu nei i roto i te ao nei i teie mahana. A pure ai oia no ni‘a i te mau mea ta’na e tai‘o ra, ua ite a‘era oia e no ô mai te reira i te Atua ra.
Ua tauturu atoa te reira ia’na ia arata’i i ta’na pŭpŭ i te rê i roto i te tata’uraa no te mau papa‘iraa mo‘a i roto i te tĭtĭ.
Ua ite Rooma i roto i te mau haamaitairaa ta’na i farii, i te hoê haapiiraa ta’na i haapii mai i roto i ta’na tai‘oraa. Ua parau Rooma, « I roto i te Mosia 2:24 ua haapii te Arii Beniamina e ia ma‘iti ana‘e tatou i te rave i te mea ta te Fatu e ani mai, e haamaitai-oioi-hia tatou ». Te hoê o te mau haamaitairaa rahi roa‘e ta’na i farii o teie ïa, « i muri a‘e i to’u tai‘oraa i te mau papa‘iraa mo‘a i teie matahiti, ua ite au e e parau mau te Buka a Moromona ».
Eiaha e Parau mai Ia’u Eaha te Rave
I te haamataraa o te matahiti haapiiraa, e ere o Vaitiare Pito i te melo no te Ekalesia. Nahea ïa te hoê melo apî tei ore i haere noa‘e i te haapiiraa evanelia na mua‘e i tauturu ai i ta’na pŭpŭ ia rê i te tatauraa no te mau papa‘iraa mo‘a no te tĭtĭ no Faaa ?
Ua parau oia e « Aita vau i haape‘ape‘a no to’u matau ore i teie ohipa ». « Ua haapii mai au e rave rahi o taua mau irava ra i roto i te mau haapiiraa a te mau misionare ».
Ua amui atu te rahiraa o te utuafare o Vaitiare i te Ekalesia i muri a‘e i te poheraa – mana‘o- ore-hia o to’na metua tane e ua tono te faatere misioni paroita i te mau misionare i te utuafare o Vaitiare. Ua paraparau ratou no ni‘a i te hoêraa o te utuafare e te vai amui-noa-raa e amuri noa’tu. Ua parau oia, « Ua afa‘i mau mai te reira i te hoê tauiraa i to matou utuafare.
Area râ, aita te reira i taui i te haerea ti‘amâ o te hoê taure‘are‘a e 17 matahiti. Ua parau oia e « I muri a‘e i to’u bapetizo-raa-hia ua parau mai te mau taata atoa ia’u e e ti‘a ia’u ia haere i te haapiiraa evanelia. « Aita vau e au ia parauhia vau i te mea e ti‘a ia’u ia rave, no reira aita vau i haere oioi atu ».
I muri mai ua faaoti oia iho ia haere e ua ite oia e ua oaoa oia i te reira. Ua faataahia oia i roto i te pŭpŭ a Roma no te tata’uraa i te mau papa‘iraa mo‘a.
I te haamataraa aita oia i faaitoito i te tai‘o i te mau papa‘iraa mo‘a tei faataahia ia tai‘o. I to’na râ faaotiraa e e na reira oia, ua ite oioi oia i te mau haamaitairaa e rave rahi.
Ua parau oia,e « Ua riro te mau papa‘iraa mo‘a e tautururaa rahi ». « Ua haapii mai au na roto i te mau papa‘iraa mo‘a e rave rahi mau mea », mai te faufaa rahi no te pure e e pahono te Metua i te Ao ra i taua mau pure ra.
Ua haapii atoa oia e ia faaoti ana‘e oia i te rave i te tahi mea, mai te haereraa i te haapiiraa evanelia aore râ te tai‘oraa i te mau papa‘iraa mo‘a, e mea ohie a‘e ïa te tape‘araa i te faaotiraa i te raveraa’tu i te reira no te mea ua ti‘a ia’na ia na reira aore râ « ua mana‘ohia » ia na reira.
I teie nei ua hope te matahiti haapiiraa, ua mauruuru o Vaitiare e ua ma‘iti oia i te haere i te haapiiraa evanelia e ia tai‘o i te mau papa‘iraa mo‘a : « Ua ite au e ia tai‘o ana‘e tatou i te mau papa‘iraa mo‘a, e haamaitaihia tatou ».
A tere atu ai o Rooma Terooatea (i raro nei) e ta’na pŭpŭ piahi no te haapiiraa evanelia i te motu tapiri no Moorea (te pae aui) no te tamata i to ratou ite no ni‘a i te mau papa‘iraa mo‘a, e ere te hopearaa i te mea faufaa rahi roa – ua rê a‘ena Rooma.
I te taime ua faaoti o Vaitiare Pito no Tahiti i te tai‘o i te mau papa‘iraa mo‘a, ua haamata oia i te ite i te mau haamaitairaa.
Mau Hoho‘a na Adam C. Olson, maori râ tei faaitehia; i ni‘a: hoho‘a© iStock; hoho‘a no te tiare © iStock