Te Tapa‘o Faaite i roto i To’u Haamaitairaa

Na Scott Talbot

Ua tavini au i roto i te Misioni no Texas Houston Apatoa ei orometua reo Paniora. I te hoê mahana te patoto ra to’u hoa e o vau nei i ni‘a i te mau opani, ma te tamata i te imi i te tahi taata no te haapii. Ua tae atu maua i te hoê fare e e apoo rahi tei roto i te opani raau tei marau.

Ua iriti mai te hoê vahine paari i te opani e ua ani mai ia maua ia tomo atu. Aita vau i papu mai te mea ua ite mau ra anei oia e o vai maua e eaha ta maua e rave ra, tera râ ua farii maitai oia ia maua. Ua haamata maua i te haapii ia’na i te haapiiraa matamua, e e au ra e mea maitai roa te mau mea atoa. Aita i maoro roa ua tae i to’u taime no te haapii no ni‘a ia Iosepha Semita e te Orama Matamua. Ua hi‘o vau i te hoho‘a mata o te vahine i te faaiteraa i te tahi mana‘ona‘oraa rahi. E mea papû roa e aita oia e taa mau ra i te mea ta’u i tamata i te faataa atu ia’na.

I muri a‘e i to’u aniraa i te tahi mau uiuraa no ni‘a i te mau mea ta maua i haapii e tae noa’tu i taua taime ra e eaha te mau mea ta’na i maramarama, ua haamata vau i te mauruuru ore no te mea aita oia e taa ra i te parau no te Orama Matamua. E mahana roa ho‘i taua mahana ra, e te mea ta te hoê misionare e ore e hinaaro i te ite o te hoê ïa taata o tei ore i maramarama i te mea ta’na i hinaaro mau i te taata ia ite e e parau mau ïa.

I roto i te afa setoni noa ua haamata vau i te hee atu i roto i te riri, ua tae mai râ te hoê tufaa iti no roto mai i to’u haamaitairaa patereareha i roto i to’u feruriraa. O te tufaa ïa no ni‘a i to’u utuafare a muri a‘e o te a‘o mai ia’u ia haapii i ta’u mau tamarii i te mau parau tumu no te evanelia. A tae mai ai taua paratarafa ra i roto i to’u upoo, ua ite a‘era vau e te parau mai ra te Varua ia’u ia haapii i teie vahine haehaa mai te au e te haapii ra vau i te hoê tamarii.

Ua haamata ihora vau i te haapii ia’na na roto i te hoê huru ohie a‘e e na roto i te here. Ua faahoho‘a vau i roto i to’u feruriraa i ta’u iho mau tamarii i te parahiraa i roto i te piha ma te hi‘o mai ia’u, to ratou metua tane, a haapii ai au ia ratou no ni‘a i te Peropheta Iosepha Semita. E mea maere roa i te iteraa i te tauiraa i ni‘a i to’na hoho‘a mata. Ua pee to’na tu‘e mata i ni‘a, e ua haamata to’na na mata i te anaana. Ua riro to’na hoho‘a mata pe‘ape‘a ei hoho‘a mata anaanatae e te maere. A faati‘a ai au i te aamu no to te Metua i te Ao ra e o Iesu Mesia fâ raa ia Iosepha Semita, ua î to’na na mata i te roimata e ua tahe na ni‘a i to’na na papari‘a. Ua î te piha i te Varua, e ua riro to’u mauruuru ore ei oaoaraa rahi.

E ore roa vau e haamo‘e i teie ohipa tei tupu. I teie nei aita e nehenehe ia’u ia tia’i i te haapii i taua iho mau parau tumu ra i ta’u iho mau tamarii i te hoê mahana e ia ite faahou i taua oaoa ra.

Faahoho‘araa na Brian Call