O Le 400 Tausaga o le Tusi Paia E Sili ona Faailogaina i le Suesue Atili i Ai, o se Fautuaga Lea Mai Upu a Aposetolo
“E le o se mea faafuaveta pe faafuasei lo tatou maua o le Tusi Paia i le taimi nei,” Elder M. Russell Ballard o le Korama a Aposetolo e Toasefululua.1 Na ia faamatala mai ua i ai le Tusi Paia ona o le usiusitai o tagata amiotonu sa mulimuli i uunaiga e tusia aafiaga paia ma aoaoga, faapea foi le faatuatua ma le lototetele o isi, e aofia ai i latou na faaliliuina, o ē na tele mea na latou ositaulagaina e “puipuia ai ma faasaoina” le Tusi Paia.
O le aso 2 o Me 2011, e atoa i ai le 400 tausaga o le uluai Lomiga o le King James o le Tusi Paia. I le lalolagi atoa, ua faamanatuina ai e tagata le lomiga o le Tusi Paia e ala i mafutaga fetufaai, o faafiafiaga, konaseti, tauvaga lauga, ma isi mea. Ua fautuaina e uso o le Korama a Aposetolo e Toasefululua se isi auala e faailoga ai: e ala i le atiina ae o se fiafia mo le Tusi Paia a o tatou suesueina le soifuaga ma le galuega a le Faaola ma upu a perofeta ma aposetolo anamua.
“E tatau ona tatou matua faafetai mo le Tusi Paia,” na saunoa i ai Elder Ballard. “Ou te fiafia lava i le Tusi Paia, o ana aoaoga, o ana lesona, ma lona agaga. … Ou te fiafia i le muai vaaiga ma le filemu e maua mai i le faitauina o le Tusi Paia.”2
Na ioe i ai Elder Jeffrey R. Holland o le Korama a Aposetolo e Toasefululua. “Tatou te fiafia ma faaaloalo i le Tusi Paia,” na ia saunoa ai. “O loo faailoa muamua lava i le tuufaatasiga, o a tatou ‘tusitusiga faavae.’”3 Sa ia faamanatu mai ia i tatou na o’o mai le Toefuataiga ona sa suesue e Iosefa Samita le Tusi Paia, ma sa ia tuuina i ai le faatuatuaga i le folafolaga o loo i ai i le Iakopo 1:5 e faapea o le a tali mai le Atua i a tatou tatalo.
O le toe tomanatu i mea na tutupu na saunia ai le ala mo le Toefuataiga, sa saunoa ai Elder Robert D. Hales o le Korama a Aposetolo e Toasefululua, ma lona agaga faafetai mo i latou uma sa mafai ai ona maua le faaliliuga ma le lomiga o le Tusi Paia. Ona o la latou galuega, sa maua ai le Lomiga o le King James o le Tusi Paia mo soo se tasi e faitau ai—ma ona ua maua e Iosefa Samita, o lea na toefuatai mai ai le Ekalesia moni i le lalolagi. “Po o se mea ea e maofa ai, ona o le Lomiga a King James o le Tusi Paia faa-Peretania lea a le Ekalesia a Iesu Keriso o le Au Paia o Aso e Gata Ai i le taimi nei?” o le fesili lea a Elder Hales.4
“E tatau ona tatou manatua pea le toatele na maliliu fasia o ē na iloaina le mana [o le Tusi Paia], ma ē na tuuina atu o latou ola ina ia mafai ai ona tatou maua i ona upu le fiafia e faavavau ma le filemu o le malo o lo tatou Tama Faalelagi,” na saunoa i ai Elder Ballard.5
Sa faamatala e Peresitene Boyd K. Packer, Peresitene o le Korama a Aposetolo e Toasefululua, se tala e uiga i se Tusi Paia tuai ua faitau seneturi a se aiga, ma maua ai se faaupuga i luga o le itulau faaulutala e faapea, “O le tulaga sili ona faagaeetia e mafai e le Tusi Paia ona faia o le faaaogaina lea e le Tagata Faitau o ona aoaoga e avea ma se vaega taua o lona olaga.”6 Na sosoo ai ma lana mau lenei: “O outou o la matou tusi, o tusia i o matou nei loto, ua iloa ma faitaulia e tagata uma” (2 Korinito 3:2).
O le iloaina ma le fiafia i le Tusi Paia ma ona anotusi faatusi paia, e mafai ai ona tatou faaalia lo tatou talisapaia ma le olioli i faamanuiaga o le Toefuataiga o le talalelei.
“Mafaufau i le maoae o lo tatou faamanuiaga i le i ai o le Tusi Paia ma nisi itulau faaopoopo e 900 o tusitusiga paia,” na saunoa i ai Elder Elder D. Todd Christofferson. “Talosia ia tatou taumamafa ai pea lava pea i afioga a Keriso o le a ta’u mai ai ia i tatou uma mea e ao ina tatou faia.”7
O le Lomiga a King James o le Tusi Paia ua 400 nei tausaga, o loo uunaia ai pea lava pea tagata o le Ekalesia i le taimi nei.
© IRI