O Upu Musuia e uiga i se Galuega Musuia: O Saunoaga a Failauga e uiga i le Uelefea

E tele saunoaga o le Konafesi Aoao Lona 181 Faaletausaga a le Ekalesia sa saafi ai i le faamanatuina o le polokalama uelefea a le Ekalesia, lea ua faamanatu lona 75 tausaga.

O fa’ifa’iga nei mai saunoaga a failauga na taulai atu i le polokalama uelefea ma mataupu faavae o le uelefea na tuuina mai e le Alii e fesoasoani ai i Ana fanau, ia fesoasoani ia i latou lava.

Peresitene Thomas S. Monson

“Ou te tautino atu o le polokalama uelefea a Le Ekalesia a Iesu Keriso o le Au Paia o Aso e Gata Ai, e musuia e le Atua Silisiliese. (Tagai “O Le Malumalu Paia—O Se Sulu Ta’iala i le Lalolagi,” itulau 90.)

Peresitene Henry B. Eyring, Fesoasoani Muamua i le Au Peresitene Sili

“Ua toe oo mai foi i o tatou taimi ia tulaga manaomia ogaoga i le fanau a le Tama Faalelagi, e pei foi ona sa i ai, ma o le a i ai pea i taimi uma. O mataupu faavae i le faavaega o le polokalama uelefea a le Ekalesia, e le mo na o se taimi se tasi po o se nofoaga e tasi. E mo taimi uma ma nofoaga uma.”

“Sa valaaulia ma poloaiina i tatou [e le Alii] ina ia auai i le faatinoga o Lana galuega e sii a’e ai i latou o loo manaomia le fesoasoani. Ua tatou osia se feagaiga e faia lena mea, i le vai o le papatisoga ma totonu o malumalu paia o le Atua. Tatou te faafouina le feagaiga i Aso Sa pe a tatou aai ma feinu i le faamanatuga.” (Tagai “O Avanoa e Fai Ai Mea Lelei,” itulau 22.)

Epikopo H. David Burton, Epikopo Pulefaamalumalu

“O le fuafuaga faaperofeta o le uelefea, ua le na o se vaefaamatalaga manaia i le talafaasolopito o le Ekalesia. O mataupu faavae o loo faavae ai, ua faamanino mai ai lo tatou faasinomaga o se nuu. O le fatu lea o lo tatou faasinomaga o ni soo taitoatasi o lo tatou Faaola ma le faaa’oa’o, o Iesu le Keriso.”

“O lenei galuega paia ua le na ona faamanuiaina ai i latou o e puapuagatia po o e le tagolima. I le avea ai o ni atalii ma afafine o le Atua, e le mafai ona tatou maua le fuataga atoa o le ola faavavau e aunoa ma lo tatou matua tuuina atu o i tatou atoatoa i le tausiga o le tasi ma le isi a o tatou i ai i lenei lalolagi. O loo i ai i le faatinoga ma le agalelei o le ositaulaga ma le ofoina atu o i tatou lava i isi tatou te iloa ai mataupu faavae faaselesitila ma le faapaiaga.”

“O le galuega paia lenei a le Faaola o loo faamoemoe e fai e Ona soo. O le galuega sa fiafia o Ia i ai, a o femaliuai ai o Ia i le lalolagi. O le galuega ua ou iloa o le a tatou maua atu o Ia o fai pe a na faapea o i ai o Ia ma i tatou i le taimi nei.” (Tagai “O Le Galuega Faapaia a le Uelefea,” itulau 81.)

Silvia H. Allred, Fesoasoani Muamua i le Au Peresitene Aoao o le Aualofa

“O loo galulue faatasi alii ma tamaitai o le Ekalesia i le aumaia o le toomaga ia i latou e manaomia. A oo ina avea le alofa ma mataupu faavae taiala o lo tatou tausiga o isi, ona avea lea o la tatou auaunaga ia i latou ma faatinoga o le talalelei. O le talalelei i lona taimi e aupito sili ona manaia. O le amioatua e sili ona lelei lea.” (Tagai “O Le Fatu o le Avea ai ma Soo,” itulau 84.)