Ia Avea le Konafesi o se Vaega o o Tatou Olaga

Mafaufau e faaaoga nisi o nei gaoioiga ma fesili e fai ma se amataga o se talanoaga faaleaiga po o le mafaufau loloto i ai o le tagata lava ia a o e faia aoaoga o le konafesi aoao o se vaega o lou olaga.

E mafai ona e maua lauga o le konafesi aoao i le conference.lds.org.

Manatua: O numera o itulau o loo lisi atu i lalo e faailoa atu ai le itulau muamua o le lauga o loo ta’ua.

Mo Tamaiti

Na faasilasila mai e Peresitene Thomas S. Monson o le a fauina e le Ekalesia ni malumalu fou se tolu, ona atoa ai lea o le aofaiga e 160 o malumalu ua faaaoga, pe o fausia, pe ua faasilasila mai. Vaai i le faafanua e su’e ai Meridian, Idaho, Isa; Fort Collins, Colorado, ISA; Winnipeg, Manitoba, Kanata; ma le malumalu e pito i lata atu i lou aiga. Faitau pe toe faamatala nisi o tala na faamatalaina e Peresitene Monson e uiga i tagata faatuatua o le au paia, sa matua ositaulaga ina ia o ai i le malumalu (itulau 90). Fai ni sini e o i le malumalu i se taimi vave tou te mafaia, pe talanoaina ni auala e faatumau ai le agavaa e ulu atu i le malumalu.
A o ola ai Atamu ma Eva i le lalolagi, o se tasi o auala na la tapua’i ai i le Tama Faalelagi o le osia lea o taulaga i manu. Sa aoao mai e Elder L. Tom Perry sa folasia atu e le Faaola le faamanatuga i Ona soo i le aso Sapati, o se ituaiga fou o le tapua’i. Tatou te faaauau pea ona tapuai e ala i le aai ma feinu i le faamanatuga i le Sapati. Toe iloilo faaleaiga le lauga a Elder Perry (itulau 6) e aoao ai i ofu e fetaui ma le Aso Sa, ma isi auala e faamamalu ai le faamanatuga ma le Sapati.
Sa aoao mai e Elder D. Todd Christofferson o Iesu Keriso na faatonuina i tatou e tatau ona tatou taumafai ia faapei o Ia ma lo tatou Tama Faalelagi (itulau 97). O nisi taimi e “aoa’i” ai e lo tatou Tama Faalelagi Ana fanau, e fesoasoani ai ia tatou avea e faapei o Ia. Talanoaina po o le a le uiga o le aoai. Faitau pe toe faamatala le tala i le pupu vine na soona ola. Talanoa pe faapefea ona fesoasoani moni se faafitauli po o se toilalo, tatou te tutupu malolosi ma fua atili ai.
Na aoao mai e Elder Richard J. Maynes o aiga e mafai ona pei o ni maea (itulau 37). O le maea e tele ona manoa e vaivai pe a na o i latou, ae e malolosi pe a fili faatasi. E faapena foi, pe a faia e tagata uma o se aiga le mea sa’o ma fesoasoani le tasi i le isi, ona faamalolosia ai lea o tagata taitoatasi o le aiga ma tele atu mea e mafai ona fai nai lo mea na te mafaia na o ia. Tuu i tagata taitoatasi o lou aiga se fasi manoa po o se vulu. Talanoa i auala e auauna atu ai tagata taitoatasi ma faamalolosia isi tagata o le aiga. Ona vaai lea i le malosi o fasi manoa po o le vulu ina ua tuu faatasi.

Mo Le Autalavou

Pe o lava le lotogatasi o lau vasega po o le korama? A uma ona iloilo le lauga a Peresitene Henry B. Eyring ona talanoa lea e uiga i le lotogatasi (itulau 62), fai se lisi o mea e mafai ona e faia e aumaia faatasia ai le vaega.
Sa talanoa Elder Russell M. Nelson e uiga i le “ai filifili” e usitai (itulau 34). Talanoaina ma lou aiga, vasega po o le korama po o le a le uiga ae pe aisea foi e le aoga ai.
Sa faamatala e Elder M. Russell Ballard le alofa mama o Keriso o se alofa ola (itulau 46) e faaalia i taga faigofie o le agalelei ma le auauna atu. Fuafua se auala e mafai ai e lau vasega po o le korama ona faailoa atu le alofa i se tasi o lau uarota, paranesi, po o le nuu ona faatino lea o lau fuafuaga.
Sa faamatala e Elder Quentin L. Cook le tala i se tamai ato na maua ina ua uma se siva a le autalavou (itulau 18). O mea na maua e taitai i totonu o le ato, na tele ni mea na ta’u mai ai e uiga i le tamaitai talavou e ona ia. O a ni mea o ta’u mai e mea o i lau ato, lau atotupe, po o lau atoa’oga e uiga ia te oe, a o a foi ni suiga e te ono manao e fai i mea o loo e teuina?
Na talanoa Elder Lynn G. Robbins e uiga i le avea atili e faapei o le Faaola (itulau 103). Mafaufau po o le a le uiga o le ia faapei o Iesu Keriso nai lo le na ona faia o mea ua Ia poloai mai ai. Ona mafaufau lea po o a suiga e mafai ona e faia i lou olaga ia avea atili ai e faapei o le Faaola.

Mo Tagata Matutua

Na faamatala mai e Peresitene Dieter F. Uchtdorf (itulau 58) se tala e uiga i se tamaloa sa ola i lalo ifo o ona avanoa ina ua ia misia le tele o gaoioiga ma meaai lelei sa ofo atu e le vaa folau na ia malaga tafao ai, ona sa na le iloaina e aofia ai nei mea uma i le tau o lana pepa malaga. Talanoaina ma tagata o le aiga o loo umia le perisitua, ni auala e mafai ona latou ola ai e tusa ai ma o latou “avanoa pe a oo i le mana paia, meaalofa, ma faamanuiaga ua [latou] maua ai le avanoa ma le aia tatau o ni ē umia le perisitua a le Atua.”
Na aoao mai Peresitene Boyd K. Packer e uiga i le mana o le loto faamagalo atu (itulau 30). Pe o i ai ni tagata e tatau ona e faamagalo atu i ai, pe o i ai ni aafiaga le lelei e tatau ona “ia … lafoaia”? Saili le fesoasoani a le Alii i le sailia o le filemu ma le mana o le faamagalo atu.
Sa faamatala e Elder Richard G. Scott le ala na faaalia ai e ia ma lona faletua, o Jeanene, le alofa faamemelo e ala i le faia o ni nai tusiga e le tasi i le isi (itulau 94). Mafaufau e tusi sina tusi e ta’u ai le tele o lou alofa ma lou talisapaia o lou toalua. Tuu i se mea o le a maua ai e lou toalua.
Na sii mai e Elder David A. Bednar se aafiaga o Peresitene Iosefa F. Samita na maua ai se molimau (itulau 87). Toe iloilo lenei tala ma mafaufau po o a ni aafiaga na uunaia ai lau molimau.

Ljubljana, Slovenia

Coatzacoalcos, Mexico