Mana o le Perisitua
Ia amata atu nei ma aso uma ona avea i tatou ma e agavaa e umia le mana paia o le perisitua ua tatou tauaveina. Ia faamanuiaina ai ō tatou olaga, ma ia tatou faaaogaina e faamanuia ai olaga o isi.
Sa ou tatalo ma suesue i ni taimi uumi e uiga i mea ou te talanoa atu ai i le po nei. Ou te le manao e faatiga i se tasi. Sa ou mafaufau, “Po o a o tatou luitau o i ai? Po o a mea ou te feagai i aso taitasi e afua ai ona ou tagi i nisi taimi i le tuneva o le po?” Sa ou mafaufau o le a ou taumafai e talanoa i nisi o na luitau i le po nei. O nisi o le a faatatau i alii talavou. O nisi o le a faatatau ia i latou e faaleogalua. O nisi o le a faatatau ia i latou i luga a’e o le taulotoaiga o le soifua. Tatou te le talanoa e uiga i toeaiina ma olomatutua.
Ua tatou faalogologo i ni savali matagofie ma le talafeagai e faatatau i le perisitua a le Atua. Ua siitia ma musuia lava au faatasi ma outou.
O le po nei ou te manao e talanoa atu i mataupu ia ua fou lava le mamafa i lo’u mafaufau ma ua ou lagona le uunaiga e faasoa atu ia te outou. Pe o le a lava le ala o i ai, e fesootai uma lava i le agavaa patino e manaomia e maua ai ma faaaogaina le mana paia o le perisitua lea tatou te umia.
Sei ou amata i le faitau atu ia te outou mai le vaega e 121 o le Mataupu Faavae ma Feagaiga:
“O aia tatau a le Perisitua e faafesootaiina e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi tau lava o mataupu faavae o le amiotonu.
“E moni lava e mafai ona tuuina mai ia i tatou; a e pe a tau ufiufi a tatou agasala, pe faamalie lo tatou loto maualuga, lo tatou fia sili le aoga, pe faatonuina pe pulea pe faamalosia i agaga o le fanau a tagata, i soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata.”1
Uso e o le afioga tonu lava lena a le Alii e faatatau i Lana pule paia. E le mafai ona tatou masalosalo i lenei matafaioi ua tuuina e lenei [poloaiga] i o tatou luga taitoatasi o e ua umiaina le perisitua a le Atua.
Ua tatou o mai i le lalolagi i taimi faigata. O tulaga faatonuina o le mama o le toatele o tagata ua faatupulaia pea le suia i se tulaga e “soo se mea lava e lelei.”
Ua lava le umi ua ou ola ai e molimauina ai le tele o le suiga o le uiga mama o malo. I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se vā tēle i lo tatou va, ma o loo faatupulaia pea lena va.
O le tele o ata tifaga ma televise o loo faaalia ai ata o uiga ia e faasagatau tonu lava i tulafono a le Atua. Aua nei noatiaina oe lava ia i mea eleelea taumatemate ma manino ia e masani lava ona maua iina. O upu i le tele o musika o aso nei ua i ai foi i le faavasegaga lava lea e tasi. O gagana masoa ua matua taatele ia i tatou i aso nei sa lei taliaina i se taimi e lei mamao tele atu. Ua fai pea lava pea le ta’u fua o le suafa o le Alii. Tatou tomanatu faatasi i le poloaiga—le tasi o le sefulu—ia na faaali atu e le Alii ia Mose i luga o le Mauga o Sinai: “Aua e te ta’u fua le suafa o Ieova lou Atua; aua e le faasaoina e Ieova o le ta’u fua i lona suafa.”2 Ou te faanoanoa lava i soo se tasi o i tatou ua noatia i gagana masoa, ma ou te aioi atu ia te outou ia aua le faaaogaina. Ou te aioi atu ia te outou ia aua nei tautala ai pe faia soo se mea tou te le mitamita ai.
Ia matuai alu ese lava mai ponokarafi. Aua lava e te faatagaina oe e matamata i ai. Ua faamaonia lona avea ai ma se vaisu lea e matuai faigata lava ona faatoilaloina. Aloese mai le ava malosi ma le tapaa po o soo se isi lava fualaau faasaina, e faapena foi vaisu ia o le a faigata ona e faatoilaloina.
O le a le mea o le a puipuia oe mai le agasala ma le leaga ua siomia ai oe? Ou te folafola atu o se molimau malosi o lo tatou Faaola ma Lana talalelei o le a fesoasoani e taitai oe i le saogalemu. Afai e te lei faitauina le Tusi a Mamona, faitau i ai. Afai e te faia ma le agaga tatalo faatasi ai ma se manao faamaoni ia iloa le moni, o le a faaali atu e le Agaga Paia lona moni ia te oe. Afai e moni—ma e moni lava—o lona uiga o Iosefa Samita o le perofeta na vaai i le Atua le Tama ma Lona Alo o Iesu Keriso. E moni le Ekalesia. Afai e te lei maua lava se molimau o nei mea, ia e faia mea e tatau ai ina ia maua ai se molimau. E taua mo oe le i ai o sau lava molimau, aua o le molimau a isi e faatapulaa lona aoga mo oe. A maua loa, e manaomia e se molimau ona faatumauina le taūa ma le ola e ala i le usitai i poloaiga a le Atua faapea ma le tatalo e le aunoa ma le suesue i tusitusiga paia. Toaga i le Lotu. O outou alii talavou ia auai i le seminare po o le inisitituti pe afai o fai ia te outou.
Afai o i ai se mea e le talafeagai i lou olaga, ua i ai se auala e faatoilaloina ai.Ia taofi soo se amioletonu.Talanoa i lou epikopo. Pe o le a lava le faafitauli, e mafai lava ona faaleleia e ala i le salamo tatau. E mafai ona toe faamamaina oe. Na fetalai atu le Alii ia i latou o e salamo, “E ui lava ina pei o ofu mumu a outou agasala, e sisina ia e pei o le kiona,”3 “ma o au, le Alii, ou te le toe manatua lava.”4
Na faamatala e le Faaola o tagata, o ia lava sa i ai i le lalolagi ae lē o se tasi o le lalolagi.5 E mafai foi ona tatou i ai i le lalolagi ae le o ni o le lalolagi pe a tatou teenaina manatu faavae sese ma aoaoga sese ma tumau ma le faamaoni i mea ua poloaiina ai i tatou e le Atua.
Ua tele ina ou mafaufau i lenei taimi e uiga ia te outou alii talavou ua i ai i se tausaga e faaipoipo ai ae e le o lagonaina lava le fia faaipoipo. Ua ou vaaia tamaitai talavou tausaafia ua mananao e faaipoipo ma fai ni aiga, ae o o latou avanoa ua faatapulaaina ona o le toatele o alii talavou ua tolopoina ia faaipoipoga.
E le o se faafitauli fou lenei. Ua tele aoaoga e faatatau i lenei mataupu na tuu mai e peresitene ua mavae o le Ekalesia. Ou te faasoa atu ia te outou tau lava o se tasi pe lua ni faataitaiga o a latou fautuaga.
Na saunoa mai Peresitene Harold B. Lee, “Tatou te le o faia o tatou tiute o e umiaina le perisitua pe a tatou te’a ese ma le vaitausaga e faaipoipo ai ma taofia i tatou lava mai se faaipoipoga faamamaluina i tamaitai tausaafia.”6
Na saunoa mai Peresitene Gordon B. Hinckely i le mea lenei: “E momomo lava lo’u loto i le alofa i … o tatou tuafafine nofofua, ua leva ona fia faaipoipo ae ua le maua se tasi. … E laitiiti lava lo’u alofa mo alii talavou, o e ua latou faia e tusa ma tu a lo tatou malo, ua i ai le filifiliga latou te faia ai le laasaga muamua i mataupu faapenei, ae ua latou le faia i le tele o taimi.”7
Ou te iloa o loo tele lava mafuaaga atonu o loo outou faatuai ai ona laasia lena laasaga o le faaipoipoga. Afai o loo e popole e uiga i le tausiga i mea tau tupe o se ava ma se aiga, ou te fia faamautinoa atu ia te oe e leai ma se maasiasi i se ulugalii o loo tau faasoasoa tatau ma teu se tupe. O le mea masani lava i le taimi o nei luitau o le a oulua tuputupu ae ai faatasi ma le vavalalata a o oulua aoao e ositaulaga ma faia ni faaiuga faigata. Atonu o loo e fefe i le faia o se filifiliga sese. I lenei mea ou te fai atu e manaomia ona e faatinoina le faatuatua. Saili se tasi e mafai ona tutusa lelei ma oe. Ia iloa foi o le a e le mafai ona e muai iloa uma luitau o le a tulai mai i se faaipoipoga, ae ia e mautinoa e toetoe lava o soo se mea e mafai ona foiaina pe afai e te magafagafa ma pe afai foi ua e tautino atu ia aoga le lua faaipoipoga.
Atonu o loo e fiafia tele foi i le avea ma se tagata nofofua, malaga tafao soona fai, faatauina o taavale taugata ma meataalo ma ua na o lou olioli i le olaga saoloto ua e masani ai ma au uo. Sa matou fetaiai ma ni vaega o outou o loo feofeoa’i solo, ma ou te tautino atu ou te tuufesili pe aisea tou te le o tafafao ai ma ni tamaitai talavou lelei.
Uso e, o loo i ai se vaipanoa lea e tatau ona i ai se taimi e mafaufau loloto ai e uiga i se faaipoipoga ma le sailia o se soa e te fia manao e faatasi i ai i le faavavau. Afai e te filifili ma le atamai, ma afai e te tautino atu i le manuia o lau faaipoipoga, e leai ma se isi mea o lenei olaga o le a aumaia ia te oe se fiafiaga sili atu.
Pe a e faaipoipo, o le a e manao e faaipoipo i le Maota o le Alii. Mo outou o loo umiaina le perisitua, e le tatau lava ona i ai se isi filifiliga. Ia faaeteete, ina nei e faaumatiaina lou agavaa e te faaipoipo ai. E mafai ona oulua tausia le lua mafutaga i totonu o tuaoi talafeagai a o oulua maua se taimi fiafia.
O lea, uso e, ou te liliu atu i se isi mataupu lea ua uunaia ai au ou te lauga atu ai ia te outou. I totonu o le tolu tausaga talu ona lagolagoina au o se Peresitene o le Ekalesia, ou te talitonu o se tiutetauave sili ona faanoanoa ma silisili ona faalotovaivai ua ou maua, o le taulimaina lea o le faaleaogaina o faamauga. O faamauga taitasi uma sa tomua e se faaipoipoga fiafia i le Maota o le Alii, lea sa amatalia faatasi ai e se ulugalii tausaafia se olaga fou ma tulimatai atu i le faatasi ai o le tasi ma le isi i le faavavau atoa. Ona mavae atu lea o masina ma ni tausaga, po o le a lava le mafuaaga, ua mate ai le alofa. Atonu o ni faafitauli tau tupe, leai o se fesootaiga, lē puleaina o le ita, o le aia fua o aiga faaletulafono, ua utia i agasala. E tele lava mafuaaga o i ai. I le tele o tulaga, o le tetea e le o le tali lea.
O le tele naua o talosaga mo le faaleaogaina o faamauga e sau mai tamaitai ua taumafai ma le naunautai ina ia manuia le faaipoipoga ae, i le auiliiliga mulimuli, ua ia le mafai ona faatoilaloina ia faafitauli.
Filifili ma le faaeteete i le agaga tatalo se soa; ma pe a e faaipoipo, ia matuai faamaoni aiai le tasi i le isi. O le fautuaga le mafaatauina e sau mai se tamai ata teuteu sa ou vaai ai i le fale o se toeaina ma le olomatua o lo matou aiga. E faitauina faapenei: “Filifili lē e te alofa i ai; alofa i lau filifiliga.” O loo i ai se atamai sili i na upu. O le tautinoga i le faaipoipoga e matuai taua lava.
O lau ava o lau paga tutusa lea. I le faaipoipoga e le sili atu le tasi pe faatauvaa foi i le isi. E te lua savavali i autafa o le tasi o se atalii ma se afafine o le Atua.E le tatau ona e faalumaina pe faatiga ia te ia ae tatau ona e faaaloalo ma alofa i ai. Sa saunoa mai Peresitene Gordon B. Hinckley, “Soo se alii i lenei Ekalesia e … na te faaalia le pule amioletonu i [lana ava], e le agavaa o ia na te umia le perisitua. E tusa lava pe ua uma ona faauuina, e punitia lava le lagi; e tiga le Agaga o le Alii, e amene i le pule po o le perisitua o lena tagata.”8
Na saunoa Peresitene Howard W. Hunter e uiga i le faaipoipoga: “O le faaipoipo ma le fiafia ma le faamanuiaina e masani lava e le o se mataupu tele e uiga i le faaipoipo i le tagata sa’o aua o tagata sa’o lea.” Ou te fiafia i lena faaupuga. “O taumafaiga ma le manatu i ai ia faia atoa le vaega a le tagata, o le elemene aupito sili lea e saofagā ai i le manuia.”9
I le tele o tausaga ua mavae i le uarota sa ou pulefaamalumalu ai o se epikopo, sa i ai se ulugalii e masani lava ona i ai ni o la feeseeseaiga ogaoga. Na mautinoa lava e i la’ua ō la tulaga. E leai ma se tasi o i la’ua e fia toilalo. A le taua’imisa, la te faatumauina se mea ou te ta’ua o se filemu faapopoleina.
I se tasi vaveao i le 2:00a.m. Sa telefoni mai ai le ulugalii. Sa la mananao matou te talanoa, ma sa la mananao e talanoa i le taimi lava lea. Sa ou oso ese ma le moega, fai lo’u ofu ma alu atu loa i lo la fale. Sa nonofo faafesagai i la’ua o le tasi i le tasi pito ma le isi i le isi pito o le potu e le o fia talanoa le tasi i le isi. Na fesootai atu le ava i lana tane i le talanoa mai ia te au. Ona tali atu lea o le tane ia te ia i le talanoa mai ia te au. Sa ou faapea ifo, “O le a faapefea ona matou tuufaatasia lenei ulugalii?”
Sa ou tatalo mo se musumusuga, ma na oo mai se manatu ia te au e fesili atu i ai. Sa ou fai atu, “O le a se umi talu ona oulua auai atu i le malumalu ma molimauina se faamauga o le malumalu?” Na la tautino mai ua fai si leva. Ae o i laua o ni tagata agavaa na umiaina pepa faataga o le malumalu ma sa malaga lava i le malumalu ma faia sauniga mo isi.
Sa ou fai atu i ai, “E mafai ona tatou o ma a’u i le malumalu i le taeao o le Aso Lulu i le itula e valu? O le a tatou molimauina ai se faamauga iina.”
Sa la fai mai faatasi, “O le sauniga a ai?”
Sa ou tali atu, “Ou te le iloa. E mo soo se isi lava o le a faaipoipo i lena taeao.”
I le Aso Lulu na sosoo ai i le itula atofaina na matou feiloai ai i le Malumalu o Sate Leki. O i matou e toatolu na o atu i se tasi o potu o faamauga matagofie, e aunoa ma se iloa o ē na i ai i totonu o le potu sei vagana ai Elder ElRay L. Christiansen, sa avea i lena taimi ma se Fesoasoani i le Korama a le Toasefululua, o se tofiga o le au pulega aoao sa i ai i lena taimi. Na fuafua Elder Christiansen e faatino se sauniga o le faamauga mo se tamaitai ma se alii faaipoipo i lena potu i lena taeao. Sa ou mautinoa lava sa manatu le tamaitai faaipoipo ma lona aiga, “Masalo o uo nei a le tama faaipoipo,” ma sa manatu foi le aiga o le tama faaipoipo, “Masalo o uo nei a le tamaitai faaipoipo.” Sa nonofo la’u ulugalii i luga o se tama’i nofoa umi pe ā ma se futu (0.6 m) e la te va ai.
Na amata e Elder Christiansen i le tuuina mai o fautuaga i le ulugalii o loo faaipoipo, ma sa ia faia i se ala matagofie. Na ia ta’ua le auala e tatau ona alofa ai le tane i lana ava, le auala e tatau ona taulima ai o ia i le faaaloalo ma le migao, ma faamamaluina o ia o le fatu o le aiga. Ona ia talanoa atu lea i le tamaitai faaipoipo i le auala e tatau ona ia faamamaluina ai lana tane o le ulu o le aiga ma avea o se lagolago ia te ia i auala uma.
Sa ou matauina a o saunoa Elder Christiansen i le tamaitai ma le alii faaipoipo, sa amata ona soso le tasi o la’u ulugalii i le isi. E lei pine ae nofo le tasi i talaane o le isi. O le mea na faafiafiaina ai au ona sa la tau fai minoi uma i le fua e tasi.E maea ifo le sauniga, ua nonofo vavalalata la’u ulugalii ua pei i laua o le ulugalii fou faatoa faaipoipo. Sa mata fiafia uma.
Na matou tuua le malumalu i lena aso ma e leai lava ma se tasi na silafiaina pe o ai i matou ae pe aisea foi na matou o mai ai, ae sa uulima a’u uo a o la savavali mai i fafo o le faitotoa. Ua faataatia ese o la’ua eseesega. E lei i ai ma sa’u tala se tasi na manaomia ona fai. Ua outou silafia la, na la manatuaina lo la’ua aso o le faaipoipoga ma feagaiga na la osia i le Maota o le Atua. Sa tautino mai i la’ua o le a toe amataina ma taumafai malosi e amata atu i lena taimi.
Afai e i ai se tasi o outou o i ai se faafitauli i lana faaipoipoga, ou te augani atu ia te oe e faia mea uma e te mafaia e faia ai soo se mea lava e tatau ona faaleleia, ina ia e fiafia ai e pei lava ona sa i ai i le amataga o la oulua faaipoipoga. O i tatou ua faaipoipoina i le Maota o le Alii, ua faia mo le olaga nei ma le faavavau atoa, ona tatau lea ona tatou faia taumafaiga talafeagai e avea ai ma se faaipoipoga e faavavau. Ua ou iloa o loo i ai ni tulaga ua le mafai ai ona faasaoina ni faaipoipoga, ae e malosi lava lo’u lagona e mo le tele o vaega e mafai lava ma e tatau lava ona faasaoina. Aua nei tuua lau faaipoipoga i se tulaga e lamatia ai.
Ua tuu mai ia i tatou taitoatasi o loo umiaina le perisitua a le Atua ina ia puleaina i tatou lava ina ia mafai ai ona tatou tutu i luga a’e o ala o le lalolagi. E taua lo tatou avea ma ni alii faamamaluina ma le faamaoni. O a tatou amioga e le tatau ona faitioina ai i tatou.
O upu tatou te tautatala ai, le ala tatou te taulimaina ai isi ma le ala tatou te ola ai e aafia uma ai lava lo tatou taūa o ni alii ma ni taulelea o loo umia le perisitua.
O le meaalofa o le perisitua e le mafaatauina. O loo tauave faatasi ai ma le pule e galue ai o se auauna a le Atua, e faamanuia ai e mama’i, e faamanuia ai o tatou aiga ma faamanuia ai foi isi. O lana pule e mafai ona oo i talaatu o le veli o le oti, ma oo atu ai i le ‘faavavau. “E leai se isi mea e faatusalia i ai i lenei lalolagi atoa. Puipui i ai, faapelepele i ai, ola agavaa ai.”10
Ou uso pele, ia taialaina outou e le amiotonu i a outou laasaga uma a o tatou faimalaga ai i lenei olaga. Ia amata atu nei ma aso uma ona avea i tatou ma e agavaa e umia le mana paia o le perisitua ua tatou tauaveina. Ia faamanuiaina ai ō tatou olaga, ma ia tatou faaaogaina e faamanuia ai olaga o isi, e pei ona faia e Ia o Lē na soifua ma maliu mo i tatou—o Iesu Keriso, lo tatou Alii ma le Faaola. O lau tatalo lea, i Lona suafa paia ma le mamalu, Amene.