O Le Tupe Faaagaga mo Aoga ua Faataunuuina ai Folafolaga Faaperofeta
O le sefulu tausaga talu ai, na otooto mai ai e Peresitene Gordon B. Hinckley (1910–2008) se faafitauli—o le le mafai lea e le toatele o faifeautalai ua uma mai misiona ma isi talavou agavaa i eria tau atia’e ona sosola ese mai le mativa—ma sa tuuina mai ai se vaifofo: o le Tupe Faaagaga mo Aoga (TFA). O se tupe taavilivili o le a amatalia e faaaoga ai foai mai tagata o le au paia ma uo a le Ekalesia, o le TFA o le a maua ai faaunegatupe mo a’oga a tupulaga talavou, faatasi ai ma le faamoemoe o le a latou saunia mo ni galuega lelei i o latou nuu ma toe totogi ai faaunegatupe ina ia mafai ai e isi ona maua foi nei avanoa. Na ia saunoa o le a faalagolago le Ekalesia i tagata e ofofua mai ma punaoa o i ai a le Ekalesia ina ia manuia.
Ua Tutupu Vavega
Ina ua susū atu Peresitene Hinckley i le pulelaa i le aso 31 o Mati, 2011, ma fofola mai se vaaiga mamao i le Tupe Faaagaga mo Aoga i luma o le au perisitua a le Ekalesia, sa manino i le toatele ua maua e le perofeta a le Alii se tomatauga.
Atonu na foliga taufaamatau le ono alia’e mai o le le gafatia ina ua topelau e taitai na filifilia o le TFA ona amata tuuina atu faaunegatupe i le tautoulu o le 2001, e pei ona faatonuina ai e Peresitene Hinckley. E le gata i le otootoga musuia a le perofeta, sa leai se fuafuaga faapisinisi, leai se faatulagaga auiliili. Sa faatulagaina le polokalama e faaaoga ai le matua o le saunoaga a Peresitene Hinckley i le konafesi e fai ma ana feagaiga. E faitau selau talosaga mo faaunegatupe na saputu mai i le laumua o le Ekalesia, a o tofia faatonusili ma faatuina le faavae autu o le polokalama.
Peitai o la lava ua tutupu vavega. I totonu o le uluai tausaga, e faitau miliona tupe na foai mai i le polokalama. E toatele tagata o latou talaaga faaleaoaoga e matuai agavaa ai lava mo le galuega a le TFA, sa vave ona avanoa e galulue fua e avea ma faatonu. O auala o fesootaiga e tatau ai mo le lagolagoina o le TFA i le salafa o le lalolagi, ua uma ona faataatia i polokalama o le inisitituti a le Ofisa o Aoga a le Ekalesia ma Nofoaga Autu o Punaoa mo Galuega a le Ekalesia. Po o le a lava le mea sa manaomia, sa vave ona maua, e avatu ai i le polokalama le mea sa lipotia mai e Peresitene Hinckley ia Aperila 2002 ua avea o se “faavae mautu.”1
Na saunoa Rex Allen, o loo avea nei ma faatonu galue fua mo aoaoga faamasani ma fesootaiga mo le TFA, “I aso lava la ua leva, sa faaloaloa ai e Mose lona tootoo i luga o le Sami Ulaula ona vaeluaina ai lea o le sami. Na faatinoina foi e Peresitene Hinckley lea lava faatuatua e tasi, ina ua ia faaaogaina lana matafaioi faaperofeta e faafetauia ai le vasa pogisa o le mativa ma amatalia ai le TFA.
“O se vavega,” sa faamautinoa faafia ai lava e Peresitene Hinckley.
Ae ui o lea, ina ua mavae le 10 tausaga, atonu ua faatoa amata vavega aupito silisili.
Ua Faataunuuina Folafolaga
I lana faasilasilaga o le TFA ma i saunoaga mulimuli ane, sa folafola mai ai e Peresitene Hinckley le tele o faamanuiaga o le a tafe mai mai le TFA. Ua faataunuuina ia faamanuiaga taitasi faatasi ai ma le faateleina o le malosiaga, a o faauu mai i latou o loo faaaogaina le TFA ma toe totogi a latou faaunegatupe.
Avanoa ma Galuega
“[O i latou e faaaogaina] o le a mafai ona lelei a’oga o le a sii ese mai ai i latou mai le faataufusi o le mativa,” o le saunoaga lea a Peresitene Hinckley.2
E oo atu ia Fepuari o le 2011, toeitiiti atoa le 90 pasene o i latou sa saili galuega ina ua mae’a a latou aoga ma maua ni galuega. Pe tusa ma le 78 pasene o i latou ua faigaluega nei ua fai mai, o a latou galuega ua i ai nei ua sili atu nai lo le mea sa i ai a’o lei mauaina isi aoaoga. O le averesi o le tupe maua pe a mae’a aoga a i latou e faaaogaina le TFA, e faatolu i le faafa e tetele atu ai nai lo tupe maua a o lei toe aooga, ma o foliga na o le faaleleia tele ua i ai le tulaga faale-tamaoaiga.
Aiga ma le Nuu
“O le a latou faaipoipo ma fetaomi atu i luma ma tomai o le a faaagavaaina ai i latou e maua totogi lelei ma mau tulaga i nuu lea e mafai ai ona latou tuuina atu ni saofaga taua,” sa tautino mai ai e Peresitene Hinckley. 3 E silia teisi ma le tasi vaetolu o i latou o loo faaaogaina nei le TFA ua faaipoipo.
Na saunoa Elder John K. Carmack, le faatonusili o le TFA: “O se tasi o faamalosiauga aupito sili o taunuuga o le TFA ua i ai, ua matou vaaia ua tele atu le faamoemoe ua maua e o tatou tupulaga talavou. O lea faamoemoe ua latou maua ai le lototetele e faaipoipo ma agai ai i luma i o latou olaga.”
A o latou faia ai, ua sagisagi atu o latou aiga ua tutupu a’e, i ni lumanai manuia.
Ekalesia ma le Taitaiga
“I le avea ai o ni tagata faamaoni o le Ekalesia, o le a latou totogiina a latou sefuluai ma taulaga, ma o le a atili ai ona malosi le Ekalesia mo i latou i eria latou te nonofo ai,” o le saunoaga lea a Peresitene Hinckley.4
I nisi o eria ua faagaoioia ai le TFA mo le tele o tausaga, ua oo atu lava i le 10 i le 15 pasene o le taitaiga o loo i ai nei o tagata na faaaogaina le TFA.
“Ua faamalosiauina e i latou na auai ia isi tupulaga talavou e faaaoga ia faaunegatupe mai le TFA e o ese ai mai le mativa,” o le tala lea a Rex Allen. “Ina ua mavae le 10 tausaga, ua matou vaaia le li’o o le faamoemoe ua lautele atu, a o faasoa atu e i latou ua faamanuiaina ia faamanuiaga i isi.”
Aafiaga i Olaga o le Toatele
“[O le TFA] o le a avea o se faamanuiaga i olaga o i latou uma e pa’i atu i ai —i alii ma tamaitai talavou, i o latou aiga i le lumanai, i le Ekalesia o le a faamanuiaina i la latou taitaiga malosi i le lotoifale,” o le folafolaga lea a Peresitene Hinckley.5
Ua silia ma le 47,000 tagata na auai i le TFA talu mai le tautoulu o le 2001. E le o faitaulia ai aiga lautele ua lagolagoina ma musuia e tagata o aiga sa faaaogaina le TFA, o uarota ma paranesi ua manuia mai tagata ua sili atu lo latou malolosi e galulue ai ma fai saofaga, ma le tamaoaiga i le lotoifale o loo manaomia tagata faigaluega tomai ia faatupulaia.
“Manatu i le aafiaga pe a e mafaufau ia i latou uma e aafia ai,” o le saunoaga lea a Brother Allen. “E oo atu lea ia i latou e foai i le TFA—o le au fai sao, o o latou aiga, o a latou uarota ma paranesi—e faamanuiaina uma e ala i a latou saofaga.”
“Ua toetoe o Au Paia uma o Aso e Gata Ai ua i ai i o latou lima le tomai e foai atu ai se mea e le aunoa i lenei teugatupe ma isi taumafaiga taua,” o le saunoaga lea a Elder Carmack. “Ua fesoasoani le valaaulia a Peresitene Hinckley ia i latou o loo fai a latou saofaga i le TFA, faapea foi i latou o loo [faaaogaina e] faaleleia atili ai i latou lava e latalata atili atu ai i lo tatou Faaola.”
Tuputupu a’e Faifai Pea
Ua lauiloa le vaaiga faaperofeta a Peresitene Hinckley i le Tupe Faaagaga mo Aoga, o se uunaiga o lenei polokalama ma ua faaauau ai pea lava ona salalau atu i le lalolagi atoa, ma o le a faaauau pea ona lauiloa i se aofaiga ua matua faatoateleina, a o faaauau pea ona aumai saofaga ma toe totogi foi faaunegatupe, e mafai ai e le tupulaga fou o ē auai ona faaleleia atili i latou lava ma o latou tulaga.
Ina ia silafia atili e uiga i le Tupe Faaagaga mo Aoga, faamolemole asiasi ane i le pef.lds.org.
O le Tupe Faaagaga mo Aoga, lea na amata i le 10 tausaga talu ai, ua fesoasoani i le silia ma le 47,000 tagata na auai.
Ata na pueina e Brian Wilcox