Elder José L. Alonso

O Le Fitugafulu

A o lei auai o ia i le Ekalesia, sa i ai se molimau a José Luis Alonso Trejo i le mana o le tatalo. “Ina ua 11 o’u tausaga,” na ia saunoa ai, “sa toeitiiti lava a ou oti. Na fiu fomai— sa ou lagona atu i latou o talanoa. O lea sa ou tatalo ai ma saga tatalo atu i le Alii, ma sa Ia faamaloloina au.

“Ina ua ou faalogo mulimuli ane i le tala ia Iosefa Samita ma ou iloa ai se taulealea e na o le 14 tausaga le matua sa talanoa ma le Atua, sa ou iloaina e moni. Sa ou iloa e mafai e le Atua ona tali mai i a tatou tatalo, ma Na te silafia i tatou.”

O le lagona lava lena o le mafanafana na taialaina ai Elder Alonso a o ia suesue i le Tusi a Mamona. “Ona o le tatalo ma le tusi lenei, ua ou iloa ai ma le mautinoa o Iesu o le Keriso,” o lana tala lea.

Na soifua mai Elder Alonso i le Aai o Mekisiko, ia Novema 1958 i a Luis ma Luz Alonso. A o talavou o ia, sa sii atu i le aai o Cuautla, Mekisiko, lea na ia auai ai i le Ekalesia. O lona alu i le Mutuale na ia fesootai ai ma le autalavou malolosi o ē sa latou faaaumeaina o ia ma sa pei ai o se aiga lona lua mo ia. O lona auai atu foi i le Mutuale na la feiloai ai ma Rebecca Salazar, le tamaitai o le a avea mulimuli ane ma ona faletua.

Ina ua atoa le 19 o tausaga o Elder Alonso, sa faamisiona talai o ia i le Misiona a Mekisiko Hermosillo. Ina ua mae’a lana misiona, sa faaipoipo Elder Alonso ma Rebecca i le aso 24 o Fepuari, 1981, i le Malumalu o Mesa Arisona. O i la’ua o ni matua o se fanau e toalua.

E le gata ina avea o se faatonu o le inisitituti mo le Ofisa o Aoga a le Ekalesia, ae e i ai foi se faailoga faafomai o Elder Alonso e faapitoa mo tamaiti, ma sa faigaluega foi o se fomai o vailaau faapitoa ma se fomai tipitipi. O lana matata e faaalia ai se naunautaiga ua loa ona i ai, o le auauna atu lea ma faamanuia i isi—e pei lava ona sa faamanuiaina ai o ia e le Alii ina ua ma’i a o laitiiti. “O le auauna atu i isi e fausia ai le lotogatasi ma le usoga,” o lana tala lea, “ma valaauliaina ai le mana o le Alii i o tatou olaga.”

A o lei valaauina o ia i le Korama Muamua a Fitugafulu, sa avea Elder Alonso o se epikopo, peresitene o le misiona a le siteki, peresitene o le siteki, fesoasoani i le peresitene o le misiona, peresitene o le Misiona a Mekisiko Tijuana, ma Fitugafulu Eria.