Elder O. Vincent Haleck

O Le Fitugafulu

A o laitiiti lava Elder Otto Vincent Haleck sa ia totogiina le sefuluai, sa anapogi, ma suesue i tusitusiga paia—ona ia feiloai ai lea ma faifeautalai ma sa papatisoina ai.

O le tina o Elder Haleck o se tagata o le Ekalesia, ae sa tele tausaga e le o toe lotu. E le auai lona tama i le Ekalesia. Ae sa totogi lava sefuluai a le aiga, sa anapopogi i vaiaso taitasi, faitau le Tusi Paia i aso taitasi, ma sa latou foai atu a latou mea i ē sa manaomia le fesoasoani. O Elder Haleck e tupuga mai i se talatuu o le faatuatua.

Na soifua mai Elder Haleck i le masina o Ianuari 1949 i Amerika Samoa. Na auina atu o ia e ona matua, o Otto ma Dorothy Haleck e a’oga i Kalefonia, ISA. Ina ua 17 ona tausaga, sa ia matauina e i ai ni ana uo i le pulega a tamaiti a’oga i le aoga, e ese mai isi tamaiti. “Sa latou valaaulia a’u i le Mutuale, ma o le isi vaega o totoe o le tala, o lo’u talafaasolopito lena,” o le saunoaga lea a Elder Haleck.

Na maua le uluai faailoga o Elder Haleck i faasalalauga ma tulaga tau maketi mai le Iunivesite a Polika Iaga. Na te umia ni pisinisi i Amerika Samoa ma o loo aofia ai o ia i galuega fesoasoani agalelei. Na faaipoipo Elder Haleck ma lona faletua o Peggy Ann Cameron i le aso 29 Iuni, 1972, i le Malumalu o Provo Iuta. O i la’ua o ni matua o se fanau e toatolu.

Na iu lava ina maua e le aiga atoa o Elder Haleck le talalelei. Sa maua e Elder Haleck le avanoa e papatisoina ai lona tamā e 80 tausaga o lona soifua, ma ua silasila i le toe toaga mai o lona tina i le Lotu ina ua mavae ai le 50 tausaga o la la’ua faaipoipoga.

A o lei valaauina o ia i le Korama Lua a Fitugafulu, sa avea Elder Haleck ma faifeautalai faamisiona i le Misiona a Samoa Apia, epikopo, fautua maualuga i le siteki, peteriaka, peresitene o le siteki, ma talu ai nei lava o avea ma peresitene o le Misiona a Samoa Apia.

E talitonu Elder Haleck o aafiaga uma lava o lona soifua, ua oo mai ai i le mea ua i ai nei o ia. “A ou toe vaavaai atu i tua i lo’u olaga, e mafai ona ou faapea atu, e mafai ona ou vaaia le aao o le Alii,” na saunoa i ai Elder Haleck. “Ou te faafetai lava ma ua faamamaluina au i le faatuatuaga ua tuuina mai e le Alii ia i ma’ua. Ou te alofa i le Alii ma ou te faamoemoe ia avea o se meafaigaluega lelei. Ou te iloa o le a fesoasoani mai le Alii ia te au.”