Faamanatuina o le 75 Tausaga o le Uelefea
E tele saunoaga o le Konafesi Aoao Lona 181 Faaletausaga a le Ekalesia sa saafi ai i le faamanatuina o le polokalama uelefea a le Ekalesia, lea ua faamanatu lona 75 tausaga.
I lona uluai aso na amata ai i le 1936, na faamautinoa mai ai e Peresitene Tavita O. MaKei, a o avea ma se fesoasoani i le Au Peresitene Sili i lena taimi, ia a’a musuia faalelagi o le fuafuaga o le uelefea a le Ekalesia: “[O le polokalama uelefea] ua faavaeina e ala i se faaaliga mai le lagi, ma e leai lava se isi mea i le lalolagi atoa e mafai ona matuai tausia lelei ona tagata.”1
Na gasolo mai tausaga e fitusefulu ma le lima ma toe mou atu. Na tulai mai suiga iloga o le tamaoaiga o le lalolagi ma toe mavae atu foi. Ua vaaia e le lalolagi ni suiga tetele i nuu ma aganuu, ma ua vaaia foi e le Ekalesia le faatupulaia maoae.
Peitai, o upu na tulei i ai e uiga i le fuafuaga o le uelefea a le Ekalesia na musuia mai le lagi i lena aso i le 1936, ua moni lava i le asō e faapei ona sa i ai i lena taimi.
Mataupu Faavae o le Uelefea
I le 1929, sa feagai ai le Iunaite Setete ma se faaletonu tele o mea tau tupe ina ua lafotu oloa tau maketi. E oo ane i le 1932 ua oo atu i le 35.8 pasene le aofai o tagata ua le toe i ai ni galuega.
E ui ina ua uma ona faatulagaina ia mataupu faavae o le uelefea a le Ekalesia, e aofia ai se faiga o faleteuoloa ma polokalama e fesoasoani ai i le au paia ia maua ni galuega, e toatele lava tagata o le ekalesia sa liliu atu i le malo mo se toomaga.
“Ou te talitonu ua faatupulaia se uiga i tagata e taumafai e maua mai se mea mai le malo o le Iunaite Setete ma sina faamoemoe itiiti e toe totogi,” na saunoa i ai Peresitene Heber J. Grant (1856–1945) i le taimi lea.2
Sa mananao taitai o le Ekalesia e fesoasoani i tagata o le ekalesia sa feagai ma tauiviga, e aunoa ma le siitia o le nofonofovale ma se manatu faapea ua i ai i se tagata se aia tatau e maua fua ai se mea. O le sini, ia fesoasoani i tagata e fesoasoani ia i latou lava ma tutoatasi ai.
I le 1933 sa fofogaina mai ai e le Au Peresitene Sili: “E le tatau i o tatou tagata malolosi, sei vagana ai o se toe auala lea, ona faamaasiasia i lo latou taliaina o se mea e maua fua. … E tatau i taitai o le Ekalesia o loo faatautaia le faaolatotoga ona fuafuaina ni auala ma ni mea e mafai ai e tagata malolosi o le Ekalesia o ē ua lē tagolima, ona faia ni faafesuia’iga mo le fesoasoani na tuuina atu ia i latou e ala i le faia o ni nai auaunaga.”3
I le i ai o mataupu faavae ua faatulagaina ma le faagaoioia o le faatuatua o le Au Paia, sa galulue ai iunite taitasi o le Ekalesia faapea foi le Ekalesia aoao i le faatulagaina o vasega su’isu’i ma le tuuapaina, faamaopoopo galuega faatino, faatauina mai o faatoaga, ma faamamafaina le ola amiotonu, faasoasoa tatau, ma le ola tutoatasi.
O Le Fuafuaga o le Uelefea a le Ekalesia
O le faatulagaina o le Fuafuaga o le Saogalemu a le Ekalesia (ua toe faaigoaina o le Fuafuaga o le Uelefea a le Ekalesia i le 1938), na tuuina atu ai i tagata le avanoa e galulue ai, i le mea sa latou mafaia, mo le fesoasoani sa latou mauaina. O lea fuafuaga sa aoaoina ai tagata ina ia liliu atu ia i latou lava mo se fesoasoani nai lo le liliu atu i nisi punavai mo se tufaaga fua.
“O lo tatou uluai faamoemoega lava o le faatuina lea … o se faiga e le toe i ai le fetuu ona o le paie, le toe i ai le amioleaga o le maua fua o se mea, ae ua toe faatuina le tutoatasi, o le galulue, o le ola faasoasoa lelei ma le faaaloalo i o tatou tagata,” o le saunoaga lea a Peresitene Grant i le konafesi aoao ia Oketopa 1936. “E ao ona avea le galue ma mataupu faavae laualuga e taitaiina ai olaga o tagata o le Ekalesia.”4
Ua tele tausaga, o aofia ai i le uelefea a le Ekalesia le tele o polokalama: Auaunaga Lautele (lea ua ta’ua nei o le Tautua a le AAG mo Aiga), Auaunaga Alofa a le AAG, Auaunaga Fesoasoani mo Tagata, ma le Tali Atu i Faalavelave Faafuasei. O nei polokalama ma isi ua faamanuiaina ai soifua o le faitau fiaselau afe i totonu o le Ekalesia ma fafo atu foi.
Ua Oo Atu Faavaomalo le Polokalama
Ina ua mavae le Pau Tele o le Tamaoaiga i le tulai mai o le Taua Lona Lua, sa fautuaina pea lava pea e Peresitene J. Reuben Clark Jr., Fesoasoani Lua i le Au Peresitene Sili, le polokalama uelefea. Ia Oketopa 1945, sa valaau mai le Peresitene o le I.S. o Harry S. Truman i le Peresitene o le Ekalesia, o Peresitene Siaosi Alapati Samita (1870–1951) e fuafua pe faapefea ae pe o afea foi e mafai ai ona auina atu ni sapalai i vaega o Europa ua faataumaoia e le taua. Sa matua maofa Peresitene Truman, ina ua tali atu taitai o le Ekalesia ua mae’a ona aoina meaai ma lavalava ma isi sapalai faaolatotoga ma ua saunia foi mo le utaina.
Ua mavae tausaga, ua faateleina e le Ekalesia fale ma polokalama o le uelefea e faaaofia ai le tele o isi eria o loo manaomia le fesoasoani, e aofia ai ma isi vaega eria o le lalolagi. I le vaitau o le 1970, sa faasafua atu ai e le Ekalesia ana galuega faatino faale-uelefea ma oloa gaosi i Mekisiko, Egelani, ma Atumotu o le Pasefika. I le sefulu tausaga na sosoo ai, o Atenitina, Chile, Parakuei, ma Iurukuei o uluai atunuu ia i fafo atu o le Iunaite Setete ua i ai ni nofoaga autu a le Ekalesia mo galuega.
Faatasi ai ma le faavaeina o Auaunaga Alofa a le Ekalesia mo Tagata i le 1985, sa matua faatupulaia ai taumafaiga faale-uelefea faavaomalo a o faavasegaina ia lavalava ma isi oloa mo le la’uina atu i vaa i le salafa o le lalolagi e tali atu ai i le mativa ma faalavelave matautia.
O le taimi nei, ua tulai mai ai ni luitau fou ona o le faatupulaia o le faitau aofai o tagata o le Ekalesia faavaomalo, aemaise lava i atunuu tau atia’e, lea o loo fetuunai ai le polokalama uelefea ina ia faafetaia’ia.
O Se Fuafuaga Musuia mo le Taimi Nei
O mataupu faavae autu o le uelefea—o le faalagolago ia te oe lava ma le galue malosi— o loo tumau pea lava i le taimi nei e pei ona poloaiina ai Atamu e le Alii, “E te ‘ai foi au mea e ’ai ma le afu o ou mata” (Kenese 3:19).
I aso e gata ai, na tautino mai ai e le Alii “O le a tausia foi le fale teu oloa i faapaiaga a le ekalesia; e tausia foi tamaitai ua oti a latou tane ma fanau ua oti o latou matua, e faapena foi e matitiva” (MFF 83:6). Ona Ia faamanatu mai lea ia i tatou, “Ae ao ina faia i la’u lava ala” (MFF 104:16).
Ua galue mataupu faavae o le uelefea i olaga o tagata o le au paia i le lalolagi atoa e avea o se mataupu faavae i aso taitasi i aiga taitasi.
“O le malosiaga o le Ekalesia ma le faleteuoloa moni a le Alii, o loo i totonu o aiga ma loto o ona tagata,” na saunoa i ai Elder Robert D. Hales o le Korama a Aposetolo e Toasefululua.5
A o atiina ae e tagata taitoatasi lo latou lava faalagolago ia i latou lava e ala i le faatuatua ia Iesu Keriso, e faaauau pea lava ona faataunuuina ia faamoemoega o le polokalama mo se taimi umi, e pei ona faamanino mai e Peresitene Clark: “o le galueaiina o amioga a tagata o le Ekalesia, o ē foai ma ē taliaina, e aumaia ai mea lelei uma o loo natia i se tagata, ma fesoasoani ai i se tagata e atiina ae lana amio i le malosi atoatoa ia lagonaina ai le Agaga seia oo ina matagofie ma faamanuiaina e pei o se laau e fuga mai ma taufuifui, i lona aotelega, o le misiona lea ma le faamoemoega ma le mafuaaga o le i ai o lenei Ekalesia.”6
Peresitene Tavita O. MaKei, Heber J. Grant, ma J. Reuben Clark Jr. (agavale i le taumatau) o le asiasiga a le Au Peresitene Sili i le Lotoa o le Uelefea i le 1940.
Pe o le faiga o falaoa (agavale i luga), totoina o vine (taumatau i luga), po o le tuuina atu o fesoasoani i se isi auala, e faamoemoe le polokalama Uelefea a le Ekalesia e atiina ae le faalagolago o le tagata ia te ia lava e ala i le faatuatua ia Iesu Keriso.