Pagdala sa Primary ngadto sa Panimalay
Ang Unang mga Baruganan ug mga Ordinansa sa Ebanghelyo Nakahimong Posible alang Kanako sa Pagpuyo og Usab Kauban sa Dios
“Kami nagtuo nga ang unang mga baruganan ug mga ordinansa sa Ebanghelyo mao ang: una, Hugot nga pagtuo diha ni Ginoong Jesukristo; ikaduha, Paghinulsol; ikatulo, Bunyag pinaagi sa pagpaunlod alang sa kapasayloan sa mga sala, ikaupat, Pagpandong sa mga kamot alang sa mga gasa sa Espiritu Santo” (Mga Artikulo sa Hugot nga Pagtuo 1:4).
Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.
Ang ikaupat nga artikulo sa hugot nga pagtuo naghisgut kabahin sa upat ka importanting mga baruganan ug mga ordinansa sa ebanghelyo nga kinahanglang ninyong sundon aron kamo makapuyo pag-usab sa Langitnong Amahan.
Una, kamo kinahanglan adunay hugot nga pagtuo ni Jesukristo. Ang pagbaton og hugot nga pagtuo ni Jesukristo mao ang pagtuo nga Siya buhi, nga Siya mao ang Manluluwas, ug nga Siya nahigugma kaninyo, bisan tuod wala pa gayud ninyo Siya makita. Kon kamo adunay hugot nga pagtuo ni Kristo, gusto ninyong buhaton unsa ang Iyang gisugo nga inyong buhaton, sama sa pag-ampo, pagsimba, pagmabination, ug pagsunod sa iyang mga sugo.
Usa sa importanting mga butang nga gisugo ni Jesus nga inyong buhaton mao ang magpabunyag kon ikaw otso anyos na (o mas magulang). Kamo pagabunyagan pinaagi sa pagpaunlod—sama kang Jesus. Kana nagpasabut nga ang inyong tibuok lawas iunlod sa tubig. Ang inyong pagpabunyag pagahimoon pinaagi sa usa ka tawo kinsa adunay awtoridad sa priesthood sa pagbunyag. Kon kamo mabunyagan, kamo usab maghimo og saad uban sa Langitnong Amahan. Kamo mosaad nga kamo mosunod sa mga sugo, ug kon inyo ning buhaton, Siya nagsaad nga inyong makauban ang Espiritu Santo.
Human sa inyong bunyag, kamo makadawat sa gasa sa Espiritu Santo. Usa ka tawo nga naghupot sa priesthood mopandong sa iyang mga kamot diha sa inyong ulo aron mohatag kaninyo sa gasa sa Espiritu Santo. Ang Espiritu Santo mogiya, motudlo, ug mohupay kaninyo ug mopamatuod kabahin ni Jesukristo.
Gikan sa adlaw nga kamo natawo hangtud nga otso nayos, kamo limpyo ug inosente tungod sa Pag-ula ni Jesukristo. Kon kamo otso anyos na ug nabunyagan, kinahanglan mong maghinulsol sa tanan ninyong nahimong sayop. Ang paghinulsol mao ang pagbati nga magul-anon ug mangayo og kapasayloan gikan sa Langitnong Amahan ug ni bisan kinsa nga inyong napasakitan. Human nga kamo naghinulsol, kinahanglan mong maningkamot pag-ayo nga dili na mousab paghimo sa samang sayop ug mas masulundon sa mga sugo. Ang Pag-ula nakahimong posible alang kaninyo nga mahimong limpyo pag-usab kon kamo maghinulsol.
Ang pagbaton og hugot nga pagtuo ni Jesukristo, paghinulsol, pagpabunyag pinaagi sa pagpaunlod, ug pagdawat sa gasa sa Espiritu Santo importante tungod kay kini makatabang kaninyo nga makauban og puyo ang inyong pamilya hangtud sa hangtud ug uban sa Langitnong Amahan ug ni Jesukristo.
Kalihokan
Makahimo kamo niining springing mobile isip pahinumdom sa unang mga baruganan ug mga ordinansa sa ebanghelyo. Ipapilit ang pahina 63 sa baga nga papel. Guntinga ang lima ka mga timailhan; dayon guntinga ang mobile subay sa baga nga mga linya. Guntinga o busluti kanang dapit nga may timailhan. Ibitay ang mga timailhan sa mobile gamit ang hilo o laso.
Ang unang mga baruganan ug mga ordinansa sa ebanghelyo mao ang:
1. Hugot nga Pagtuo diha sa Ginoong Jesukristo
2. Paghinulsol
3. Bunyag pinaagi sa pagpaunlod alang sa kapasayloan sa mga sala
4. Pagpandong sa mga kamot alang sa mga gasa sa Espiritu Santo
Mga paghulagway pinaagi ni Thomas S. Child