Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Ang Matuod nga Dalan sa Kalipay,” p. 28: Human ipakigbahin ang artikulo sa inyong pamilya, hunahunaa kini nga mga pangutana: Sa unsang paagi ang mga desisyon nga inyong gihimo karon makaapektar sa umaabut ninyong kalipay? Unsaon man nato sa pagsiguro nga naghimo kita og matarung mga mga desisyon?

“Ang Gahum sa Edukasyon,” p. 42: Ang tagsulat niini nga artikulo nadasig sa unsay gisulti ni Presidente Gordon B. Hinckley mahitungod sa edukasyon: Inyong gikinahanglan ang tanan nga edukasyon nga mahimo ninyong kab-uton. “Isakripisyo … ang bisan unsang butang nga gikinahanglang isakripisyo aron makasarang ang inyong kaugalingon sa paghimo sa buhat sa kalibutan.” Isip usa ka pamilya, hisguti ang sakripisyo ug ang mga panalangin nga moabut gumikan niini.

“Tudloi ang Tawo sa Pagpangisda,” p. 54: Basaha o i-summarize kini nga artikulo uban sa inyong pamilya. Giunsa man ni Ezra nga maandam sa pag-atubang sa mga pagsulay? Giunsa man sa Langitnong Amahan sa pagtabang kaniya? Hisguti kon unsay mahimo sa inyong pamilya sa pagpangandam.

“Salig sa Ginoo,” p. 60: Basaha ang artikulo kauban sa tibuok pamilya. Hunahunaa ang paghangyo sa mga sakop sa pamilya sa pagpaambit og mga kasinatian sa dihang ang ilang mga pag-ampo gitubag. Hisguti ang lain-laing mga paagi diin ang Langitnong Amahan mahimong motubag sa mga pag-ampo ug sa importansya sa pagsalig Kaniya.

Ang mga Pangutana sa Akong Anak nga Babaye

Isip bishop sa among ward, akong giawhag ang mga ginikanan sa paghatag sa ilang mga anak og oportunidad sa pagtudlo atol sa family home evening. Ang akong asawa ug ako nakahukom sa paghimo sa akong giingon.

Ang among anak nga lalaki ang unang mitudlo, ug nalingaw kami sa iyang leksyon kabahin sa pag-ampo. Sa pagkasunod Lunes higayon na sa among anak nga babaye. Nabunyagan siya pipila pa lamang ka bulan. Ang iyang topic mahitungod sa mga nilalang sa Dios. Nangutana siya og sunod-sunod nga mga pangutana, nga among gitubag. Siya dayon mihatag sa iyang pagpamatuod ug mitapos.

Ang akong anak nga lalaki miingon, “Wala ka pa makatudlo namo, igo ka lang nangutana.” Apan akong gisultihan ang pamilya nga natandog ko sa dihang ang akong asawa, mitubag sa usa sa mga pangutana, miingon nga mapasalamaton siya sa Dios sa paglalang og mga unit sa pamilya ug sa paghatag kaniya og usa ka maanindot nga pamilya uban sa usa ka mahigugmaon nga bana. Sila akong giingnan nga ang akong kasingkasing napuno sa pasalamat dihang ang among kinamanghurang anak nga babaye mitubag sa pangutana nga “Kinsa ang naglalang sa kalibutan?” pinaagi sa pagsinggit nga, “Si Jesus.” Nakita usab nako ang ubang mga tubag nga makadasig kaayo sa ilang paghunahuna.

Mao nga bisan og ang among anak nga babaye wala “motudlo” sama sa gipaabut sa akong anak nga lalaki, ang iyang leksyon—ug ang ubang leksyon nga gitudlo sa uban nakong mga anak—mao ang akong paborito nga mga family home evening.

Richard Ikpegbu, Nigeria