Hangtud Kita Magkita Pag-usab
Pagtukod diha sa Sigurado nga Pundasyon
Ang pagpamatuod mahimong dili matarug.
Dili layo sa dakong Suba sa Ohio adunay gamay nga lungsod diha sa hilit sa Louisville, Kentucky, gitawag og Anchorage. Kausa usa ka komunidad sa mag-uuma diin ang usa ka kapitan sa barko nga pangsuba mihimo sa iyang katapusang pagbiyahe, kini nahimong balay ngadto sa mga pamilya sa daghang nagkalain-laing pagtuo.
Didto sa simbahan, sa panimalay, ug samtang nagsiksik sa talagsaong kalibutan ubos sa mga kahoy nga sycamore, oak, maple, chesnut, ug willow nga ako nakakat-on sa usa sa labing sukaranan sa Kristyanismo: nga si Jesus mianhi isip gamhanan nga magtutudlo, nagtudlo kanato sa mga pamaagi sa kamaayo ug kaligdong.
Ang akong mga ginikanan mga buotan nga tawo, matinud-anon sa ilang simbahan. Sila mitudlo kanako unsaon nga mahimong usa ka maayo nga tawo ug nga adunay pihong mga butang nga ensakto, sama sa pagkamabination ngadto sa uban, ug pihong mga butang nga sayop, sama sa pagpangawat. Sa laing bahin, sila usab mitudlo nga unsa ang gituohan sa usa ka tawo nga tinuod sama ra nga balido sa gituohan sa laing tawo nga tinuod, bisan kadtong mga pagtuo managlahi og sukaranan. Niini nga pilosopiya, sa akong pagsabut niini, walay mahangturong mga baruganan alang sa tanan, kondili mga personal nga mga panglantaw nga ang intelihenteng mga tawo adunay katungod ug obligasyon sa pagdeterminar nga tinuod sa ilang kaugalingon.
Tungod niadtong importanting mga pagtuo sa moral relativism, naglisud ko sa pagtuo unsa ang gipangtudlo sa mga misyonaryo nga Mormon kabahin sa panginahanglan sa Pag-ula, katungod sa priesthood, ug mga propeta. Sa tinuod, ang akong panaw sa pagkakabig milungtad og unom ka tuig sa makanunayong paghagit ug pagpangutana si kinsa ako, unsa ang akong gituohan, ug kon aduna ba, sa tinuod, usa ka Dios kinsa miestablisar og mahangturong mga baruganan sa kamatuoran ug sayop, sala ug sangputanan.
Talagsaon, nakadawat ako og espiritwal nga kasiguradoan, apan kini wala moabut hangtud igo akong nagpaubos sa pagdawat niini. Una miabut ang pagsaksi sa bunyag, dayon ang Basahon ni Mormon, dayon kang Joseph Smith isip usa ka tinuod nga propeta. Dugang pagsaksi ang misunod, pagtulun-an human sa usa ka pagtulun-an, kabahin sa mga propeta ug mga apostoles karon.
Sa wala madugay, miabut ang punto sa akong kinabuhi diin wala lang kong nagtuo nga ang ebanghelyo tinuod—nasayud ko nga kini tinuod. Ang sangputanan sa akong daghang gagmay nga mga pagsaksi mimugna og pundasyon diin ang akong pagtuo sigurado, usa ka proteksyon batok sa mga hagit nga makapahuyang sa pagpamatuod.
Kini atong sagradong katungod sa pagpangita og mga tubag gikan sa Ginoo. Ug kita kinahanglan nga padayong moamuma sa atong kaugalingon sa espirituhanong paagi matag adlaw aron ang atong mga pagpamatuod magpabiling lig-on. Ug ako usab nasayud nga sa programa sa Ginoo, dili maayo nga magsige og pagpangutana sa mga baruganan diin kita nakadawat na og pagsaksi. Sa pagkatinuod, kini mahimong modala ngadto sa apostasiya.
Wala nako manlimbasug sa moral relativism sa akong pagkabatan-on. Nasayud ko nga kon ang propeta mamulong, ang iyang mga pulong gikan sa Dios. Kon ang mga panghitabo motumaw nga makahagit sa akong pagpamatuod, mosalig ako sa saksi nga ako nang nadawat, ug dayon buhaton nako ang akong labing maayo aron sa pagsunod niini. Kana mao ang dalan paingon sa kalinaw; kana mao ang dalan sa kalipay.