Nagkadaghan ang Gikinahanglan nga mga Indexer sa Tibuok Kalibutan

Ni Hikari Loftus

Mga Magasin sa Simbahan

Sa tibuok kalibutan, ang mga tawo nagsiksik sa ilang mga katigulangan.

Ug sa tibuok kalibutan, ang ubang mga tawo maoy nakapaposible niana nga pagsiksik.

Ang pag-index sa FamilySearch, nga gisugdan sa internet niadtong 2006 ug gilihok pinaagi sa mga boluntaryo sa tibuok kalibutan, mao ang proseso sa pagkuha og mga pisikal nga rekord (sama nianang makita sa microfilm) ug ipasulod kini nga impormasyon ngadto sa mahimo ra nga siksikon, database diha sa internet.

Uban sa 122,000 LDS ug dili mga LDS nga aktibong mga tig-index 547,978,000 na ka mga rekord ang nakompleto sukad kini gisugdan, ang pag-index sa FamilySearch malampuson kaayo. Hinoon, kadtong nakigkoordinar sa indexing adunay bag-ong tumong sa pag-index sa mga rekord sa mga pinulongan gawas sa Ininglis.

“Nagkadaghan ang mga pangalan nga among na-index dili Ininglis,” miingon si Jim Ericson, product marketing manager sa FamilySearch. “Kami naningkamot sa mga tawo kinsa lahi og mga pinulongan nga mosalmot aron mas maayo ang among trabaho kabahin sa dili Ininglis nga mga pangalan.”

Bisan og ang pag-index sa mga rekord padayon nga nagkadaghan, apan nalabwan na kini og dako sa nagkadaghang internasyonal nga mga rekord. Ang mga proyekto anam-anam na nga anaa sa nagkadaiyang mga nasud samtang nagkadaghan ang mga gobyerno ug mga custodian sa mga rekord ang nakahibalo na sa mga serbisyo nga gikahatag sa FamilySearch, miingon si Brother Ericson.

Sa pagsugod, ang mga empleyado sa FamilySearch mikuha og mga rekord gikan sa mga gobyerno, mga librarya, ug uban pang mga kapanguhaan nga ingon niana ug mihimo og digital nga mga kopya niini. Kini nga mga kopya gipundok dayon ngadto sa ginagmayng pundok nga gitawag og “mga batch,” nga mahimong gamiton sa mga volunteer gamit ang internet. Ang mga boluntaryo mo-log-in sa FamilySearch, mo-download og usa ka batch, ug dayon isulod ang data nga ilang makita sa screen. Kana nga data sa dili madugay magamit na sa halapad nga paagi ngadto sa mga tigsik-sik sa family history. Ang matag batch mao ang usa ka gitigom nga mga buhat nga makompleto sa usa ka volunteer sulod sa mga 30 ka minutos, miingon si Katie Gale, Indexing Project Coordinator sa FamilySearch.

Ang mga boluntaryo nga miapil sa pag-index sa FamilySearch naglakip sa mga tawo kansang lumad nga mga pinulongan dili Ininglis (ang site sa kasamtangan anaa sa pito ka pinulongan), apan maglakip usab kini og mga tawo nga adunay kahanas sa pinulongan gikan sa pagserbisyo og misyon, eskwelahan, o uban pang mga pagbansay.

Bisan kon ang proyekto wala sa nasud nga inyong gipuy-an o giserbisyuhan, ang mga proyekto makuha gikan sa mga nasud diin adunay sama nga pinulongan.

Dihang ang Templo sa Kyiv Ukraine gitukod pa, ang mga Ukrainian nga mga Santos miapil sa pagpasiugda aron sa pagpangita ug sa pag-index og mga pangalan nga dad-on ngadto sa templo inig kahuman. Sa dihang gipahinungod na ang templo, 401 ka mga tig-index gikan sa Ukraine, Russia, North ug South America, ug Europe mitrabaho sa Kyiv project, ug ang mga Santos nga Ukrainian nakadala og 200,000 ka mga pangalan ngadto sa templo.

Samtang ang buhat sa pag-index sa usa ka area naglambo, ang mga kawani sa FamilySearch kinsa nagsangkap sa mga batch sa pag-index moila sa mga dapit nga naglambo ug dayon, kon mahimo, paspasan ang paghatag og mga proyekto nga may kalabutan niana nga rehiyon.

Sa kasamtangan nga gikusgon sa pag-index, tingali sa ubang mga nasud dangtan pa og mga dekada una mahatag ang nakompleto nga mga batch—mao nga nagkinahanglan kita og dugang nga mga tig-index. Daghang mga batch sa pinulongan gawas sa Ininglis sagad moabut og duha ug ngadto sa unom ka tuig sa pagkompleto.

“Kon ang proyekto magpadayon nga ingon niini, kini walay ikahatag nga bili kang bisan kinsa,” miingon si Paul Starkey, Indexing Operations Manager sa FamilySearch. “Ang kinatibuk-ang tuyo sa pag-index mao ang pagbutang niini nga mga rekord [diha sa computer] aron ang mga tawo makapangita sa ilang mga katigulangan. Among gipaningkamutan nga madali ang mga proyekto.”

Ang Simbahan nanag-iya og mga 2.4 ka milyon ka mga rolyo sa microfilm nga naglangkob sa mga genealogical record nga gitipigan didto sa Granite Mountain Record Vault. Ikatandi kini ngadto sa 15 ka bilyones nga mga rekord nga kinahanglang i-index. Dili maihap nga uban pang mga pisikal nga mga rekord anaa sa tibuok kalibutan.

“[Ang pagpangita og pangalan ug personal nga mga rekord] usa ka kasinatian nga mopabati sa mga kasingkasing sa mga tigsik-sik ngadto sa ilang mga amahan,” si Brother Ericson miingon. “Ang mga miyembro sa Simbahan mahimong mogamit niini nga mga impormasyon nga na-index na aron sa paghimo og dokumento alang sa ilang mga katigulangan ug mohimo sa makaluwas nga ordinansa sa templo.”

Samtang hapit tanan nga adunay akses sa computer mahimong moapil sa sayon nga buluhaton sa pag-index, ang importansya niini kinahanglan nga dili mapaubsan, si Sister Gale miingon. “Kon ang mga tawo [unta] makakita sa pag-index isip usa ka mas halapad nga talan-awon sa family history, ilang makita ang importansya niini ug ang panginahanglan sa mas daghan pang mga volunteer.”

“Nagkinahanglan kita og mas daghan pang mga tawo nga moapil sa pag-index,” si Brother Ericson miingon, “ug naghangyo kami og mga tawo sa pagpaambit niini nga programa ngadto sa ilang mga higala ug mga sakop sa pamilya, mamiyembro man sila sa Simbahan o dili. Dili lamang kini alang sa mga miyembro sa Simbahan. Adunay makalingaw nga inter-aksyon kon ang tanan magtrabaho sa usa ka pareho ra nga tumong.”

Ang mga coordinator sa indexing sa FamilySearch adunay bag-ong tumong alang sa mga volunteer: sa pag-index sa mga rekord sa mga pinulongan gawas sa Ininglis.