Nagtubo nga Makabarug sa Kaugalingon didto sa Ecuador
Ang indibidwal nga kagawasan ug ang reponsibilidad sa pagkalungsuranon mag-agad sa prinsipyo sa pagtabang sa indibidwal aron sa pagtabang sa iyang kaugalingon,” miingon si Presidente Ezra Taft Benson (1899–1994), ikanapulog tulo nga Presidente sa Simbahan, misulti atol sa iyang pagsaulog nga pakigpulong niadtong 1975 didto sa Benson Institute Agriculture and Food Institute and Corporation, usa ka programa sa Latter-day Saint Charities.
Ubos sa pilosopiya sa pagpaningkamot sa kaugalingon, ang Benson Institute nakig-alayon sa liboan ka mga tawo sa pagpalambo sa pagpangita og pagkaon, nutrisyon, ug panglawas, pagpalambo sa kalidad sa kinabuhi alang sa pipila nga mga kabus sa kalibutan.
Niadtong 2009 ang mga sakop sa Benson Institute mibiyahe sa Ecuador, usa ka nasud nga buhong sa agrikultura. Hinoon, sumala sa World Health Organization, niini nga nasud nga hapit mag-15 ka milyon ang mga tawo, 23 porsyento sa mga bata nga nag-edad og ubos sa lima kaniadto pa nga kulang og sustansya. Ang mga paningkamot sa Benson Institute nagtabang nga mokunhod kana nga gidaghanon ingon man niadtong misalmot aron sa paghunong sa saykol sa kakabus.
Usa ka babaye, inahan sa unom ka anak, miingon nga sa wala pa moabut ang Benson Institute, sa kasagaran lisud ang pagsangkap alang sa iyang pamilya: “Subo kaayo ang mahimong inahan ug hilabihan ka kabus nga dili ka makahatag sa imong mga anak og usa ka kaonan o usa ka pikas sa pan matag adlaw,” miingon siya.
Ang mga pamilya nga nakig-alayon sa Benson Institute nakakat-on og mga teknik alang sa mas malamboon nga pagpananom, pagpuli-puli sa tanom nga lagutmon, ginagmayng pagpamuhi og hayop, balanse nga pagkaon, personal nga kalimpyo sa panglawas, ug husto nga pag-andam og pagkaon.
Ang kagutom nga maoy inadlaw nga pagsulay sa kadaghanan nagkaminus uban sa pag-implementar sa bag-ong mga teknik sa pagpanguma. Ang mga pamilya nakakita og makahuluganon nga pag-umento sa produksyon sa pagkaon nga sila nakahimo na sa pagtipig og kaugalingon nilang pagkaon ingon man sa pagpamaligya sa ilang mga produkto aron makakwarta. Dugang pa, ang mga pamilya nakasinati og mas maayong panglawas samtang ang ilang pagkaon ug ang kalimpyo milambo. Ang pagkaon sa bunga sa ilang paghago gikan sa ilang mga tanaman nakahatag kanila og mga sustansya nga kaniadto maoy kulang sa ilang gikaon.
“Kaniadto kami adunay mga bata nga hinayon,” usa ka lokal nga magtutudlo miingon. “Human sa programa, ang mga bata dali na kaayo nga makakat-on. Kaniadto, kami adunay mga bata nga kanunay nga magkasakit; human niadto, ang mga bata wala na magkasakit. Kaniadto makatulog sila sa klase; human niadto, dili na sila makatulog sa klase. Luya kaayo silang tan-awon, apan human sa programa mas himsog na silang tan-awon, uban sa dugang nga kalagsik.”
Ang tanan nga mga gipasiugdahan sa welfare sa Simbahan gibase gikan sa mga baruganan sa pagpaningkamot sa kaugalingon. Kana kauban sa praktis nga gihimo sa Benson Institute sa pagpalambo niini sulod sa mga dekada sa kasinatian ug kahibalo padayon nga nagpanalangin sa mga kinabuhi sa napulo ka liboan ka mga tawo sa tibuok kalibutan.
Ang mga pamilya nga nakig-alayon sa Benson Institue nakakita sa mas maayong panglawas samtang ang ilang pagkaon ug ang kalimpyo milambo.