Ang mga PANALANGIN SA Ikapulo

Ni Presidente Henry B. Eyring

Unang Magtatambag sa Unang Kapangulohan

Ang tuyo sa Dios sa paghatag kanato og mga sugo mao ang pagpanalangin kanato. Gusto Siyang mohatag kanato og kinabuhing dayon, ang pinakamahinungdanon sa tanan Niyang mga gasa (tan-awa sa D&P 14:7). Aron makadawat sa gasa sa pagpuyo nga kauban Siya sa kahangturan uban sa pamilya sa celestial nga gingharian, kinahanglan nga makahimo kita sa pagsunod sa mga balaod niana nga gingharian (tan-awa sa D&P 88:22).

Mihatag Siya kanato og mga sugo niini nga kinabuhi aron sa pagtabang kanato nga molambo niana nga kapasidad. Ang balaod sa ikapulo mao ang usa niana nga igpapangandam nga mga sugo. Ang balaod mao nga mohatag kita ngadto sa Ginoo sa ikapulo nga bahin sa atong kinitaan. Yano kaayo kini nga bisan ang usa ka bata makasabut niini. Nakakita ako og mga bata nga mitunol og sobre ngadto sa bishop nga gisudlan og ikapulo sa sinsilyo nga ilang kinitaan.

Usa sa mga panalangin nga moabut tungod sa pagbayad og hingpit nga ikapulo mao ang pagpalambo og hugot nga pagtuo aron sa pagsunod bisan sa mas taas nga balaod. Aron makapuyo sa celestial nga gingharian, kinahanglan nga atong sundon ang balaod sa pagpahinungod. Niana atong bation gayud nga ang tanan kanato ug tanan nga ania kanato iya sa Dios.

Adunay pinakaminus tulo ka paagi nga ang pagbayad og hingpit nga ikapulo niining kinabuhia mag-andam kanato nga mobati kon unsay gikinahanglan natong bation aron sa pagdawat sa gasa sa kinabuhing dayon.

Una, kon mobayad kita sa atong ikapulo sa Simbahan, ang Langitnong Amahan mobu-bu sa mga panalangin ngari kanato. Si bisan kinsa nga kanunayng naghatag og hingpit nga ikapulo nasayud nga kini tinuod. Ang mga panalangin usahay espiritwal ug usahay temporal. Ihatag kini sumala sa pagbuot sa Ginoo ug sumala sa unsay Iyang nahibaloan nga pinakamaayo para kanato.

Samtang moabut kini nga mga panalangin, ang atong pagtuo motubo nga ang Dios mao ang tinubdan sa tanan nga maayo sa atong kinabuhi. Mas daling masabtan nga ang pagpahinungod dayag lang nga miila sa kamatuoran nga ang tanan nga nilalang sa Dios Iyaha. Naghimo kini natong mobati sa pagpasalamat nga 10 porsyento lamang ang iyang gipangayo sa tanan nga Iya nang nahatag kanato. Mao nga kita mas andam na sa pagsunod sa balaod sa pagpahinungod kon kini ipabuhat na kanato.

Ikaduha, tanan kita nga makanunayong mibayad sa hingpit nga ikapulo mobati og mas dako nga kamasaligon sa pagpangayo sa Dios kon unsa ang gikinahanglan nato ug sa atong pamilya. Misaad Siya og mga panalangin nga mas dako pa kay sa atong madawat kon kita magmatinud-anon sa atong pakigsaad sa pagbayad sa atong mga ikapulo (tan-awa sa Malaquias 3:10). Mao nga ang usa sa talagsaong panalangin sa ikapulo mao ang kamasaligon kon unsa ang umaabot. Bisan unsa man ang atong mga kahimtang, ang mga butang modangat sa pinakamaayo. Kon kita motuman sa atong mga gipangsaad, Siya motuman usab sa Iyang saad. Ang pagbati sa kalinaw mao ang usa sa talagsaong panalangin sa pagbayad sa hingpit nga ikapulo. Kadto nga nagtuman sa sugo sa ikapulo makapamatuod nga ang panalangin sa kalinaw tinuod gayud ug bililhon.

Ikatulo, kadtong mobayad sa ikapulo mobati sa paglambo sa ilang gugma sa Dios ug sa tanang mga anak sa Dios. Kana nga paglambo sa gugma moabut gumikan sa pagsabut kon giunsa sa paggamit sa Amahan ang mga ikapulo nga atong gihalad aron sa pagpanalangin sa mga tawo niining kalibutan ug sa kahangturan.

Pinaagi sa awtorisado nga mga sinugo, Iyang gigamit ang mga ikapulo uban sa labihang pag-amping. Ang tigbayad og ikapulo nagtabang sa Ginoo sa pagtukod og mga templo, diin ang mga pamilya ma-sealed sa kahangturan. Ang tigbayad og ikapulo nagtabang Kaniya nga ipaabut ang ebanghelyo ngadto sa mga tawo sa tanang dapit. Ang tigbayad og ikapulo nagtabang Kaniya sa pagwagtang sa kagutom ug pag-antus sa kaugalingon Niya nga pamaagi pinaagi sa Iyang mga sinugo. Si bisan kinsa niana nga mga sinugo makasulti kaninyo kon sa unsang paagi ang gugma milambo tungod kay ang ikapulo gigamit sa pagpanalangin sa mga tawo. Ug mao usab ngadto sa matinud-anon nga tigbayad og ikapulo.

Ang tithing settlement himoon sa umaabut nga mga bulan. Nag-ampo ako nga kamo ug ang inyong pamilya magsugod karon sa pagplano ug sa pagpangandam nga mosarang alang sa mga panalangin nga ibu-bu sa Dios sa tanan nga makapamahayag ngadto Kaniya nga sila mga tigbayad og hingpit nga ikapulo.

Pagtudlo gikan Niini nga Mensahe

Usahay ang kinamaayohang paagi sa pagtudlo og piho nga baruganan mao ang pagpakita niini (tan-awa sa Pagtudlo Walay Labaw ka Mahinungdanon nga Tawag [1999], 164–65). Ikonsiderar ang paghangyo sa usa ka sakop sa pamilya aron ipakita kon unsaon sa pagpresentar ang ikanapulo nga bahin. Mahimo niyang ipakita kini pinaagi sa pagkuha og usa gikan sa napulo ka butang. Sa pagtapos, ikonsiderar ang pagdapit og sakop sa pamilya aron ipakita kon unsaon sa pagsulat sa tithing slip.
“Kadtong imong gitudloan makakuhag kaayohan tungod sa pag-apil sa usag usa.” (Pagtudlo, Walay Labaw ka Mahinungdanon nga Tawag, 63). Pagdapit og mga sakop sa pamilya sa pagpakigbahin kon unsa ang ilang pagtuo sa gipasabut ni Presidente Eyring sa pahayag nga “mobati kon unsay gikinahanglan natong bation aron sa pagdawat sa gasa sa kinabuhing dayon.” Ikonsiderar ang paghisgot sa tulo ka paagi diin ang pagbayad sa ikapulo mag-andam kanato nga mobati kon unsay gikinahanglan natong bation aron makadawat sa mga panalangin sa Dios.

Gilitratohan ni Robert Casey

Mga paghulagway pinaagi ni Steve Kropp