Kabatan-onan
Igo nga Kwarta
Akong nahimamat ang mga misyonaryo sa 17 anyos pa ko. Niadtong panahona ako ug ang akong igsoong lalaki kauban sa pagpuyo. Ang among mama namatay usa ka tuig sa wala pa kadto, ug ang kinabuhi lisud. Sa dihang gitudloan ako sa mga misyonaryo, akong malantawan nga ang Simbahan mao ang kanunay nakong gipangita. Apan ang impluwensya sa akong mga higala nagpugong kanako sa pag-adto sa simbahan matag Dominggo.
Usa ka higayon miadto ko sa usa ka kalihokan sa Simbahan niana nga semana. Ang pagkakita sa tanang batan-on nga nangatawa ug nanagdula nakahatag kanako og dakong kalipay. Ang mga misyonaryo, kauban sa mga batan-on, migamit niana nga oportunidad sa pagtudlo kanako sa leksyon sa ebanghelyo, ug nindot kaayo ang akong gibati ug mihukom nga magpabunyag.
Apan bisan pagkahuman nga ako mipasakop sa Simbahan, nag-atubang ako og mga hagit. Ako lamang ang miyembro sa Simbahan niana nga bahin sa lungsod ug nagpuyo nga layo kaayo sa meetinghouse. Ang mga dili miyembro nakong mga higala dili na ganahan manginlabut sa bisan unsa ngari kanako. Dihang akong gibati ang pag-inusara, nag-ampo ako ug gibati ang gugma sa Ginoo.
Matag bulan, makadawat ako og gamayng kwarta gikan sa pundo nga nabilin sa akong mama. Lisud ang pagsustener sa akong kaugalingon sa gamay kaayo nga kwarta. Apan determinado ako nga magmasulundon. Mibayad ko og ikapulo ug mamilete alang sa seminary ug sa mga miting sa Dominggo. Wala nako hisabti kon giunsa, apan sa katapusan sa bulan, akong nakita nga aduna pay igo nga kwarta alang niining tanan.
Nasayud ko nga ako gipanalanginan sa pagbayad sa ikapulo. Ang pagtuman niini nga sugo nagtabang kanako nga makaangkon og mas lig-on nga pagpamatuod, pagserbisyo og misyon, ug sa pag-ila sa mga panalangin aron ako makapalig-on sa bag-ong mga miyembro nga nag-atubang og mga hagit.